الحمد لله .. استلمت الجميلة 2
أولا : أحب أشكر أعضاء منتدى نايل موتورز على إتاحتهم الفرصة لى .. وتوجيههم المثمر الدائم.. وبالخصوص أعضاء بروتون ..
وبالأخص الأستاذ أيمن والأستاذ توت .. والأستاذ خالد .. والأستاذ مؤمن .. والأستاذ هانى ماجيك .. والأستاذ المحترم (باد بلود)Bad Blood وناس كتير جدا محترمة .. مش فاكرأسمائهم علشان لسه جديد .. فياريت يعذرونى
ثانيا : عايز أوضح حاجة مهمة جدا .. انا زى ما قلت فى موضوع سابق .. انا دخلت المنتدى هنا علشان أشترى عربية معينة كانت فى دماغى
لكن بعد اللى شفته وقرأته عن الجميلة (جين 2) .. أخدت القرار أنى هاشتريها
على الرغم من أنى مكنتش أعرفها .. ولا عمرى سقتها لغاية لحظة استلامها والله
وبالتالى لازم أشكر حضراتكم للمرة التانية
ثالثا : أنا روحت توكيل الصحراوى (عز العرب) بالقاهرة .. يوم الأربعاءالماضى .. وبعد نقاش مع الأستاذ المحترم محسن صالح مسئول البيع هناك .. وده راجل محترم جدا على فكرة .. فى كلامه ومعاملته وفى اتفاقاته معايا .. اتفقنا أنىأستلمها يوم الخميس
( وده علشان كان فى عميل حاجز العربية ولغى الحجز .. فىنفس الوقت اللى كنت فيه هناك ..روحت أنا شابط فى الراجل علشان أخدها .. وده جاء لمصلحتى أنا) .. والحمد لله
وبالفعل توجهت يوم الخميس .. ودفعت المبلغ كاملاً .. وللأسف لم أستفد منالخصم الخاص بأعضاء المنتدى .. ولكن يكفى المعاملة المحترمة من المسئولين بالتوكيل .. وانجاز المهمة فى زمن قياسى
أشكر فى هذه المرحلة .. الأستاذ المحترم / أيمن .. وربنا معاه فى امتحاناته .. صحيح مستفدتش من الخصم اللى اتفق عليه مع الأستاذ محسن .. لكن لما استلمت العربية .. اتكلمت معاه وجبنا سيرة أيمن .. وبصراحة الراجل متأخرش فى أى حاجة أنا طلبتها .. أو سألت عنها.. وعرفت أن أيمن بالفعل بيعمل لأعضاء المنتدى هناك شغل جامد .. والأستاذ محسن بيراعى الناس اللى بتيجى من طرفه جامد.
فبجد تحية تقدير له، وان شاء الله تكون معرفة خير وود ومحبة .
العربية لونها جراى ميتالك .. أتوماتيك.. وده اللون اللى أنا كنت عايزه .. والحمد لله
أنا عايز أحكي لكم يا جماعة على اللحظات الأولى اللى ركبت فيها العربية
أول ما ركبت العربية ومشيت بيها وطلعت على الصحراوى فى طريقى للأسكندرية .. العربية وهم .. وهم جامد جدا
من شكلها الخارجى .. والداخلى .. وسحبها .. و الساوند سيستم بتاعها .. أقول إيه ولا إيه .. ولا إيه طبعا أنتوا عارفين الكلام ده .. من غير ماأقوله ؟؟؟؟
أنا قرأت أكثر من موضوع فى المنتدى هنا .. عن أصحاب الجين اللى بيقعوا فى حب سياراتهم .. انا كنت مصدقهم .. لكن مكنتش فاهمهم أوى.
دلوقتى وعلى الرغم من أنى ممشيتش بالعربية غير مرتين بس لكن حسيت ببداية حب هينشأ بينى وبين العربية :shyy:
الحمد لله ..
على فكرة .. وانا راجع كنت ماشى 100-120 كيلو فى الساعة .. لكن جه وقتعليا لقيت أنى مشيت على سرعة 160 كيلو فى الساعة وده لمدة حوالى من5-10دقايق ..أنا كنت حاسس أن العربية مش عايزة تجرى .. لأ .. دى كانت عايزةتطير .. ورجعت بعدها ل 120 تانى
ولما روحت البيت بصيت فى الكتالوج لقيت أن أول 1000 كيلو معديش ال 130 كيلو فى الساعة
طيب الشوية اللى أنا جريت فيهم دول .. يزعلوا العربية أو موتورها؟
وكمان أنا مشغل التكييف .. فمش عارف ده عادى .. ولا غلط .. ولازم أكمل الألف كيلو الأول ؟
طبعا .. أنا من هنا ورايح .. ههريكم تساؤلات واستفسارات .. فلو سمحتم تستحملونى وقتها
وصحيح أنا لقيت شوية حاجات فى العربية .. محتاجة تتعمل فى صيانة الألف .. لكنها حاجات بسيطة جدا .. مأثرتش على فرحتى بالعربية نهائى .
يلا يا جماعة .. مستنى مباركتكم ليا .. ودعواتكم الصادقة ، ولو فى أى نصائح لمبتدئ مع السيارة .. فكلى آذان صاغية.
وأخيرا .. أحب أرحب بنفسى فى عالم الجين اللى كان مستخبى عنى سنين
ولى لقاءات تانية معاكم فى القريب ان شاء الله
تحياتى وتقديرى
د/عماد