قواعد القيادة الآمنة.......في شوارع القاهرة
القاعدة الأولى :
لو عربيتك كبيرة أو قديمة .. استخدم المبدأ القانوني: ( اللي خايف على عربيته يوسع!! )
ملحوظة: ابعد عن سكة العربيات المخرشمة ، بيسوقوا بنظرية ( ضربوا الأعور على عينه!! )
القاعدة الثانية :" البوز بيز Booze Base "
اللي يدخل بوز عربيته الأول للتقاطع هو صاحب أولوية المرور!
احرص على أن تكون صاحب أول بوز.
ملحوظة: لا تطبق الـ " Booze Base " مع أي لوري أو أتوبيس .. حرصاً على بوزك لا مؤاخذة !
القاعدة الثالثة :
الإشارات تكشف نواياك للأعداء ..اياك أن تستخدمها

القاعدة الرابعة :
لا تترك مسافة للأمان بينك و بين السيارة التي أمامك فهذا له عدة مخاطر :


-1 عربية ثانية حتملا الفراغ في ثواني و برضه ما يبقاش فيه مسافة بينك و بين الي قدامك ، و كل الي كسبته انك اتأخرت لورا شوية .
-2
حتدي فرصة للعيال يعملوا غرز قدامك .
-3
كل المشاة حيغمضوا عينيهم و يعدوا من الحته دي .
-4
اللي وراك حيقعد يزمر - لو كان مؤدب - أو تسمع شوية أسامي حيوانات لو كان سواق تاكس - مؤدب - ، أو حيخبطك من ورا لو كان سواق ميكروباص - و دول مفيش حد منهم مؤدب

القاعدة الخامسة:
الإشارات مش معمولة علشان تنظم المرور .. معمولة علشان شكل القاهرة يبقى متحضر بس
!
اعتمد على العساكر ( مع تحملك كامل المسؤلية لو واحد منهم شاورلك تعدي و بلدياته الناحية الثانية فتح السكة للوري ) !
أو يفضل أن تستعمل البوز بيز ( راجع القاعدة الثانية )

القاعدة السادسة :
- اذا كنت مش واقف في الصف الأول في الاشارة اعمل حسابك تزمر بشكل متواصل و هستيري أول ما الأشارة تفتح، لأن الناس الي قدام بيبقوا واقفين في الاشارة من زمان و جايز جداً يكونوا ناموا!!
القاعدة السابعة :
معظم الحوادث تحدث في التقاطعات أول الإشارة ما تحمر، كل ما عديت الإشارة الحمراء أسرع كل ما قلت فرصة انك تتخبط !

القاعدة الثامنة :
الشارع مكان مقرف، سوق بأسرع ما يمكن حتى تتخلص من هذا الهم بسرعة،
الناس الي ماشيين بالراحة مرضى نفسيين بيستمتعوا بالعذاب .. يستاهلوا كل اللي يجرالهم .
القاعدة التاسعة :
من حقوقك الدستورية أن تركن أمام باب المحل الذي تريد أن تشتري منه ..
إاذا سبقك واحد ابن ستين في سبعين و ركن قدام الباب ، فمن حقك تقفل عليه و تركن صف ثاني أو ثالث ، و مش مهم لو الشارع اتقفل ، ايه يعني أما الناس تتعطل عشر دقائق علشان تستمتع بحقوقك الدستورية ؟.. هي يعني الدنيا طارت ولا كان وراهم الديوان ؟

القاعدة العاشرة :
من حقك أيضاً أن تخرج من مكان انتظارك في أي لحظة تشاء .. اكسر الدركسيون شمال و اطلع ، أي حد ماشي في الشارع لازم يقف لك فوراً .. راجع البند السابق .
القاعدة الحادية عشر :
احترس من ثلاثة أنواع من السائقين ، بيسوقوا و كأنهم مش ممكن يموتوا :
1.
العيال الروشة الي بيلعبوا Computer Games و فاكريين إن ممكن يكسبوا Life زيادة لو ساقوا أسرع .
2.
موتوسيكلات توصيل الطلبات ( Home Delivery ) .
3.
سواقين الميكروباص .
ملحوظة: أوعى تحاول تثبت لحد منهم إن فكرته غلط. .. فاهمني !!! .

القاعدة الثانية عشر :
لما تشوف حادثة لازم تهدي و تتفرج - مش مهم تساعد - ، الحاجات دي دمها أخف من الأخبار المملة بتاعة التلفيزيون .. و بعدين لما الطريق وراك يقف يبقى كده بتحمي المجتمع من حادثة تانية .
القاعدة الثالثة عشر:
الكناسين لازم يحللوا اللقمة الي بياكلوها .. حاول طول ما انت ماشي تنفعهم و ترمي أي حاجة من الشباك .


القاعدة الرابعة عشر :
لما تخلص سيجارة أوعى تحطها في الطفاية ، ارميها من الشباك أول ما تشوف واحد بموتوسيكل معدي جنبك ( علشان يحرم يعمل غرز ) .
-
قـواعد خـاصة بالمشـاة
القاعدة الخامسة عشر :
من حقك أن تعبر الشارع في أي
وقت و من أي مكان..
القاعدة السادسة عشر :
إذا كان هناك سيارة قادمة .. اعمل نفسك مش واخد بالك و عدي براحتك خالص ،ما تخافش هو حيقف ، هو أهبل يدوسك و يودي نفسه في داهية ؟
القاعدة السابعةعشر :
اياك أن تنظر نحو السيارات القادمة ، أعبر الطريق و ظهرك لها حتى لا يشك أحد قائدي السيارات أنك تراه و يحاول يخوفك علشان تقف انت .

القاعدة الثامنةعشر :
حتى لو شفته أوعى تخاف - خصوصاً لو معاك مراتك - تبقى راجل ملو هدومك و تخاف من حته عربية ؟!
عرض قفاك و سيبه يتفلق !
القاعدةالتاسعةعشر :
الرصيف ليس للمشاه .. بل لركن السيارات و فرشات الباعة الجائليين و المحلات ... الخ
لذلك يحق للمشاة السير في وسط الشارع، لمزيد من الأمان .. راجع القاعدة السابقة .
القاعدة العشرون :
إذا كان الماشي من فئة النقل الثقيل، فمن أبسط حقوقة إنه يمشي على أقل من مهله و يهتز براحته .. واللي مش عاجبة الهز يدور على لوري يخبطه !


منقوووووووول