الموضوع: المشاكل الشائعة فى ال(الافيوا)

كلهم عندي الحمد لله ماعدا الريداتير و انتفاخ الكاوتش
و لسة الاسبوع الي فات ماشي من منصور الصحراوي بخناقة علشان كان بيعملولي صيانة الكاسيت

الاول الكاسيت كان بيتصلح في كلاريون الي في شارع احمد عرابي و بعد كدو وقفوا التعامل معاه و بقى لازم تروح منصور الصحراوي عليان تصلح الكاسيت
روحت في يوم سبت علشان الجو بيبقى فاض كنت هناك الساعة 8 الصبح
قولتلهم على البوابة انا داخل اعمل صيانة للكاسيت قالولي خلاص سيب العربية برة و ادخل هات مهندس من جوة يفك الكاسيت
قولت الحمد لله اني مش هدخل جوة بالعربية
دخلت كلمت مهندس في الاستقبال قالي لاء ممنوع حد من المهندسين يخرج برة لازم العربية تخش جوة و لو دخلت هيتعملها امر شغل و هتدخل الورشة ( بداية غير مطمئنة )
قولتله ماشي روحت داخل و وقفت في الحارة بتاعة الصيانة السريعة و فين و فين لما حد عبرني
جه مهندس اخد عمل امر شغل و خد العربية دخلها الورشة
الساعة بقت 9.30 و مافيش اخبار الساعة دخلت على 10 و لا حد عبرني ( معقولة بيفك كاسيت يقعد ساعة و نص )
روحت الكنترول اقولهم على الموضوع قالي اسأل المهندس الي استلمت العربية قولتله انا معرفش اسمه قالي هتلاقيه مكتوب على امر الشغل
قولت ماشي نزلت سألت على المهندس الي اسمه مكتوب على امر الشغل و كانت المفاجآة
المهندس ده أجازة انهاردة
طيب ازاي
قالي ممكن يكون مهندس تاني هو الي عمل امر الشغل بأسمه
طيب يا جماعة الساعة داخلة على 11 و انا بفك كاسيت بس و لا انا هستلمه انهاردة اصل مش معقول ساعتين و نص بيفك كاسيت
قالي لاء احنا هنفك الكاسيت بس انهاردة و لما يتصلح هنتصل بيك
طيب شوفلي المهندس فين
قالي هو شكله ايه طيب و صفتهوله
دخل يدور عليه في الورشة و مطلعش
المهم المدير بتاعي في الشغل كلمني و انا متعصب فصوتي علي و قعدت اشتم في المركز بتاع منصور لقيت واحد جاي جري عليا
فيه ايه و بتزعق ليه و لو فيه مشكلة انا احلها ( تقريباً افتكرني بكلم 16424 و بشتيكلهم )
قولتله على الموضوع دخل 5 دقايق جاب العربية و طلع و مشيت الساعة 11.45 ( من 8 الصبح لحد 11.45 بفك كاسيت عربية )
المهم عدى يومين و التالت اتصلت بيهم قالولي لسة ما خلصش و هنتصل بيك اول ما يخلص
لحد يوم الأربعاء بالليل محدش كلمني روحت متصل بيهم تاني
قالولي خلص و حضرتك تشرفنا علشان تركب الكاسيت
المهم روحت الخميس ( يوم زيارة اوبوما ) قولت البلد هتبقى فاضية
كنت هناك الساعة 7.45 و لقيت كذا عربية رايحة تعمل صيانة
روحت داخل واقف في الحارة بتاعة الصيانة السريعة و كلمت واحد واقف في الاستقبال ( راجل عجوز كدة و شعره ابيض )
قولتله عايز اركب الكاسيت و حكيتله الموضوع
لقيته بكل تناحة بيقولي طيب انت ايه الي وقفك في الحارة دي
قولتله علشان هركب كاسيت قالي ما ينفعش
لازم تقف في الحارة بتاعة الاصلاحات الميكانيكية
حاولت افهمه ( لكن هو تقريباً مش بيفهم )
طبعاً الحارة بتاعة الخدمات الميكانيكية كانت اتملت على الاخر
مش هطول عليكم
لحد الساعة 10.30 محدش كان عبرني ( فضلت واقف متنح ساعتين لدرجة اني فردت الكرسي و انتخت جوة العربية )
جالي مهندس كدة قالي ايه المشكلة
قولتله المشكلة ان مفيش مشكلة انا عايز اركب الكاسيت بس
لقيته بكل تناحة بيقولي طيب ايه الي وقفك هنا انت المفروض صيانة سريعة
قولتله الي حصل بقى حكمة ربنا المهم شرحتله الموضوع و قولتله الساعة دلوقتي 10.45 لو الموضوع هياخد اكتر من ربع ساعة هاتلي الكاسيت في أيدك ما تركبوش لقيته بيضحك قولتله انا بتكلم جد
قالي ان شاء الله اقل من ربع ساعة
و فعلاً الساعة 11 و خمس دقايق لقيت العربية خرجت من الورشة و من هنا تبدأ المشكلة
انا المفروض بعمل اذن خروج من البوابة
قعدت ساعة و نص علشان امر الشغل يطلع من الورشة للكنترول
و خلال الساعة و نص دول لفيت على كل المهندسين و العمال و الناس الي في الاستقبال
و محدش راضي يعبرني
لحد ما اتنرفزت على الاخر و كبرت في دماغي و صوتي ابتدى يعلى
و قولتلهم لو تصريح الخروج ما اتعملش في خلال 5 دقايق انا هاخد العربية و امشي و الي هيقف قدامي على البوابة هدوسه من الاخر
لقيت واحد شغال في قسم الكنترول هناك ( كان متعاطف معايا من الاول )
راح بنفسه يدور على امر الشغل لحد ما لاقاه و عملي تصريح الخروج و مشيت الساعة 12.15
على فكرة انا ما مضتش على حاجة هناك اني استلمت الكاسيت و امر الشغل لسة معايا يعني ممكن اعملهم مشكلة هناك و اتنح و اخد واحد تاني بس مشكلتي اني ما اتربتش على كدة
روحت مكلم 16424 و حكيتلهم على الي حصل و قالولي هنتصل بيك خلال يومين علشان نتابع معاك الشكوى
و فعلا اتصلوا بيا مرتين لحد دلوقتي علشان يشوفوا مين المتسببو مش لاقين حد
و قالولي تحب تسيب تعليق على الي حصل
قولتلهم لو حصل اي حاجة في العربية تستدعى ان اروح منصور الصحراوي هأصلها برة على حسابي او ابيع العربية على عيبها بس ما ادخلش المكان ده تاني
و الكاسيت الي بيبوظ على طول ده هغيره الاسبوع ده
و دي كانت الحكاية
للعلم
كلاريون كان بياخد بالظبط دقيقتين فك و يوم تصليح ( او اقل من يوم علشان كنت بوديه وانا راجع من الشغل و اتصل بيه تاني يوم من الشغل يقولي خلص و اروح اركبه تاني و انا مروح في دقيقتين بردو )

لازم نعمل حاجة كملاك للعربية دي
يعني نتفق في يوم نروح التوكيل مع بعض علشان المشاكل دي
نعمل محضر جماعي في جهاز حماية المستهلك
نعمل اي حاجة
ياريت نحاول نتفق على حل