ظاهرة الـ Vapor Lock في الجو الحار

بالنسبة للعربيات القديمة اللي بنظام الكربراتير في الجو الحار زي اليومين دول و خصوصاً في الإشارات الطويلة و المشي على الأول فترات طويلة ساعات بتحصل الظاهرة دي و هي إنه نتيجة لسخونة غرفة المحرك بصورة كبيرة فالبنزين في الخراطيم بيتحول لبخار و بالتالي الطرمبة متقدرش تسحب من الخزان و تدفع للكربراتير، و ممكن ملاحظة ده بإننا هنلاقي مفيش بنزين في الفلتر الشفاف (لو موجود) و العربية طبعاً بتبرجل و ممكن تقف خالص و متدورش.
طبعاً مجرد ما العربية بتبرد شوية و الطرمبة بتبرد البنزبن بيتكثف تاني بس و بتكون أكن البنزين خلصان منها فبتكارك للعربية شوية علشان توصل البنزين للكربراتير و تدور عادي جداً.
أنا كنت شفت مع صديق لي كان معاه 128 نفس الموضوع و كان الحل اللي عمله إنه حط فوطة مبلولة على طرمبة البنزين علشان تبرد على إعتبار إن المشكلة في الطرمبة و رغم إن ده حل فعال لعلاج المشكلة لحظياً لكن المشكلة مش عيب طرمبة أصلا بقدر ما هي ظاهرة مرتبطة بالسخونة.
المهم أنا عملت شوية بحث كدة على النت و لقيت إنه الحل اللحظي علشان نمشي إن نبرد الطرمبة بدلق مياه عليها أو وضع فوطة مبلولة و الحل النهائي في ناس بتقترح عزل خراطيم البنزين في غرفة المحرك بالفويل قبل و بعد طرمبة البنزين و في ناس بتركب طرمبة بنزين كهرباء في الخلف عند الخزان بعيد عن حرارة المحرك زي العربيات الحديثة علشان كمان يكون البنزين في الخراطيم تحت ضغط و ميتبخرش بسهولة و في حاجات تانية كتير..
يا ترى في حد عانى من المشكلة دي قبل كدة و عرف ليها حل عملي و سهل و فعال؟
و شكراً.

انا الا بيقبلونى انا العربية لما تسخين اوى العربية بتبطل وتيجى تدور تعمل تعتلة مع ان المارش سليم والا الان لم اعرف ما السبب والكرباريتر لسة مغيروا

للاسف بعانى منها انا كمان فى 128 وجربت كل الحلول
و صلحت الرادياتير والكاربيراتير و حطيت مياة خضراء وكشفت على المارش
ولسه العربية بتسخن والمروحة فى أأقل مشوار بتشتغل ( رغم انى مظبط الثيرموستات )و لسه العربية
فى الحرارة بتدور بالعافية

خلاص ما نخرجش بيها فالنهار

وقل ربي ذدني علما
شكرا علي الموضوع ياباشا

ربنا يباركلك في الموضوع ده

أشكركم جدا على الردود الجميلة و أحب أقولكم إني مستمر في البحث و لحد دلوقتى الحلول أغلبها وضع طرمبة كهربائية عند الخزان في الخلف و دي بتنهي المشكلة بصورة كبيرة أو عزل خراطيم و مواسير البنزين في غرفة المحرك و قبل العزل طبعاً إبعادها بقدر الإمكان عن جسم المحرك نفسه اللي بيكون عبارة عن فرن في الحر، يعني ميكونش الخرطوم أو الماسورة ملامس لجسم الموتور في أي نقطة و كمان لا يفضل إن خرطوم البنزين يكون طويل و فيه لفات كتير لإن دي بتساعد على إحتجاز فقاقيع الهواء عند بداية حدوث الظاهرة.
بالنسبة للعزل و ده في رأيي الحل العملي فيه خراطيم عزل حرارة Fire Sleeve زي خراطيم الحريق كدة ممكن تتلبس على خرطوم البنزين لعزل الحرارة عنه بس معرفش نلاقيها فين و يتهيألي ممكن خراطيم عزل مواسير التكييف ممكن تكون ممتازة برضه لو لقينا مقاس مناسب لخرطوم البنزين.
و ممكن بيتحط عواكس حرارة Heat Shield بين الموتور و الخراطيم داخل غرفة المحرك في الحتة اللي الخراطيم بتقرب فيها من جسم المحرك يعني قبل و بعد طرمبة البنزين علطول زي مثلا الريش العاكسة اللي في كشافات النيون.

,و كمان إكتشفت إن مسارات الهواء داخل غرفة المحرك أصلاً متصممة و محسوبة بدقة و بتوجه الهواء لأسفل العربية يعني الـ circulation ده محسوب و بالتالي أي تعديل مش مدروس في غرفة المحرك ممكن يلخبط الدنيا و يؤدي لخلل في الـ circulation ده و بالتالي تراكم الحرارة في المنطقة دى و حدوث بقى ظواهر سلبية كتير زي موضوعنا الـ Vapor Lock.

آخر حاجة أنا منبهر بعملية تصميم العربييات دي يا جماعة ... يعني الموضوع ده خلاني أتابع مواقع Fan Clubs لعربيات من الخمسينات و الستينات و يا جماعة تخيلوا من 50 أو 60 سنة الحاجات دي كلها متاخده في الإعتبار و محسوبة و ليها أصول مش كدة و خلاص.
علشان كدة في رأيي العربيات القديمة دي ليها روح كدة غير العربيات الجديدة خالص و تحب كدة تفهمها و تدعبس فيها و تلاقي الناس بره هروها تعديلات و ليها عشاق بجد زي البيتل مثلاً اللي أنا شايف إنها عربية عبقرية غير لما تفتح كبوت عربية جديدة و متبقاش عارف مين رايح فين مجرد سواقة و خلاص لكن متعة العربية كعربية للغاوي اللي بيحب يفكر و يدور و يحل حاجة تانية.
مش عارف متفقين معايا و لا لأ؟

و شكراً مرة تانية على ردودكم الجميلةو المشجعة.

كلام جميل.........

انت عندك خراطيم البنزين بلاستيك ولا كاوتش ولا كاوتش مكسي