خلاص اتخنقت ومش عارف اعمل ايه ؟

**أبو صلاح** · 07-06-2009 02:44 PM

اسوء سيء في الدنيا انك تحس انك مهدد في عملك بالفصل في اي وقت
وأسوأ شيء أيضا ان صاحب الشغل بيقولك انه بيمن عليك برتبك
وأسوأ شيء ان صاحب الشركة يبقى عايز يتفنن في الخصومات والجزاءات والتهديدات وتأخير المرتبات عن اول الشهر
اسوأ شيء انك متسمعش كلمة شكر لمرة او معاملة كويسة آدمية لمدة أكثر سنة

الكلام ده هو اللي بيحصل معايا من أكتر من سنة ونصف في الشركة
انا عمري في الشركة دي سنتين

وصلت لمرحلة اني مش قادر
والله عارف في ناس هتقولي الشغل كله همومو ومشاكل
انا عارف الكلام ده

لكن لو لاحظت انا في شكوتي ماتكلمتش عن ضغط شغل او كترة شغل أو سهر أو خلافه
وعندي طاقة استحمل
انا شغلي القديم كنت بركب مواصلات ب 10 فايلات من ش مكرم عبيد لحد شبرا الخية شايلهم على كتفي زي العتالين
لكن قسما بالله كنت مبسوط
عمري ماروحت شغلي على الصبح وحسيت اني مهدد بالفصل او الرفد او ان صاحب الشغل او المدير بيهددني في لقمة عيشي والله شفت اهوال لكن عمري ما اتضايقت

الشغل اللي انا فيه دلوقتي
صاحب العمل معدوم الثقة في اي حد وفي اي موظف حتى لو كان قديم (وعلى فكرة أنا اقدم واحد في الشركة حاليا ده بسبب ان في ناس كتير بتمشي)

آخر موقف حصل لي (القشة التي قصمت ظهر البعير)
امبارح قعد مع السكرتارية واعطاها تعليمات تمليها علينا نحن كموظفين بجميع الاقسام
التعليمات دي هي عبارة عن تعديل في شكل التقارير اللي بتوصلوا مننا
وكان داخلها شغل كتير جدااا في جرافيك وتزويق
طبعا الاكسل (على حد معلوماتي) لايعطي امكانيات عالية في التنسيق
فكلمته وناقشته وبقوله اني مش هقدر اعمل الكلام ده قالي استشير زميل لي في المكتب معروف عنه انه دكتور اكسيل وكنت مكلمه قبلها وقالي مش عارف احل المشاكل دي ولو اتحلت المفروض ان التقرير لو هياخد في كتابته 10 دقائق ممكن ياخد ساعة في التنسيق

رد علي قالي انا لا اقبل الاعذار شوفلك حل فقولته يشوفلي حد من بتوع الجرافيك اللي موجودين في الشركة يجهزلي قوالب جاهزة للعمل قالي مفيش حد بيفهم في اكسل
قلتله يبقى لازم نجيب برنامج جاهز نشتغل عليه (علشان اريح دماغي رغم اعتراضي على البرامج الجاهزة) تخيلوا رد علي قالي ايه ؟
قالي : خلاص صمملي برنامج كامل واعرضه عليه (والمفروض انه راجل مهندس جرافيك يعني بيفهم في الكمبيوتر كويس)
قلتله مش ينفع اصمم لازم اجيبلك عروض من شركات برامج وانت تختار

القنبلة التانية : قالي خلاص يبقى نشوف حد تاني يعمل الكلام اللي انت مش عارف تعمله ده
أصبحت مهدد في رزقي بسبب اني مش فاهم شغل جرافيك وتزويق (هي دي المصيبة فعلا)

قالي لا روح لموظف موجود في شركة تانية شقيقة لينا يعملمك
والله الموظف ده انا كنت شفت شغله قبل كده والله لا يمت للحسابات باي صلة ولا منظر ولا اي شيء

قالي انا لا اقبل اي اعذار ولا اقبل اي نقاش وانتهى الحوار على كده

انا مهموم جدا وقلت احكيلكو واخفف عن نفسي شوية
لاني حاسس اني على حافة الهاوية

اعمل ايه معلش طولت عليكم وأزعجتكم

**mohmd76** · 07-06-2009 02:52 PM

هذا فى كل مكان فى مصر
الاسباب
لا يوجد قوانين العمل وتنظيم ساعات العمل والاجور
لا يوجد تامينات اجتماعيه
لا يوجد تامين صحى
لا يوجد قوانين تنظيمية للعمل والعاملين اوربا ساعات العمل الاسبوعى 35 ساعه
لا يوجد نقابات عمال حقيقيه

**أبو صلاح** · 07-06-2009 02:58 PM

المشاركة الأصلية كتبت بواسطة mohmd76

هذا فى كل مكان فى مصر
الاسباب
لا يوجد قوانين العمل وتنظيم ساعات العمل والاجور
لا يوجد تامينات اجتماعيه
لا يوجد تامين صحى
لا يوجد قوانين تنظيمية للعمل والعاملين اوربا ساعات العمل الاسبوعى 35 ساعه
لا يوجد نقابات عمال حقيقيه

لا اجمل ما في الموضوع كل فترة الاقي صاحب الشغل عندي خارج بره مكتبه
ويقول والله بعلو صوته
يا جماعة انا ديكتاتور اللي اقوله هو اللي يتنفذ بدووووووووووون نقاش

**mesholove** · 07-06-2009 03:00 PM

كان الله فى عونك
ربنا يوفقك الى ما فيه الخير
حاول تدور على مكان تانى تحس فيه بالأمان .... واستحمل شويه
وعليك بكثرة الاستغفار ودعاء الكرب

عَنِ ابْنِ عَبَّاسٍ رضي اللَّه عنْهُما أَنَّ رسُولَ اللَّه صَلّى اللهُ عَلَيْهِ وسَلَّم كَان يقُولُ عِنْد الكرْبِ : « لا إِلَه إِلاَّ اللَّه العظِيمُ الحلِيمُ ، لا إِله إِلاَّ اللَّه رَبُّ العَرْشِ العظِيمِ ، لا إِلَهَ إِلاَّ اللَّه رَبُّ السمَواتِ ، وربُّ الأَرْض ، ورَبُّ العرشِ الكريمِ » متفقٌ عليه .
اللهم رحمتك أرجو فلا تكلني إلى نفسي طرفة عين ِ وأصلح لي شأني كله لاإله إلا أنت الله ، الله ربي لاأشرك به شيئاً .رواه ابن ماجه .

قال رسول الله صلى الله عليه وسلم :" دعوة النون إذ دعا بها وهو في بطن الحوت :" لاإله إلا أنت سبحانك إني كنت من الظالمين لم يدع بها رجل مسلم في شئ قط إلا استجاب الله له ..صحيح الترمذي

**أبو صلاح** · 07-06-2009 03:03 PM

المشاركة الأصلية كتبت بواسطة mesholove

كان الله فى عونك
ربنا يوفقك الى ما فيه الخير
حاول تدور على مكان تانى تحس فيه بالأمان .... واستحمل شويه
وعليك بكثرة الاستغفار ودعاء الكرب

والله بدور بجدية
ولسه إرادة ربنا مجاتش

**El.Hossieny** · 07-06-2009 03:28 PM

و الله يا ابو صلاح كل القطاع الخاص كدة ... انا كمان تقريبا نفس الوضع ( بس مش اوي كدة يعني ) و بالرغم من كدة لازم اصبر و استحمل عشان اكل العيش .. و كمان الواحد مبقاش لوحده زي زمان لان في ناس اصبحوا ملزومين مني ... عشان كدة ملناش غير ربنا نستغفره و ندعيه يوفقنا للاصلح و الاحسن

**abzoabzo** · 07-06-2009 03:36 PM

منهم لله رجعوا نظام العبودية
واعلى ما فى خيلك اركبوا

حسبى الله ونعم الوكيل

**هيثم** · 07-06-2009 03:43 PM

ان الله مع الصابرين

**shafey** · 07-06-2009 03:50 PM

استحمل شوية لحد ماتلاقى حاجة احسن و بعدين من حكم فى مالة ما ظلم

**Terrible_DaRsH** · 07-06-2009 04:09 PM

لالا استحمل متعملش زيي :)

مرة اشتغلت مع عضو مجلس الشعب التابع لنا . و هو قريبنا اساسا .

كلمنى مرة بطريقة وحشة رحت مزعق فيه و رميت له الورق فى الارض و من ساعتها و انا مليش نفس اشتغل اساسا :)

بس عرفت انى كان لازم اجى على نفسي .. عموما ربنا يوفقك و تلاقى وظيفة احسن ان شاء الله ( الصبر ) .