المشاركة الأصلية كتبت بواسطة abou_ruqi
يابني انت من اسباب الهجرة اساسا ، اصبر لما يندهو على اسمك
المهم انا كنت مستقر وحابب عيشتي وراضي وشاكر
لحد ليلة غبراء من ليالي صيف اسكندرية اللعين ، ليلة خمس اول شهر اغسطس من تلت سنين الساعة 8
الاسكندرانية عارفين ان ليلة زي دي بيكون في ربع مليون عربية وقفين طابور في الكورنيش اللي بالكاد بيستحمل الاسكندرانية في الشتا
المهم بيت العيلة فيه والدتي ووالدين واتنين ولاد اختي اللي في الخليج بيدرسوا في مصر في اول سنة جامعة
بحكم سكني فانا اقرب لبيت تلعيلة من اخويا اللي ساكن بعيد نسبيا
في الليلة السودا دي جالي تليفون من بيت العيلة من ابن اختي بيقولي الحق جدتي اتحرقت
جدته اللي هي امي دي عندها فوق السبعين سنة كانت بتخبز بيتزا علشان ولاد اختي يتعشوا
وكان عندها بوتجاز جديد كريازي طبعا صناعة مصرية
تبين لاحقا ان البوتاجاز ده فيه عيب صناعة معروف انه لما الفرن بيوطى على الاخر الغاز بيقطع
فالحجة ربنا يكرمها كانت حاطت البيتزا في الفرن ووطت عليها وراحت تشوف حالها
فالفرن الغاز انقطع فطفى الشعلات ثم عاد مرة اخرى وامتلى منه الفرن على الاخر
فالحجة جزاها الله كل خير بعد عشر دقايق راحت تبص على البيتزا فلقت العيون مطفيه فافتكرت انها مولعتش الفرن من اساسه
فولعت عود كبريت وفتحت باب الفرن ولكم ان تتخيلوا الانفجار اللي حصل في المطبخ ، واللي حصل لامي
الغالية اللي الدنيا كلها متسواش ضفرها
المهن انا اخدت المكالمة الصدمة ونزلت جري على العربية وكانت افيو وقتها ومحدش يسالني ازاي رحت من سموحة للشاطبي في اقل من عشر دقايق بالرغم من الزحمة في كل مكان
رحت وشوف منظر امي وكنت حخر من طولي لولا ان الموقف يحتاج لثبات شديد وكانت هي وولد وابويا بره البيت وسايب موبيله
فشيلتها ونزلت بيها وسبت الولد في البيت علشان يبلغ ابويا واخويا ويقلهم انا في مستشفى ايه
رحت جري على اقرب مستشفى خاصة قريبة من المنطقة وهي السلامة الجديدة
دخلتها الطوارئ والدكاترة مبقوش عارفين يعملولها ايه ونادوا الاستشاري او الاخصائي ، وقالولي اول صدمة
ان دي مستشفى خاصة والوزارة مانعة المستشفيات الخاصة من علاج الحروق من الدرجة التانية والتالتة فقط مسموح بالاولى
اه يا بلد ال . ......
طب اروح فين بامي دلوقتي ؟
قالوا محدش حيرضى يستقبلها غير مركز الحروق بمستشفى الميري ، واللي ما يعرفش الميري يدور في مواضيعي حيلاقي موضوع خاص بمستشفى الميري وحاطت فيه صور المستشفى
سالتهم طيب انا معايا فلوس ومش عاوز اروح مستشفى جامعي ؟
قالولي ما ينفعش محدش حيستقبلها ده قانون
فشيلت امي وجريت على الميري وهي الحمد لله في نفس المنطقة
وامي بتصرخ من الالم ثم تدخل حالة من الاغماء ثم تستيقذ فتصرخ مرة اخرى وانا مش عارف اعملها ايه
اعاذاكم الله من قهر الرجال وعجز الحيلة
رحت الميري والعسكري الله يكرمه فتحلي الباب الرئيسي علشان ادخل لما شاف امي على الكنبة الخلفية
دخلت مستشفى الكلب دي لعن الله القائمين عليها ولعن وزير الصحة على الملعون مبارك
وصلت لعنبر الحروق اللي بيسموه مركز الحروق لقيته مليان ناس محروقة معظمهم مضروبين بمية النار الظاهر كان في خناقة في المنطقة
وانا داخل قابلي تمرجي وقالي رايح فين ؟
قلتله امي محروقة
قال ممنوع
ليه يابن ال.....؟
قالي النهاردة الخميس رجال فقط تعالى بكرة
اهههههههههههه يا اماهههههههههههههه
يعني ايه المكان الوحيد اللي ممكن يعالج امي مش عاوز يعالجة ؟
يعني ايه الستات اللي يتحرقوا يون الخميس مايلقوش حد يعالجهم ؟ يعني ايه ؟
دي بلد دي والا جنينة حيوانات ؟
فين في العالم مستشفيات ترفض عيان ؟ سواء مجانية او بفلوس ، انا كنت جاهز لاي مبلغ ممكن تطلبه مستشفى في مصر ، بس حد يلحقها !
محدش عاوز يلحقها ، اه يا بلد كنا مستعدين نموت نفسنا علشانك بس تعيشي وتفضلي زي ما قال حميد زعلاء
انما انت زي ما قال الجخ
انا اللي زرعك دهب بتاكليني سباخ
ما ان كان ده تقل ودلع بزيادة دلعك باخ
المهم سالتك التمرجي طب اروح بامي فين ؟
قالي روح الانفوشي
شلت امي ودخلتها العربية والطريق من الازاريطة لحد النفوشي يوم خميش شهر اغسطس شيئ لعين
سقت زي المجنون وطلعت على الكرنيش لقيت المتجة للانفوشي واقف تماما ، كل مصر رايحة الانفوشي يكلوا ايس كريم
مشيت في المعاكس لقيته فاضي ، مشيت معاكس على الكورنيش تخيلوا ؟ لحد محطة الرمل اتاري كانت الاشارة وقفة بس وبعد ما فتحت مقدرتش اتحرك معاكس ومحدش مقدر ان دي حالة طوارئ لا وشتموني بامي !
المهم الطريق من الازاريطة لراس التين بياخد في الشتا خمس او سبع دقايق ، اخد من ساعتين الا ربع ، معلش بس المصيفين ينبسطوا
المهم وصل لراس التين وبلف لاقيت عن نقطة الشرطة الباشا الظابط عامل كمين قدام النقطة
كمين يوم الخميس الساعة 11 في الصيف وعلى الكورنيش
ناقصة امك هي
المهم دخلت في الكمين وطيرتله الكام قرطاس الحمر دول وجريت
الغريب ان لاحد جرى زرايا ولا جاتلي مخالفة هروب على الرخصة
المهم وصلت المستشفى علشان يكمل عليا دكتور الطوارئ ويقولي هنا مفيش مركز حروق ، مركز الحروق الوحيد في الميري !
بس هما قالولي روح الانفوشي ؟
قالي ما هما اي حالة مش عاوزنها بيرموها علينا بصورة اليه
طب والعمل ؟
الرجل عمل باصله وكشف عليها ضغط وسكر ، لقى ضغطها في السما بسبب الحروق ، وقال دي ما ينفعش تطلع بيها وهي كده لازم ننزل الضغط والا حتموت منك
خلاص بقينا بنتكلم على موت احلى حاجة في حياتي بسهولة كده
طلعن ان الغيبوبة اللي كانت بتخل فيها كل شوية بسبب الضغط وكان ممكن تموت في واحدة منهم
المهم الراجل كتر خيره قعد يعالج الضغط وقالي هات من الصيدلية بره المستشفى مرهم حروق اسمه ميبو
جريت جبته ودهنلها منه علشان يهدي الحروق لحين العلاج وفضل يحاول ينزل الضغط بانواع ادوية كتير
الموضوع استمر لحد الفجر وفيها كان ابويا واخويا وصلوا
مرهم ميبو ده يا مصريين يا حضارة مش كام الف سنة صنع في الامارات !
اعلق والا اتوقف ؟
اخدت امي الفجر وروحنا البيت ومحدش عارف يعملها حاجة
انا كنت عاوز اقلها اسف ياما اني مكنتش بره مصر واخدتك معايا ، والله لو كنا في تل ابيب كنت حلاقي حد يسعفك
ده اليوم اللي غير حياني وبدات من اللحظة دي افكر في الهروب باي تمن ومهما كانت الخسائر
طبعا الاسباب توالت والضربات تتالت كان ربنا بيقولي انت عندك بتعمل ايه ؟ انت مقريتش قران قبل كده وعرف رد الملائكة على الظالمي انفسهم وقولهم الم تكن ارض الله واسعة ؟
يعني اللي خلق اسكندرية مخلقش كوالالمبورواستطنبول ودبي ونيويورك ؟
ده سبب سفري خفت بقه تتكرر ما كل اللي بحبهم بسبب اصراري الغبي على عدم الهجرة
ولو عاوزين تعرفوا بقية الحكاية ، تاني يومالصبح رحت انا ومراتي نطمن على امي ، ومراتي كانت حامل في الاسبوع الخامس ، مراتي شافت امي فضلت تعيط لحد ما جلها نزيف وفقدنا الطفل قدر الله وما شاء فعل
ابويا اتصل بمركز الحروق في الميري وعرف اسم الدكتورة رئيسة المركز ولقى ان ليها عيادة خاصة ولله ااحمد امي اتعالجت في العيادة دي
وهي الحمد لله دلوقتي تمام وزي القمر ربنا يبارك فيها
معظم اللي بيسالني سفرت ليه اقوله بسبب عدة اسباب فيقولي قولي سبب فيهم ، احكيله القصة دي يقولي بس كفاية مش عاوز اسمع حاجة تانية كفاية قوي دي
فاعتقد كفاية كده رد على اول سؤال ليكي ، هجرت ليه