سبحان الله ربنا خلق للانسان 5 حواس وفي ناس بتقول في حاسة سادسة لكن مش موجودة عند كل الناس
انا بعتبر نفسي محظوظة لان ربنا وهبني الحاسة السادسة
في مواقف كتير بتمر عليا بشعر فيها بالحاسة السادسة شغاله
يعني مثلا احيانا كتير ومن ضمنها امبارح بشعر ان في حاجة مش كويسه هتحصل مش موضوع تفاؤل وتشاؤم لكن احساس واحيانا بشعر ان حاجة كويسه هتحصل
وطبعا الاحساس ده بيقلقني وكنت احيانا بتراجع عن فكرة الخروج لما يجيلي الاحساس ده واحيانا بدعي ربنا سبحانه وتعالى بالستر واتوكل عليه واخرج

يوم حادثة الفرامل اللي سابت مني وخبطت الكورلا جالي الاحساس ده وامبارح كمان
لما بيجيلي الاحساس ده وادعي ربنا بالستر بيكون وقع الحدث اخف على نفسي وديما اقول لو مكنتش دعيت ربنا يمكن كان الموضوع يكون اكبر
يعني قدر ولطف


انا فاكرة لما كنت في الحج مع زوجي وفي رمي الجمرات للمرة الثانية الشيوخ اقترحوا علينا ان النساء تبقى بمنى والرجال يرموا عنهم
كان قلبي مقبوض اوي وخايفه على زوجي من الحوادث اللي بنسمعها من دهس الحجاج بالاقدام
بقيت اقنع نفسي ان مفيش حاجة هتحصل واقول منا روحت معاه اول مرة لرمي الجمرات ومكنش الموضوع مقلق بالصورة اللي بنسمعها
وفضلت ادعي ربنا يستر عليه ويحفظه ويرجعه بالسلامة
وفضلت واقفه برة الخيمة في منى منتظراه ... ولما وصل بالسلامة لاحظت عليه ان في حاجة مضيقاه .. قالي ان كل الفلوس اللي معاه اتسرقت
والله قعدت اضحك وحمدت ربنا وقلت له احمد ربنا انها جات على اد الفلوس
كان مستغرب من موقفي ومعتقد اني هزعل
فحكيت له اني كان عندي احساس ان حاجة وحشة هتحصل وان الحمد لله انها جات على فلوس وقلت له اني عامله حسابي في فلوس معايا ومعايا ذهب لو اتزنقنا نبيعه


امثلة تاني للحاسة السادسة عندي
احيانا بكون بكلم اصدقاء لي على الماسنجر ويجيلي احساس بشكل المكان المحيط بيهم وملابسهم ولما بوصفهم بيطلع احساسي صح
لدرجة ان شخصية منهم اعتقد اني هكر واني شغلت الكاميرا من غير ما يعرف

مرة كانت صديقة لي مسافرة اوروبا والمفروض انها تتصل بيا لما توصل علشان اعرف رقمها وفضلت كذا شهر مفيش اتصال
وفي يوم كنت زعلانه منها اوي لانها متصلتش وكنت بعاتبها بيني وبين نفسي مش هتصدقوا ان في نفس الوقت لقيت رقم غريب بيرن عليا
بحثت عنه في النت اشوفه بيتبع اي دولة اوربية ولقيته فعلا تبع البلد اللي سافرتها

اصدقائي المقربين اللي عارفين عني الموضوع ده بيقولولي انتي يتخاف منك ههههههههههه


ممكن تشاركوا معايا بمواقف غريبة مرت عليكم بسبب الحاسة السادسة