بخصوص اللانوس .. م. محمد ممدوح

انا معايا لانوس 2 -2008 ركبت جنوط اسبور و عرضت الكاوتش بقى 14 بدل 13 و الكاوتش 185/65 بس عندى مشكلة لما بيكون ورا في تقل فى العربية و اخد مطب او حتى عالى و واطى فى الطريق بسمع الكاوتش حك فى حاجة مش عارف دة الرفرف و لا الكاوتش بيحك فين و الحل اية و دة غلط انى كبرت العرض ل14 ...؟؟

و كمان عايز اسال اية امكانية انى اركب فلتر و مساعدين رياضية ؟؟؟؟
ومنين و بكااام و فيين اعملها؟؟؟؟؟؟؟

و اركب زينون و اسبيلر و اعمل المرايا اليمين كهرباء ولا بلاش العب فى كهرباء العربية و برضة منين و بكاااام؟؟؟؟؟

و لكم الشكر مقدما..

بص يا باشا بالنسبه لصوت الحكه ده من الشفه بتاعت الرفرف الكاوتش بيحك فيها

روح لاي سمكري خاليه يتنيلك الشفه ديه لجوه وان شاء الله مش هاتسمع حكه تاني

واستني ممدوح ان شاء الله بارضو يفيدك اكتر منى

اعتقد ان مقاس الكوتش مش مظبوط اصلا لو الاستوك عندك كان 175/70/r13 المفروض هيبقى 185/60/r14و بالنسبة للحكة بتكون في الرفرف الحل لو في عندك امكانيه تغير الكوتش يكون افضل يا اما تروح لسمكرى يتنيلك شفه الرفرف عشان ميحكش في التحميل او مطبات الهوا الفلاتر هتلقيها عند بتوع الاكسسورات وفى انواع كثير اشهرهم الكى اند ان والسيموتا والاسعار بتتراوح من 150 لحد 450 تقريبا وبالنسبة للمساعدين مش متاكد في ولا لأ اللى اعرفه ان ليها سوست رياضية تعمل حوالى 1000 جنية والمرايا تقريبا بتتعمل بتشترى مرايا يمين تكون كهربا ولو مش نفس لون عربيتك ترشها وتشوف كهربائى نظيف يركبهلك بالنسبة لسعرها مش عارف الصراحة يعمل كام واستنى برضه رد محمد بك ممدوح

مقاس الكاوتش مش صح... المقاس الصح 185/60/14 بالتالى الكاوتش اللى عندك كبير و بيسبب الحكة

الفلاتر موجودة فى اماكن كتير و اضلهم الK&N يليه الsimota و الاسعار زى ما تفضل الزملاء ووضحوها

بالنسبة للثبات ممكن تركب طقم سوست Apex و فيه طقم معروض للبيع جديد نوفى لو عايز

MMamdouh

انا بشكر كل الاخوة اللى اتفضلوا بالرد عليا

ممكن اعرف بس سعر السوست دية كااااام يا باشا و نوعيتها اكيد كويسة لانك متخصص

طيب بس فائدة السوست اية و هحتاج اركب حاجة تانية علشان الثبات يعنى تغير عفشة او ماشابة و للعلم السيارة ماشية 40.000

طقم سوست الApex للانوس بيعمل 1100 جنية بس انا اقدر اكلملك الراجل اللى عندة الطقم اللى حكيتلك علية و اخدة ب 1000 مقفولة... و الطقم دة مركبش خالص فى العربية

الApex من الماركات العالمية المحترمة فى مجال صناعة السوست الرياضية و ناس كتير بتشكر فيها

السوست دى اقصر من الاصلى شوية و بالتالى بتقرب مركز ثقل العربية من الارض و دة بيزود الثبات فى الملفات دا غير انها انشف شوية و دة برضة بيزود الثبات

ميزة السوست السبور عن قص السوست و الافلام دى ان السوستة مبتبقاش ناشفة بغباء يخللى العربية تتنطت لو اخدت مطب... السوست دى بتبقى معملة بحيش انها كل ما تنضغط كل ما تنشف و بالتالى لو ماشى عادى و بتاخد مطب مش حتحس انك بتتهبد لكن لو دخلت ملف قاسى على سرعة العربية حتمسك نفسها و مش حتطوح... ايهاب بوب قاللى انة بياخد غرز من اول حارة لرابع حارة على الدائرى على 170 بدون مشاكل (طبعا دة جنان رسمى بس انا عايز اوضح الفرق قبل و بعد السوست)

معتقدش عند 40 الف حتكون مساعدينك تعبت... انما لو عايز حاجة كويسة و فى نفس الوقت متضلعكش مبلغ هلامى يبقى هات طقم مساعدين مونرو غاز على زيت مع السوست.. دول انشف من الاصلى و معاهم ضمان سنة... انا مركبهم فى عربيتى و ما شاء الله الدنيا اتغيرت عن زمان

MMamdouh

بعد إذن ممدوح بيك... انا لسة مركب عندى كاوتشات نفس المقاس اللى انتا مركبه... والصوت اللى انتا بتسمعه هوا صوت الدلايات اللى ورا.. بس انا اراهن ان عربيتك دلوقتى مبقتش تحك فى المطبات زى الأول
وممكن تدخل هنا هتعرف أكتر فى تجربتى
http://www.nilemotors.net/Nile/showthread.php?t=79150