موقف منيل على الصبح مع لجنه المرور

**Ashraf_Ashraf** · 10-06-2009 03:10 PM

ياجماعه وربنا انا خلاص قربت افرقع من الغيظ ايه دا هو احنا عبيد ولا ايه بالظبط فى نظر الحكومه
الصبح دورت العربيه وخرجت رايح شغلى وانا حاطط ابتسامه على وجهى واملى فى يوم جميل وسميت الله واتحركت
وشغلت اخبار ال bbc اعرف اخبار الدنيا المهم وصلت لميدان السواح علشان اوصل منه لاقصر مسافه للكورنيش
المهم قابلت لجنه وقفت بمنتهى القرف رخصك ( نسيت اقولكم انى شنطتى بحطها فى شنطه العربيه مش بحبها جبنى ) قلتله حاضر اركن على جنب وانزل اجيبهالك من شنطه العربيه
بصلى بمنتهى الغيظ وقال يعنى ايه فى شنطه العربيه انت كده هتعطل المرور ويعنى ايه متحطهاش فى جيب سعادتك
قلته هو انا حطهها فى عربيه تانيه ولا بقولك هجيبها من البيت شنطتى محطوطها فى شنطه العربيه قالى المفروض تحطها فى جيبك قتله اللى فرضه انت ليك الرحض وقت ماتطلبها وانا بقولك الرخص ورا طبعا ردى معجبش البيه قالى اركن لى على جنب جيت اركن فضل ماشى قدام العربيه كانه قفش عربيه سارقها حرامى نولت جبت الرخص من الشنطه بص ليها وبصى لى ( خدوا بالكم قوى بقى من اللى جى )اول حاجه قالى الرخصه مكتوب فيها بنظاره طبيه
وانت لبس نظاره شمس رحت ضحك قلته مادى نظاره طبيه بس غامقه علشان الشمس بتتعبنى قالى ممكن اشوف البطاقه ( البطاقه متصور بدون نظاره حسب تعليمات السيد مدير السجل المدنى مش عارف ليه ) قالى الله هو انت من غير نظاره ليه بصراحه ابتدى دمى يلغى قلتله وحضرتك مالك ومال البطاقه انت ليك رخص العربيه والسواقه والعنوان واحد فيهم قالى لا انا اشوف اللى يعجبنى ويجى على مزاجى وعلى فكره انا ممكن اشك فى الرخص واعتبرها مش مظبوطه وهتتعبك قوى
قلت له على فكره انت ناسى اننا فى مصر قالى يعنى ايه قلته يعنى حضرتك هتعمل اللى انت عاوزه وانا هتصل بواسطه هتخلص كل حاجه فنقصر المسافه عاوز تسحب الرخص اسحبها ومش عاوز ايصال غير كده مش ليك عندى شئ فضل يبصى لى وكان فى بنا تار قعد يلف حوالين العربيه كانه بيدور على اى شئ يمسكه ( لو اصف لكم شكله ياجماعه انا لو يهودى استحاله هيتعامل كده ) الاخر رمى لى الرخص ومشى
وضاعت الابتسامه وضاع اليوم كله كره فى البلد وفى القرف اللى الواحد بيشوفه وبيقاسيه من ناس المفروض بتحمى البلد مش بتكره الناس فى بلدها
مشيت وانا بفكر جديا فى السفر بره مصر وعدم العوده ( مش هقول هجره لان معدش فى بلد بتقبل بسهوله الهجره) ومش عارف ليه الحكومه بتعاملنا كده زى مانكون مرض ولا جرب وكانها بتستكتر علينا العربيه اللى من شقانا وتعبنا

**Abo.Omar** · 10-06-2009 03:18 PM

هو دا الاسلوب اللى ينفع معاهم بجد
ولو سألك تانى فالحوار بتاع النضاره قوله لبست لينسيز وحط صوابعك فعنيه
وبعدين يا راجل دا انت اسهلك تحط الشنطه جمبك بس وخلاص

**ahmad7610** · 10-06-2009 03:19 PM

أعتقد الموقف ده بنتعرض له كلنا .. والحمدلله انه ملقاش حاجة يتلكك بيها زى كشاف أو رفرف مخبوط .. ( أمن ومتانة )
والحمدلله إنه معطلكش أكتر من كده .. وأعتقد حضرتك يفضل تسيب الرخصة فى جيبك .. علشان تمشى الأمور أسرع

**M.Mostafa80** · 10-06-2009 03:21 PM

معلش يا أش هى البلد أصلا بقت حاجه لاتطاق بس والله في منهم محترم وولاد ناس المصيبه بقى فى ولاد تجار الخضار والفاكهه والمخدرات اللى دخلوها بفلوسهم اللى ما تعرفش جايه منين تصدق وتأمن بالله أنا اخويا بيحكيلى أنو فمره شأت الظروف أنو يجتمع بواحد لسه فى الكليه فابيقولولو أنت دخلت ليه ردج عليه عشان أطلع 000000000أم الناس واعمل اللى أنا عايزه تخيل بقى
وطبعا النوعيه دى عندها نقص ومش متربيه بس أنا بقى ربنا كرمنى فى مره وقابلت واحد من ولاد الناس دول
كنت عامل الشرعاتين الخلفيين اللى فى البيبان فاميه فوقفنى قالى حضرتك الفاميه ممنوع قلتلو بس أنا مش عامل العربيه كلها يعنى قالى معلش بعد أذنك ياريت حضرتك تشيلهم عشان الرخص ما تتسحبش رديت عليه قلتلو عشان زوقك وأدبك هشيلهملك دلوقتى وفعلا قمت مخربشهم الأثنين عشان مكنش ينفع أشيلهم

**Ashraf_Ashraf** · 10-06-2009 03:21 PM

مشكورين لردكم بس صدقونى بالله العظيم انا كنت قبل الموضوع ده علشان معطلش نفسى احط دايما الرخص فى جيبى
لكن بعد اللى حصل استحاله هطلعهم من الشنطه لجيبى
بصراحه الواحد اتخنق خلاص

**ABDULLAH AHMED** · 10-06-2009 03:25 PM

يا باشا ولا يهمك انت بس خليك دايما مبتسم للحياة
وبعد كده الناس دولا اقذر خلق الله واحنا لازم نتعود على كده

بس بجد انت كلامك معاه 100% واحلى جملة

قلت له على فكره انت ناسى اننا فى مصر قالى يعنى ايه قلته يعنى حضرتك هتعمل اللى انت عاوزه وانا هتصل بواسطه هتخلص كل حاجه فنقصر

**hossam_elwani** · 10-06-2009 03:53 PM

معلش روق

**A.Saad** · 10-06-2009 06:48 PM

يا راجل
انت دمك محروق على ايه
دانت حرقت دمه ودم اللجنة كلها

يعنى ايه هتعطل العربيات
طيب ماهو برده بيعطلها على ما يشوفها

هوة فاكر نفسه الحاكم بامر الله فى الارض
وعايز يسمع
حاضر
تعليماتك اوامر وكده
لقاك اديته

اضحك وفرفش