تقييم جراند بونتو مانيوال

**loodaa** · 29-06-2009 09:55 PM

اهم العيوب:
صوتها عالي لو ماسيبتهاش تسخن أو تمشي بالراحة شوية الأول و طلعت بيها على طول.
الزجاج الخلفي مش كهربا
مافيهاش فوج لايت
غطاء تانك البنزين الخارجي لايفتح من الداخل مع ان الستروين والاوبل استرا شوفتهم برضة لازم يتفتحوا من برة بس مش متأكد لاني ما ركبتهمش بس ولكن مكان فتحة التانك في مبوزة شوية زي عندي كده.
انا ما كانش معايا عربية قبل كدة بس كنت دايما بركب عربية عمي وهي أفيو فانا شايف ان الجراند أفضل بمراحل من الافيو
أهم المميزات
عزم رهيب للموتور بيجيب 75 على التاني انا سواقتي هادية بس كنت مشغل الكاسيت و مش مركز مع الموتور ولما بصيت على السرعة لقيتها تقريبا 75 فجيت أنقل رابع فوجئت انها على التاني مش التالت و كان لسة في في الrpm بتاعها شوية بالرغم من ان العربية كانت محملة واحد زيادة فوق الخمسة.
بالنسبة لل3.1 لتر فده من كمبيوتر العربية و كنت على البحر عملت reset له و قيستها لكن استحالة اقيسها يدوي او من أول ما أطلع لان اقصى سرعة متوسطة عملتها من أول ما أطلع لحد ما أروح كانت 32.7 كيلو متر في الساعة دا أنا حتى لسة فاكر الرقم لانه لم يتكرر من ساعتها في الزحمة الجميلة اللي فيها البلد دلوقتي

**Ahmad Aboul Fotouh** · 30-06-2009 10:36 PM

شكرا يا باشا
انا كنت انهارده في معرض اوماترا اللي في الدقي , العربيه الصاج بتاعها محمل و شكلها تقيلة
بس للاسف ضيقة من ورا و لو شالت 3 هيبقو مزنقين و كمان سقفها واطي من ورا يعني تقريبا راسي كانت لامسه السقف
الصدمة بقة اني سألتهم عن سعر تيل الفرامل المهندس قالي 420 جنيه وسير الكاتينة قاللي 200 وحاجه ولازم يتغير هوه وطقم السيور والشدادات بعد 40 الف كيلو يعني حسبة 200 جنيه

وفي زميل في المنتدي هنا في موضوع تاني قال ان الفانوس الامامي بألف جنيه

أنا كنت ناوي اجيبها بس دلوقتي متردد
إيه رأيكو؟؟

**blazer** · 30-06-2009 10:49 PM

اولا مبروك على العربيه
بس كنت عاوز اسال حضرتك عن ارتفاع العربيه لو هى محمله على الاخر بتحك فى المطبات ولا ايه نظامها ؟
التوكيل مستواه ايه فى الصيانات ؟
العربيه مريحه فى القياده فى المسافات الطويله ولا ممكن تتعب ؟

**loodaa** · 01-07-2009 12:31 AM

بالنسبة لو العربية محملة على الاخر و نفر زيادة ما بتحكش في المطبات و عن تجربة في كذا نوع مطب من أول الحديد الصغير لحد المطبات المصبوبة يدوي في الشارع بدون معايير ولا علامات ولا حاجة.
قطع الغيار انا قولت اني ماأعرفش أسعارها بس اللي أعرفه انها معمرة و بصراحة انا شايف ان معظم العربيات قطع غيارها غالية بس انا ببص في العربية لحاجتين هل هي موفرة في البنزين ولا لأ وهل هي مريحة في المسافات الطويلة ولا لأ ودول موجودين في الجراند.
نصيحتي ليك شوف العربيات اللي بتنافس في نفس السعر و اركبهم واللي تشوفه مريحك أكتر اشتريه لأن لازم تكون مقتنع بالعربيه عشان ما تشتريش حاجة و تندم عليها.
بالنسبة للصيانة انا اسمع انها محترمة وان مفيش اكراميات ولا الهجص ده وان في احترام في الشغل. وده من ناس راحوا الصيانة هنا في المنتدى.

**ilavm** · 07-07-2009 01:34 PM

ايه اخبار ال stability عالسرعات العالية مثلا 140او اكتر ولا مجربتش اصل انا سقت اللانسر بوما بعد ال140 كنت خايف جدا وحاسس العربية هتتقلب خفيفه جدا

**loodaa** · 07-07-2009 02:11 PM

انا أقصى حاجة كانت ملف ابن لزينة عند مكتبة اسكندرية وانت رايح على بحري و أخدتة على 90 كيلو بس العربية ما طلعتش من الشريط بتاعها لكن انا جوة العربية لولا الحزام كان زماني بقيت في الكرسي اللي جنبي هههههههههه.
بجد استابيليتي عالية جدا بس انا مش ناوي أكرر التجربة دي تاني ههههههههههههههه

**tahayt** · 11-07-2009 12:24 PM

1000 شكر يا باشا بس عاوز اعرف العربية دى بتاخد بنزين 92 ولا 95 اية اللى ماكتوب فى الكتالوج و اية اللى حضرتك بتستعملة

**loodaa** · 12-07-2009 01:22 AM

الكاتالوج مكتوب فيه 95 بس انا في المعرض قالولي 92 عادي وانا شغال حتى الان ب 92

**monsif** · 12-07-2009 02:53 AM

المشاركة الأصلية كتبت بواسطة ahmad aboul fotouh

شكرا يا باشا
انا كنت انهارده في معرض اوماترا اللي في الدقي , العربيه الصاج بتاعها محمل و شكلها تقيلة
بس للاسف ضيقة من ورا و لو شالت 3 هيبقو مزنقين و كمان سقفها واطي من ورا يعني تقريبا راسي كانت لامسه السقف
الصدمة بقة اني سألتهم عن سعر تيل الفرامل المهندس قالي 420 جنيه وسير الكاتينة قاللي 200 وحاجه ولازم يتغير هوه وطقم السيور والشدادات بعد 40 الف كيلو يعني حسبة 200 جنيه

وفي زميل في المنتدي هنا في موضوع تاني قال ان الفانوس الامامي بألف جنيه

أنا كنت ناوي اجيبها بس دلوقتي متردد
إيه رأيكو؟؟

فى رأيي تشتريها
رغم أنها ديقه من ورا شويه لكن مظنش أن فى أى عربيه سعرها ب100 ألف بتاخد 3 ورا مستريحين
هو سعر تيل الفرامل غالى شويا بس بس هو حجم التيل أكيد هيكون أكبر من بتاع النيسان صنى اللى هو ب 280 جنيه
لو على ال200 جنيه كفايه أنك هتكون راكب عربيه تستاهل 200 ألف ب 100 ألف
الفانوس الأمامى غالى علشان فيه موتور و ده سعر معقول فى رأيي