الموضوع: تقييم جراند بونتو مانيوال

انا بتكلم عن المانيوال العادية مش باكدج 2

أولا: الشكل الخارجي
من ينظر الى الجراند بونتو يشعر بجمال الشكل ونعومة وانسيابية ملامحها حيث تمتلك شكلا خارجيا كما لو كانت ميني مازيراتي وهو ما لا يوجد في معظم السيارات في نفس الفئة اللترية أو السعرية.
ثانيا: المواصفات
الموتور 1400 سي سي 77 حصان عند 6000 لفة بعزم 115 نيوتن عند 3000 لفة
مرايات كهربا
زجاج كهربا أمامي فقط ( من أهم العيوب)
باور بنظام سيتي ( تحفة)
كاسيت أصلي مع العربية مع التحكم بذراير في الدركسيون ولكن audio فقط مش mp3 وده عيب و ميزه لأن المفروض ان يشتغل عليه السيديهات الاصلية مش المنسوخة بس ممكن يركب auxiliary
مفتاح العربية مشفر بكود خاص يتغير كل مرة يتم فيها ادارة موتور العربية يعني مش حتدور الا لو المفتاح بتاعها بس هو اللى اتحط حتى لو حد طلع عليه نسخة العربية مش حتدور مع النسخة لذلك يجب المحافظة على الكود الخاص بالمفتاح والذي يتم تسليمه مع أوراق السيارة.
الكاسيت برضة مشفر و مش حيشتغل الا لو اتوصل بالسيارة بتاعته بس.
أربع سماعات على كل باب سماعة و اتنين تويتر( نظام سماعات أكثر من رائع وممكن تعليهم زي مانتا عايز و الصوت مش حيتأثر بس ما تحاولش تعليهم عن عشرين الا لو عايز الشارع كله يسمع معاك)
Abs+ebd
الاطارات مقاس 15 و مزودة بجنوط سبور أصلية وعليها شعار فيات الأحمر و لكن الأستبن طاسات عادية.
فتح الشنطة من الداخل بزرار ولكن تانك البنزين من الخارج
شنطة 300 لتر (واسعة بالنسبة لهاتش باك)
تكييف بكر مش تاتش بس جامد جدا
تارة مالتي فانكشن ذات شكل رائع
مساحة خلفية
سنتر لوك من الداخل بزرار و من الخارج بريموتها الأصلي ولكن مافيهوش انذار.
خاصية follow me التي تتيح للسيارة ابقاء النور العالي مضاءا لمدة تصل الى دقيقتين بعد اغلاق السيارة والخروج منها لأضاءة الطريق امام السائق اثناء صعودة الى منزله ثم ينطفئ بعد المدة الزمنية التي قام السائق بتحديدها
تريب كومبيوتر
2 ايرباج
خمس نجوم في euro ncap
ثالثا: التابلوه
عند فتح باب السيارة يضيء التابلوه بلون هادىء و محبب و ينطفيء مع تدوير الموتور.
يتكون التابلوه من عدادات سرعة و rpm ومقياس حرارة المحرك و البنزين كما انة مزود بشاشة تعرض كلا من الاتي:
اذا فتح اي من الابواب تنبة ان هناك باب مفتوح و تعرض مكانه
تعرض المسافة المقطوعة بالسيارة
تعرض التاريخ والوقت و درجة الحرارة
تقوم بعرض متوسط استهلاك البنزين لكل 100 كيلو في الرحلة A أو B حيث ان الرحلة يمكن عمل reset لها وتقوم بالحساب لرحلة جديدة كما يمكن معرفة الاستهلاك اللحظي للبنزين ثانية بثانية لمعرفة في أي وقت يزيد الاستهلاك عن المعقول.
يمكن عرض السرعة المتوسطة للرحلة و زمن الرحلة.
يمكن معرفة المسافة التي يمكن قطعها بالسيارة قبل اعادة ملء العربية بالبنزين.
رابعا: القيادة

الكراسي يمكن تعديل وضعها في اي اتجاه و الدركسيون يمكن تعديل وضعه
فرش قطيفة للكراسي و الخامات نضيفة جدا للتابلوه والكراسي كما ان المساحة الخلفية تكفي لشخص طوله 180 سم انه يقعد مرتاح مع الأخذ في الاعتبار ان اللي قاعد قدام مرجع الكرسي بحيث ياخد راحته هو كمان
يمكن من خلال ذرار menu التحكم في صوت الbuzzer عند التنبية لشيئ معين داخل السيارة
كما يمكن أيضا التحكم في فتح و غلق الايرباج و يمكن تحديد منبه للسرعة حيث يعطي تنبيه اذا تم تجاوز السرعة المحدده والتي يتم ضبطها مسبقا
السيارة تغلق ابوابها أوتوماتيكيا اذا زادت السرعة عن 20 كيلو في الساعة حتى لا يقوم احد بفتح الباب أثناء السير للسلامة.
السحب جامد جدا على السرعات القليلة لكن ما جربتش على سرعة بعد ال100 كيلو ولكن السحب بيقل بمقدار قليل جدا لا يذكر مع التكييف (ساعات ما بحسش ان السحب اتأثر)
التكييف ممتاز كعربية أوروبي المفروض ان تكييفها في الضياع ولكنه بيسقع العربية بس عايز يفضل على اربعة مدة 5 دقايق وبعدين بنزل لواحد أو اتنين و تبقى عايش في ملكوت كما انه مش بيقل لما العربية تكون واقفة.
ذرارair circulation وده بيخلي الهواء اللي جوة العربية يسقع ويرجع تاني وده بيوفر جدا في زمن الوصول لدرجة تبريد معينة داخل العربية ولكنه بمنع دخول fresh air عشان كده يجب الا يستخدم لفترة طويلة.
ما جربتش موضوع الشد لأنى مسالم في السواقة وما بحبش اني أعمل غرز أو أشد مع حد رغم الأستفزازات من العربيات اللي ماشية جنبي خصوصا من بتوع القاهرة والجيزة هههههههههههه
بالنسبة لقطع الغيار لما أروح صيانة ال5000 أكيد حقولكم ايه النظام في الاسعار
الثبات عالي في حدود ال100 كيلو اللي مشيت عليهم بس معرفش بعد كده بس اللي أسمعه انها ثابته جدا جدا ووزنها حوالي 1000 كيلو
الكراسي مرتفعه عن الارض كما يمكن رفعها أو خفضها حسب الحاجة
الروئية الخلفيه مش قد كده يعني مساخة الزجاج الخلفي مش كبيرة بس تشوف عادي لكن مش مستريح
سوف تجد ان قيادة هذة السيارة ممتعة للغلية و سوف تجد مرونة في التعامل و سرعة تجاوب عالية جدا وكأنها فاهمه انت عايز تعمل ايه
بصراحة مش ندمان على شراها.
والله كان نفسي أحط صور بس مش عارف ازاي ارفعها عشان مساحتها كبيرة و أرجوا أن اكون قد وفقت في ذكر المميزات والعيوب و لو كنت نسيت حاجة ياريت تقولولي عليها و شكرا

نسيت اشكرك عالتقييم
ألف شكر بس كان هيبقى 100%
لو بالصور