مطلوب ظبط النفس في القياده

**Mostafa_ENG911** · 13-06-2009 01:20 PM

المشاركة الأصلية كتبت بواسطة omarhelalyehia

أوافقك الرأى تماما بس الموضوع متشابك شوية يعنى أضف الى سوء قيادة الغير سوء حالة الطرق بجد العربية بتصعب عليه أوى كمان الازدحام الغير طبيعى من مختلف انواع المركبات ميكروباص على كارو على تكتك مع مستوى متدنى من الاخلاق و الادب لكن فعلا ابدأ بنفسك

دي لوحدها كارثه, التكتك ده لوحده عايز محرقه زي محرقه اليهود المزعومه...و للإسف دول مش بيراعوا الناس اللي ماشيهجنبهم واللا الركاب ولا اي حد خالص...حسبي الله و نعم الوكيل فيهم

**Mostafa_ENG911** · 13-06-2009 01:22 PM

المشاركة الأصلية كتبت بواسطة se_coralsea

انا عن نفسي بأمشي عدل علشان يحتار بتوع المرور و الميكروباصات فيا
و بأحاول أسيطر علي أعصابي و ما اتنرفزش لتصرفات بعض المتهورين أو الجهلة بقانون أو أداب المرور و بأعمل جاهدا علي أن أكون مثالا و قدوة للاخرين

هو ده اللي ممكن نعمله يمكن غيرنا يتعظ و يقلدنا و يصبح مثلنا

اعتقد إن ده حل ممتاز بس لوحده غير كاف....لأن سواقين الأجره ملهمش قدوة

**M.Osman** · 13-06-2009 03:49 PM

حضرتك بتتكلم في تغيير اخلاق جيل كامل ...

تخيل لما ألاقي واحد في سن والدي جاي في الإتجاه المعاكس و عمال يقلبلي نور و مش عاجبه اني مش راضي اوسعله ... بجد نعمل اية ؟؟ الموضوع محتاج تغيير جذري في الأخلاق و إعدام الفهلوة !

**نور العمر** · 13-06-2009 06:10 PM

الاخلاق بقت في النازل
ولا شعبيات ولا أحياء راقية
الموضوع مش كدة خالص
مبقتش تفرق أمي من خريج ارقى مدارس اللغات
الموضوع بقا عافية وبلطجة
صاحب العربية الفارهة ... شايف نفسه الطريق اتعمل عشانه
وأي عربية حشرة تانية بلاش تقرب احسن
وصاحب الميكروباص الطريق اتعمل عشانه
وإللي يمشي وراه ياخد على كدة وإذا كان عجبه
والاتوبيس العام الطريق اتعمل عشانه
عشان يقف خمس آلاف مرة في ال 100 متر بس
وإذا كان عاجب ... إيه .... حكومة ... تقدر تكلمني
وصاحب الشمال مالوش دعوة لو عربية ظهر فيها حاجة خلاها تبطأ سرعتها ... دي قلة أدب ولازم تتشتم طبعا ( العربية إللي سرعتها قلت )
وصاحب التاكسي بيدفع دم قلبه بنزين مش طايق يقف كتيير ... وهما 3/4 ( غاز طبيعي )
أما المشااااه بقا ... دووول فلة شمعة منورة
اتمخطري يا حلوة يا زينة ..
اكسر يمين اكسر شمال وتظ في الإشارات
عااااااادي جدا
بس الحقيقة

المصريين اتعلمو حاجة مهمة ( معظمهم بيلبس الحزام ولو شكل ) عشان الغرامة
بس السير عكس الاتجاه لسة موجووود .. الوسطة لعبت دورها بردوا

ربنا يخاليلنا مصر والمصريين

إلى الأمام

**Bob2009** · 13-06-2009 07:45 PM

ياجماعه المشكله فى الاخلاق مش اكتر انا صدقونى اتشتم كتير اوى وعارفين كان فيه ناس لما ما اديهمش اهتمام وخصوصا بتوع المكروباص والربع نقل والحجات دى كان يقف قدامى وينزلى لدرجه ان مره واحد كان نازل يتخانق معايا قفلت الزجاج راح بايده فضل يضرب فى العربيه والشنطه لسه اثار ايده فيها طبق الصاج بتاع العربيه فانا لازم اعمل كده لئنى لو معملتش كده مش ضامن ممكن بعد كده واحد ينزلى يعملى ايه مش خوف ولكن حفاظ على المستوى الاجتماعى والاخلاقى يعنى انا واحد محترم هنزل اعمل زى واحد بتاع مكروباص مينفعش لئن اولا اخلاقى لا تسمح لى
واخيرا لازم الشعب اخلاقه تتغير وده صعب لئن انا شايف النهرده ان الصياعه اصبحت هى الاساس فى الشارع المصرى جرب كده وانت ماشى او فى تقاطع او حتى عاوز تمشى بعربيتك هتلاقى الى فى اخر الشارع جرى على شان انتا متتحركش من امامه بمعنى اصح بقت تحدى
وشكرا ليكم

**thegoodhacker** · 16-07-2009 12:00 AM

الشارع المصري اصلا بينرفز الواحد حتي لو ماشي علي رجليه.... فما بالك باللي سيايقين العربيات و طالع عينهم في الزحمة و السواقة البهيمية ؟
انا لسة النهاردة اتوبيس قاطع الشارع علشان يدخل الجراج بتاعه و انا اتفاجئت بيه فاضطريت اقف و ما كانش ورايا حد .... تاكسي جاي علي نفس الصف بتاعي بسرعة مع انه شايف الطريق قدام منه بمسافة كافية فرمل ورايا علي الشعرة و كمان ايه بقي مش عاجبه و عمال يضربلي كلاكسات و نور و بيزعق .... شوف قلة الادب !! جه يطلع من ورايا من كتر غيظي رحت شاتمه .... ما عجبهوش الكلام و قعد يعمل غرز قدام مني علشان يوقفني ........ و الحمد لله انا محترف نيد فور سبيد لما لقيته عمل الحركة دي هديت خالص و بعدت عنه و بعد كده جيت وراه و انتهزت فرصة وجود شارع جانبي كان هو فوته خلاص و رحت ماشي و ريحت دماغي من القرف ده .... بجد حاجة تقرف !!