الموضوع: اسخف موقف عملته العربيه معاك

المشاركة الأصلية كتبت بواسطة horas3000

و فضلت واقف بتاع ساعة لغاية ما الميكانيكي جه و خلال فترة انتظاري اتعملت اسامي الحيوانات من اول و جديد

دول كانو اكبر موقفين مع تعدد المواقف الفرعية من كوتش و كهربا و اللذي منه

ههههههههههههههههههههههه معلش كلنا اتعلمن الاسامى مش انت لواحدك

مع احترامى للكل محدش حصل معاه اللى حصلى
اكسنت 1500سىسى زى الفل اتفرج عليها اتنين ميكانيكيا و تلاته سمكرية قبل ما اشتريها المهم قالوا كويسه تقعد معاك حوالى سنه قبل ما تفتح بقها واتفرجوا على اللى حصل بعد كدا

1- بعد 3 ايام كنت رايح رحله ركنت العربيه فى جراج وركبت اتوبيس الرحله ورحت ورجعت عادى الساعه 4 الفجر ادور العربيه ماتدورش يمين شمال مافيش بعد الفحص اتضح ان البطاريه ودعت قلت الحمد لله كان معانا عربيه تانيه بتاعت صاحبى راكنينها برضه خدت العيال وروحنا فيها ورجعت تاني يوم دورتها زق واشتريت بطاريه جديده

2- بعد اسبوع العربيه كانت بتلت رحت اغير بوجيهات الميكانيكى قالى دى البوجيه معرق زيت قلت ماشى طقم شنبر وتتظبط قعد يبص ويفحص ويمحص قاللى المكنه دى رايحه النار يا تعمرها يا تبدلها المهم العمرة تمت والحمد لله

3-كل دا واحنا لسه فى الشهر التانى كنت مسافر ولقيت العربيه بتحدف فدخلت بنزينه ظبط زوايا ومشيت 2 كيلو وسمعت صوت عجيب بين الـ 90 والـ 110 المهم اتضح انها البلى وغيرته

4- الحمد لله رجعنا من السفر بالسلامه اسبوع كدا ولقيت العربيه بتهبد من قدام ومراجيح من ورا وطبعا انتم عارفين التفسير (المساعدين) اللى قدام حجروا واللى ورا ضربوا زيت المهم قلت اغيرهم دى اكسنت والمساعدين الجوز بـ 300 شغال يعنى
جيت اركب اللى ورا بقيتهم مش مش نافعين قال ايه, العربيه خليجى والمساعدين بيشتغلوا على الغبور بطبق كبير المهم قلبت مصر كلها على جوز خليجى مالقتش غير فرده واحده وكان عاوز يبعها بـ 400 الفرده الواحده المهم الميكانيكى حبيبى قالى هات اتنين بتوع لانسر امامى هيشتغلوا وبعد اللف والدوران جيبت الجوز بـ 550 ما علينا المهم العربيه مشيت

5- وفى يوم وانا ماشى العربيه العربيه بطلت فى ميدان التحرير وقعدت ازق طبعا لحد ما دارت وبطلت قبل كدا فى نزلت كارفور وفوق الدائرى وعند مؤمن بتاع المعادى وكل مره يكون فى وقت اسوء من اللى قبله وكل مره يتضحلى ان القواطيش مملحه واقعد انضف فيها لحد ما زهقت رحت للكهربائى عملى شوية شغل فى الدينامو

6- واخيرا كانت القاضيه
فى يوم جيت ادور الصبحى لقيت صوت غريب وعالى جدا بطلت وركبت المترو ولما رجعت رحت للميكانيكى قالى الكوبلن "ملص" يعنى خرج من مكانه اللى فى الفيتيس المهم ظبطه ورحت ازود زيت للفتيس لقيته بيسرب رحت عملت الكوبلن وزودت زيت مشيت 100 متر وبقيته بيسرب عملت الكوبلن وزودت زيت والمره دى قعد يوم كامل وبعد كدا سرب الميكانيكى قاللى روح لسمكرى يقيس لك الشاسيه لانه كدا شكله فتح وعاوز يترد وهنا كانت النهايه وقررت ابيع العربيه ولو ببلاش وفعلا قفلت الشاسيه وعملنا الكوبلن وبطل يسرب ورحت ركنتها جنب البيت لحد ما اتباعت وخسرت فيها 15.000 الف جنيه المهم انها اتباعت

طبعا الزجاج الكهربا اللى جنبى مكنش بيفتح من 8 شهور وكل ما اصلحه يبوظ ةالتانك والشنطه بطلوا يتفتحوا من جوا والباب الشمال اللى ورا برضه بطل يفتح من جوا والكاسيت باظ والتكييف مش راضى يتشحن بس الكاوتش كان كويس ولكنه اتاكل عشان الفرق اللى كان فى فرده الشاسيه

العجيب ان 99% من اللى حصل مالهوش تفسير منطقى بشهادة الكهربائى والميكانيكى والسمكرى
هتقوللى يمكن بيشتغلوك عشان ماتقلش ماهما اللى اختارو العربيه غلط هقلك لا اللى اختار غير اللى بيصلح واللى بيصلح عارف انه مش لوحده بيشتغل فى العربيه عشان ما يفتكرش انها واقفه عليه ويشتغلنى

على سبيل المثال انا كنت بغير التيل قبل ما ابيعها والواد قعد يركب فيه ساعه مش راضى يركب لما قعد يضرب كف على كف دا التيل بيركب فى دقيقتين
وآخر ماذهق قاللى يابيه العربيه دى راكبها عفريت ودا اللى انا صدقته فى الآخر

حد بقى يحكيلى معناه اصعب من دى

المشاركة الأصلية كتبت بواسطة morieno

مع احترامى للكل محدش حصل معاه اللى حصلى
حد بقى يحكيلى معناه اصعب من دى

اكيد مليون % دى عين يامان لبست صح فى العربيه واكدي الواحد بيحزن قوى لما يكون متعشم خير فى عربيه لسه شاريها وتطلع عينه

العربية السابقة الريتمو العظيمة مرة اتقطع سلك الدبرياج على كورنيش المعادى قدام مستشفى القوات المسلحة و كمان كان يوم حد يعنى مافيش ميكانيكية فاتحين و والدى يوميها كان مسافر السويس فضلت قاعد بالعربية من الساعة 4:30 لحد الساعة 9 بالليل لما والدى رجع من السفر و جاب ميكانيكى يعرفوا من بيته و راحوا هما الاتنين اشترولى سلك دبرياج معرفش منين و اتحركت الساعة 9:30 و أطرف ما فى الموضوع إنى طلبت دليفرى أتغدى من الموبيل و قلت للمحل عربية زرقاء عطلانة فى الشارع قدام المستشفى و جالى بسرعة بصراحة

امبارح وانا مسافر القاهرة الصبح
الزجاج الامامى جاله سرطان وكنت ماشى 110 تقريبا
وفى التحويلة اللى على الصحراوى يعنى مينفعش اركن

فرقع فى وشى الزجاج ولا اكنه انفجار بفعل الهوا طبعا
فضلت ماشى التحويلة كلها والدم والزجاج مغرق العربية لحد ما ركنت بعد التحويلة وشيلت الزجاج المكسر من عليا

ورحت ركبته فى الريست
كان اصعب يوم فى حياتى
بس الحمد لله على كل شىء

المشاركة الأصلية كتبت بواسطة jisso82

ا و أطرف ما فى الموضوع إنى طلبت دليفرى أتغدى من الموبيل و قلت للمحل عربية زرقاء عطلانة فى الشارع قدام المستشفى و جالى بسرعة بصراحة

ههههههههههههههههههههههههه هه
ممكن تليفون المحل ده علشان الواحد لما يعطل اهو يتسلى برضوا بحاجه

المشاركة الأصلية كتبت بواسطة ash_rsi

اكيد مليون % دى عين يامان لبست صح فى العربيه

الحمدلله بس بجد انا كنت مفكر انى هعيش يومين حلوين (كامله مانيوال تكيي وباور وزجاجا كهربا) طلعوا يومين ما يعلم بيهم الا ربنا

على فكره نسيت اضيف علبه الدركسيون بوشة قبل ما ابيعها