اسخف موقف عملته العربيه معاك

**hamedo0** · 14-06-2009 01:03 PM

طيب شوف الموقف ده
انا الصيف القبل الفائت طلعين مرسي مطروح بعربيت جوز اختي وهوبا عند بلد اسمها الضبعه اكس الفي الكرونه اتكسر وطبعا مافيش حد في مرسي مطروح عنده قطع غيار فيات علي فكره العربيه كانت 132 1600 واعقد اسبوع المصيف بصلح في العربيه غير بيات ليله علي الطريق ولما رجعنا حلفت ما انا ركبها تاني لحد متباعيت

**sha2e** · 14-06-2009 02:37 PM

اسخف موقف حصلى فعلا كنت نازل من كوبرى 6 اكتوبر من منزل رمسيس وتحت التمثال بالظبط ولاقيت العربية ميلت مره واحده نزلت ابص لاقيت العجله على الارض ( متجيش تتخرمى الا هنا فى ازحم مكان لا وجه الارض ) طبعا كان الطريق وقف علشان الحته دى كانت يدوب بتعدى عربيتين بالعافيه اضطريت انى ازقها بتاع تلات اربعه متر كمان علشان الطريق يبدأ يتحرك عربيه بعربيه وطول ما انا بغيرها كل واحد يعدى يروح باصصلى البصه كأنها سهم على مغيرت العجله كنت كرهت نفسي وخصوصا بعد ما اكتشفت انى كلى عباره عن شحم اسود من العجل

بعديها خدت العجله عشان اشوف المسمار صاحب السبعتلاف سنه حضارة الل عمل فيا كده
راح الرجل مطلعولى مسمار مسمار يعنى بتاع 10سم ومتنى عشان يخرم خرمين
كان نفسي اشوف اللى رمى المسمار ده جنب تمثال رمسيس اشوفة بس

**Ashraf_Ashraf** · 14-06-2009 04:44 PM

ايه ياجماعه محدش عاوز يشترك معانا ولاايه

**E30power** · 14-06-2009 05:28 PM

كانت العربية لسة زيرو ومعدتش ال 100ك وطبعا الفرحة مش سايعة البيت كلو علشان اول عربية نجيبها وكدة
المهم انا الوحيد الى بسوق فى البيت وكنت باخد العربية واعيش حياتى بس قريب علشان كنت لسةمطلعتش الرخصة .. لمين شمال تخميس وتحفير وبتاع وهوووب مفيس دبريااااج
طب ازاى والعربية زيت مش سلك معرفش طب دية لسة جديدة وصوتى ياما على حظنا وغبائى
بقيت كل شوية ازود زيت والاقية ينقص مفيش امل ولا سعاد حتى
المهم رحنا لواحد ماسك مكانيكا الدايو عندنا طلعلنا سواق ورحنا ابو رواش بيها وقالوا هيبيتوها!!
طب نرجع ازاى مواصلات مفيش حتى معزة نركبها علشان نروح سبناهم ومشينا وروحنا وانا رايح احاسب المكانيكى على السواق واحد ابن حلال كان واقف جمبة سمع الحكاية والظاهر صعب علية شكلنا وفتح الكبوت قعد 5ثوانى وطلع وبيضحك ويقولى خلصت يا باشا!!!!!!! بحسبو بيهزر ببص الاقى مسمار الهوااااااااا مكنش متقرط علية
من كتر الفرحة كان هاين عليا اديلة العربية
ههههه واديتة اتنين ج والسواق خد 100لحلوح
وطبعا العربية اتركنت تحت البيت وقعدنا نتفرج عليها من البلكونة
والى شلنى كان ناقصلى 11 يوم واطلع الرخصة ورحت اجرت عربية كحيانة امتحن بيها والحمد الله طلعت الرخصة من غير واسطة(دية حكاية لوحدها) وجالك اليوم الى تتركبى فية يا لانوس....شكلى طولت عليكوا واتخنقتوا

**EslaM_NagY** · 14-06-2009 05:37 PM

المشاركة الأصلية كتبت بواسطة نور القمر

اسخف موقف
المرحوم بابا كان بيرفض يركب معايا مهما حصل
واثناء مرضه حطيته مرة قدام الامر الواقع وركب معايا علشان ياخد جلسة اشعاع
وتيجي العربية تقف مني في نفق شارع مراد واحنا مروحين ولاول مرة تعمل الحركة دي
وياعيني بابا زق معايا علشان نركنها يمين وفتحها معرفش مشكلتها
روحت جبت كهربائي كانت اشتغلت من غير ما يعمل حاجة
طلعت وصلة البطارية بتلمس واشتغلت لوحدها
ماغير بس تسببت في تعب المرحوم بابا زيادة
لا حول ولا قوة الا بالله وحكمتك يا رب

الله يرحمه

المشاركة الأصلية كتبت بواسطة jisso82

العربية السابقة الريتمو العظيمة مرة اتقطع سلك الدبرياج على كورنيش المعادى قدام مستشفى القوات المسلحة و كمان كان يوم حد يعنى مافيش ميكانيكية فاتحين و والدى يوميها كان مسافر السويس فضلت قاعد بالعربية من الساعة 4:30 لحد الساعة 9 بالليل لما والدى رجع من السفر و جاب ميكانيكى يعرفوا من بيته و راحوا هما الاتنين اشترولى سلك دبرياج معرفش منين و اتحركت الساعة 9:30 و أطرف ما فى الموضوع إنى طلبت دليفرى أتغدى من الموبيل و قلت للمحل عربية زرقاء عطلانة فى الشارع قدام المستشفى و جالى بسرعة بصراحة

مش قادر امسك نفسى ههههههههههههههههههههههههه هه

المشاركة الأصلية كتبت بواسطة ahmedfawzy14

امبارح وانا مسافر القاهرة الصبح
الزجاج الامامى جاله سرطان وكنت ماشى 110 تقريبا
وفى التحويلة اللى على الصحراوى يعنى مينفعش اركن

فرقع فى وشى الزجاج ولا اكنه انفجار بفعل الهوا طبعا
فضلت ماشى التحويلة كلها والدم والزجاج مغرق العربية لحد ما ركنت بعد التحويلة وشيلت الزجاج المكسر من عليا

ورحت ركبته فى الريست
كان اصعب يوم فى حياتى
بس الحمد لله على كل شىء

حمدا الله ع السلامة