-
تقرير صيانة ال 25 ألف
حجزت يوم الأربع اللي فات صيانة الخمسة و عشرين علي إني أعملها إنهاردة صباحاَ
و لأن كنت مشغول جداَ الفترة اللي فاتت للأسف معملتهاش في معادها أوي
كنت ماشي زيادة 1400 كيلو يعني 26400 كيلو
و مشيت عالزيت 11400 .. بس انا كنت بكشف عليه هو منقصش من ساعة ما إتحط
و لونه كان كويس جداَ كنت حاسس إن ممكن أمشي عليه كمان كتير ! و لزوجته كانت كويسة
الزيت اللي كان محطوط كان زيت شيل الترا هيلكس .
المهم رحت رحلة العذاب إلي العبور و أخدت الدائري كله من أوله لأخره (مشوار علقة)
وصلت و سلمت العربية عالباب .. المركز كان زحمة شوية .. كان فيه ماروتي زرقة راكنة قدامه و حاطة ستيكر نايل موتورز مش عارف بتاعة مين .
بعد نص ساعة كدة كان مهندس عمرو الهضيبي فضي .. و أول مرة أتعامل معاه بصراحة لكن هو شخصية ذوق جداَ و بشوشة و كان متعاون جداَ .
ملاحظاتي عالعربية اللي قلتهالخ و طلبت تتعمل :
1- صوت غريب ظهر عند كبس البنزين أثناء تشغيل التكييف و انا دايس عالدواسة بحس إني دايس علي رقبة واحد و تسمع صوت حد بيطلع في الروح .. و لقيتها مرتبطة بالتكييف فا طلبت الكشف عليه .
2- شخللة عامة في العفشة و تهبيد في المطبات خاصة في العفشة الأمامية .
3- كنت عايز أوطي سينسور الإنذار لأنه إبتدي يصدعني انا شخصياَ ما بالكم اللي في الشارع .
4- الدلاية اليمين واقعة كالعادة و الكارتيرة مدلدلة شوية .. و كل كلبسات الكارتيرات التانية واقعة .
5- صوت صفارة عالسرعات العالية .
6- طلبت وضع 3.1 زيت فقط لا غير .. و مهندس عمرو عمل إتصال و قاللي أصل إحنا بنحط 3.8 .. و اللي كلمه قاله لأ حط 3.1 مفيش مشاكل .
عند تسليم السيارة قلتله أوريك صوت التكييف .. إن الصوت يطلع !! أبداَ .. مش عارف إيه لعنة مركز العبور إن أي عربية فيها عيب أول ما بتخشه بتتعلم الأدب .. بس انا أكدت عليه و قلتله إنه صوت بيظهر كتير و كان لسة شغال و انا جي في الطريق .
العربية دخلت و إترفعت .. و نزلوا الزيت القديم و ربطوا العفشة و رشوها بشوية حاجات كدة قالولي إنها مضادة للصدأ .. و تقريباَ زودوا مياه الريدياتير مكنتش شايف أوي .. و عملوا شيك عالكهربا .. و بعدين جابوا 4 زجاجات موبيل وان مقفولين .. و حطوا تلاتة و قاسوا الزيت .. و ندهوا لمهندس أحمد عبد الوهاب يشوفها (مكنتش كلمته أو يعرف إنها عربيتي ولا قلت لحد نايل موتورز ولا حاجة أو جروب السيريون علي فيس بوك) .. و فتحوا العلبة الرابعة زودوا منها "سيكا" كدة .. و قاسوا الزيت تاني و العربية طلعت .. تم توطية سينسور الإنذار .. و تركيب الكلبسات و الدلاية المرة دي بإتقان شديد غير أي مرة! حسيتهم ثبتوا كدة، و عدلوا الإكصدام شوية أصل حامل الإكصدام عندي مكسور، ثم تم الكشف عالتكييف .
النتائج : 1- طلع عندي عيب في الكمبروسر فعلاَ هو سبب الصوت اللي بيظهر و هيتم تغييره تبع الضمان فيما بعد لأنه مش موجود .. و قالولي إني محتاج أغير علبة الدركسيون برضه لأنها سبب صوت الشخللة (التعديل إياه) .. و إتعمل ريكويست بإسمي بالكمبروسر و علبة الدركسيونو اما يوصلوا هيكلموني .
تم تغيير فلتر الهواء لأني مغيرتوش في العشرين عشان حالته كانت كويسة .. و العربية صوتها هدي و بقت أنعم كتير مع الزيت المزبوط و الفلتر الجديد و النتشة اللي في الغيار الأول راحت و بقت جراية أكتر .
صوت الصفارة كانت سببه عدم تغيير فلتر الهواء .
الإجمالي بتاع الفاتورة 514 بالخصم .. بعد الضريبة و الذي منه .. حساب الزيت لوحده 205 جنيه فقط .
أبو رواش المفروض هيفتح أول الشهر الجي .. و نترحم من علقة العبور .. إن شاء الله الصيانة القادمة هناك (هتيجي هوا دنا خلاص قربت علي 27!) .. و أعمل التعديل و تغيير الكمبروسر هناك .
فلتر الهواء القديم إتحط في علبة الجديد و حطوه في شنطة دايهاتسو و إدوهوني .
-
أه .. السبويلر الأصلي وصل ممكن اللي gl أو xl و عايز يركبه
دخلت قطع الغيار أسأل علي سعره بقوله سبويلر السيريون بكام
قاللي ألفين و حاجة إستني هشوفلك .. قلتله بسسسسس .. شكرااااَ بلاش أتعبك معايا
عصاية الإريال إتسرقت مني أو ضاعت مش عارف .. المهم سألت عليها برضه
سعرها 208 جنيه .. انا هركب دش أحسن لإستقبال الراديو
و شكراَ ... كانت هذه نهاية التقرير .
-
الف مبروك
و عقبال صيانة ال 100 و انت بخير
-
ألف مبروك محمود باشا ..
يااااة كل المشاكل دى فى عربيتك وساكت ؟؟
مبارك عمل الصيانة وهاتحس بتحسن أكثر لما تغبر علبة الدريكسيون.
تحيـــــــــــاتى
-
محمود باشا
اخيرا عملت الصيانة :verygood:
مبروك يا باشا ... ربنا يبارك لك فيها و تستمتع بيها على طول.
مهندس عمرو الهضيبى فعلا من الناس المميزين جدا, و شخصية محترمة اوى.
العربية الماروتى الزرقاء دى بتاعة مهندس تامر.
و الحمد لله ان فعلا الناس قد كلامها و فى استجابة للاتفاق اللى تم معاهم.
-
مبروك يا محمود الصيانة وعقبال صيانة ال 250 ألف :)
-
مبروك يا محمود الصيانة
و الحمد لله ان كل حاجة اتظبتت
و ربنا يبارك لك فى سيارتك
-
مبارك يا محمود على الصيانة
وربنا يحفظهالك من كل سوء ان شاء الله
-
مبروك يا محمود باشا
مبروك يا محمود باشا
و عقبال صيانة ال 100 الف ان شاء الله :coool:
و ربنا يبارك فيك و فى العربية بتاعتك ان شاء الله
-
مبروك يا بوب ع الصيانة وان شاء الله تفضل مبسوط من العربية
Content Relevant URLs by
vBSEO 3.6.0 PL2