بيجو 405 بارص_ _ تغيير الزيت كل 10,000 او 6 شهور ايهما اقرب

**samey** · 14-06-2009 08:45 PM

روحت توكيل وجيه اباظة اليوم الاحد 14/6/2009 ....10 صباحا اللى فى شارع الخليج العربى اللى فى غمرة, ولقيت تغيير فى التعامل الى الاحسن(مش عارف ليه ) يمكن يكونوا غيرو الاشخاص او ادولهم تعليمات لحسن التعامل ... يعنى ما لاقيتش اى خناقة او صوت عالى من اىى من العملاء او رد عنيف من المهندسين او الموظفين او الفنيين ولكن كل التعامل كان بزوق. انا كان عندى شوية ملحوظات على العربية < كان فية حدفة يمين بتظهر عند السير بسرعة اعلى من 60 كم/ساعة ،وكان الباور تقيل شوية ، والتكييف مش ساقع قوى خصوصا فى يومين الحر الشديد اللى فاتو الساعة 2 الى 6 مساء > وغيرت الزيت والفلتر.على فكرة هما حطوا زيت شل هيلوكس 10,000 التخليقى . هما كان حسابهم( 260 جم الزيت +108 جم الفلتر +75 جم المصنعية يعنى 443 جم + ضريبة مبيعات حوالى 44.3 ضريبة مبيعات -- يعنى كله شامل 487 جم .مش عارف كدة يبقى غالى او لا , راييى انو مش غالى لان التوكيلات التانية نفس الاسعار او يمكن تزيد لكن لو هاتغير الزيت والفلتر خارج التوكيل هتقل عن كدة لانك مش هتدفع ثمن الفلتر 108جم ولكن 55جم والزيت حوالى 220 جم يعنى هتوفر اكتر من 100 جم وده اللى حصل مع بعض سواقيين التاكسى الجديد الابيض البيجو بارص فالتوكيل خفض لهم تغيير الزيت بالفلتر 340 جم يعنى خفض لهم 100 جم لان دول بيجو كل شهر تقريبا يغيروا الزيت لان فيه واحد بيغير 20,000 كم وده فى اقل من شهريين.ولكن لاحظت ان قطع الغيار متوفرة حتى للعربيات البيجو البارص وكذلك 406 اللى التوكيل مليان منها يعنى عددهم تقريبا حوالى نصف العربيات من جميع الموديلات الاخرى. وهما ظبطولى العربية من حيس الباور والزوايا والتكييف بقى ثلاجة واستلمت الغربية الساعة 2,30 مساء يعنى وقت غير مبالغ فيه

**the-hero** · 14-06-2009 11:45 PM

أهم حاجه انك خرجت مبسوط هو ده التغيير

**samey** · 14-06-2009 11:57 PM

نسيت لقول حاجة انا لما غيرت الزيت وعملت بعض اصلاحات كانت الفاتورة 487 جم ولكنى ما دفعتش فلوس انا اديتهم 5 كوبونات ب100 جم ( هما لما سلمونا العربية ادونا 15 كوبون الواحد ب 100 جم يعنى حوالى 1500 جم ) الظاهر علشان اتاخرو فى تسليمنا العربيات انا كنت حاجز فى شهر 2 واستلمت فى شهر 9 2008 وكان المفروض استلم فى شهر 6 يعنى حوالى 3 شهور

**amr mokhtar** · 15-06-2009 12:39 AM

الف مبروك على العربية
و عقبال صيانة ال100 الف كيلو

الحمد لله انى سمعت عن تحسن فى التوكيل و لو إنى الحمد لله محستش بمشكلة مع التوكيل غير نقص فى قطع الغيار لكن غير كده الحمد لله تمام

المهم إيه أخبار العربية؟ و لو ممكن لو مافيهاش رزالة.. تقرير كده عن العربية من ناحية الأداء و التقفيل

**samey** · 15-06-2009 11:28 PM

الى الاخ Amr Mokhtar والى من يهمه الامر
على قد خبرتى بالعربيات على مدى 25 سنة كمستهلك للعربيات :
العربية البارس فى مجملها وبالنسبة لسعرها تعتبر حوالى 85 %
اولا بالنسبة للموتور : الموتور هو موتور البيجو 307 , 1600 سى سى, انجيكشن, حوالى 108 حصان , 16 صمام , 2 كامة علوية , فتيس عادة 5 امامى و1 خلفى , دركسيون باور , تكييف , ( ماركة الموتور فرنسى الصنع tu5 jp4 )يعنى الموتور ممتاز وقادر على حركة ومرونة العربية لانه حوالى 108 حصان يعنى الموتور ووضعة فى العربية يساوى اكثر من 90 % .
ثانيا العفشة : العفشة هى عفشة قوية جدا وهى عفشة 405 بالتمام يعنى مقصات ومساعدين وسوست وهى شاسيه ال 405 وده برضه يساوى اكثر من 90 %.
ثالثا الشكل الخارجى هو شكل جميل وانسيابى من الامام ولكن الشنطة الخلفية فشكلها تقليدى قديم والفانوس الخلفى شكلة موديل قديم وغير مبهر زى الموديلات الحديثة سواء فى البيجو او الماركات الاخرى ولكن الشنطة واسعة وبها الاستبن والعدة عير ظاهرين , اما بالنسبة للصاج فهو زى العربيات الحديثة كلها ويمكن يكون اقوى بسيط وده من الظاهر لان لم يحدث تجربة حتى الانولكن بالنسبة للكابوت فهو اضعف من 405 العادية حيث انه اكبر شوية . يعنى الشكل الخارجى يساوى حوالى 80 % .
رابعا من الداخل : التابلوه حلو ومن خامة جيدة جدا بس قديم وغير عصرى وهو هوه بتاع 405 موديل التسعينات بالظبط ومحصلش ليه اى تغيير وشكله مش فرنساوى وغالبا ما يكون ايرانى . ودى ازواق برضه ولكن ميزة ان لو عايز تغير تابلوه ممكن تلاقيه بسهولة جديد او بسهولة اكتر مستعمل ..
خامسا الكراسى مصرى 100% من شركة مصرية بتعمل كل الكراسى لكل العربيات المجمعة فى مصر وفرشها كويس بس مش ممتاز وانا بصراحة مش عاجبانى قوى لانها ضعيفه بالنسبة للمعدن المستعمل فيها والسفنج او المادة المستخدة معرفش اسمها ايه ( غالبا فوم ) ناشفه قوى ومتقدرش تسوق مدة طويلة على بعض , يعنى من وجهة نظرى تاخد حوالى 70 %.
سادسا فرش السقف مصرى ولكن جيد جدا , فرش الابواب مصرى لكن جيد جدا ,فرش الارضية والشنطة مصرى لكن جيد جدا , اكرة الزجاج والفتح ومخادع الابواب شكلهم مش مصرى يعنى الدواخل تساوى 85 %
سابعا البطارية مصرى كلورايد مش جافة ( استرخاص + منتج محلى ) 60 %
ثامنا الزجاج مصرى ولكن جيد جدا وغامق شوية 90 %
تاسعا الكاوتش نسر 14 , 185/75 سيئ سيئ م جربت معاه كل المحاولات يعنى قللت الضغط فيه ل24 حتى ل22 ماجبش نتيجة غير الهواء وحطيط نيتروجين وقللت الضغط برضه النتيجة واحدة وهى ان العربية بتدب فى المطبات , وفى الاخر بعد حوالى 3 شهور غيرت ال5 فرد وجيبت بريدجستون بحوالى 1500 حم يعنى كده الكاوتش ياخد حوالى 50 %او اقل .
عاشرا التكييف حلو جدا وهواه ساقع بس يعييبه ان صوت الهواء عالى داخل الصالون وخصوصا على اعلى سرعه للمروحة, بس اقل طبعا عن اليابانى ( مش عارف ليه ) ( هى دى مشكلة عويصة للدرجة دى ) طب ما يشوفو ا
اليابانيين بيعملوا ايه ويعملوا زيهم فى التكييف او يخلوا اليابانيين يعمللولهم تكيفات عربياتهم الاوروبى ولا هى دى مش مشكلة عند الاوروبيين لان معندهمش حر شديد والصيف يادوب شهر او اثنين فى السنة ومش محتاج تكييف جامد لكن لازم يعرفوا انهم بيصدروا عربيات لبلاد حرررررررر , والكاسيت كينوود سى دى وراديو و6 سماعات يعنى حلو ومعقول ومقبول !!!!!!
وفى الاخر ده راى واحد عنده العربية ومش متخصص فى العربيات واحب اسمع اراء الاخرين سواء تصحيح او نقد او راى فى العربية
مستنى ردود

**the-hero** · 15-06-2009 11:54 PM

الله يباركلك ياباشا أختيار موفق
ولونى مش من انصار البارس بس تعتبر برضه جيده

**the-hero** · 16-06-2009 12:08 AM

وبالنسب للنسب اللى حضرتك كاتبها أعتقد انها فيها زيادة شويه فى التقييم
مقارنة بال 405 الفرنساوى
دلأنى نزلت التوكيل وشفت العربية واكتر حاجه لفتت أنتبهى فيها قلة الخامات والتقفيل السئ مقارنتا بال 405 بتاعتى

**amr mokhtar** · 16-06-2009 12:54 AM

الف شكر على التقرير
من خلال كلام حضرتك باين انك مبسوط من العربية وربنا يديم المحبة و تفضل على طول مبسوط بيها

بالنسبة لشكل العربية انا شايف انه حلو بالذات من الأمام و من الخلف حلو برضه
بس يعاب عليهم انهم لم يطوروا من الدواخل مع الإحترام التام لتابلوه ال405 بس المفروض انهم بيعملوا عربية سنة 2009 يبقى لازم تبقى أكثر تطور

و بخصوص نسبة المنتج المحلى فى السيارة
الحمد لله انك غيرت الكاوتش و أكيد حسيت بفرق واضح لإن النسر ده لا يصلح للإستخدام الآدمى
و البطارية لما تتعب يبقى هات الجافة و خلاص

بالنسبة للتكييف عادى إنك تلاقيه أقل شوية عن اليابانى فى التبريد و ده لسبب انا معرفوش لكن يظل التكييف جيد جدآ و بحس ان مع الإستخدام الكتير كفائته بتزيد

ربنا يباركلك فى العربية و كفاية ان فيها موتور 307

**mecho** · 21-06-2009 12:12 PM

انا معايا العربية دية و عامل بيها 11000 العربية جميلة بس فيها عيوب التافيل المصرى يعنى شوية زقزقة فى المطبات . ايضا توكيل تعبان جدا . لكن اعتقد ان نزول العربية تاكسى سيحسن الحالة شوية و يوفر قطع الغيار

**samey** · 23-08-2009 06:00 PM

ذهبت الى مرسى مطروح بالبيجو البارس
الطريق من البيت فى مصر الجديدة الى البيت فى مرسى مطروح حوالى 453 كم...
طبعا فولت التانك بنزين 92 من بنزينة جنب البيت وكشفت على الكاوتش وبصيت على ماء الرياتير ولقيت كله تمام .. واتحركت بالعربية حوالى 8 وربع صباحا متجها الى المحور من 6 اكتوبر واول ماوصلت المحور شغلت التكييف واخدت الطريق الصحراوى ثم طريق وادى النطرن - العلمين وهه طريق حلو وفيه 2 رست وبهما محطة بنزين كل 40 كم ( الطريق 120 كم ) وانا ريحت فى الرست التانى لمدة نص ساعة .. ثم استكملت الطريق حتى مارينا 5 ثم الى مرسى مطروح ووصلت الاندلسية ( قرية سياحية قبل مرسى مطروح بحوالى 8 كم ) حوالى الساعة واحدة وربع يعنى الطريق مع الراحة نص ساعة حوالى 5ساعات . وده كده علشان كنت بجرى فى الطريق يعنى كنت ماشى على سرعة 120كم/ساعة وفيه بعض الاماكن مشيت على سرعة 160 كم/ساعة .. علشان كنت عايز اعرف امكانيات العربية فى السرعة .. وطبعا صوت الموتور حتى على السرعات العالية هادى وثبات العربية حلو جدا حتى فى سرعة 160 ولكن لم اجرب اخد غرز على السرعة دى .. وكل الطريق مشغل التكييف وكان عداد الحرارة ثابت على نقطة واحدة حوالى 80 ولم يتغير ابدا وفولت بنزين 92 من بنزينة جوه البلد واخدت 36 لتر والعداد كان 460 كم ..
احب اوضح للناس ان العربية مش سيئة بل تعتبر جيدة جدا وانا بقول كدة من وجهة نظرى ولكن مش عن دراسة مستفيضة ومقارنة بعربيات بيجو اخرى لاننى لم اجرب بيجو اخرى .... برجاء الرد من اصحاب البيجو البارس وايه عندهم من خبرات .. وايضا برجاء الرد من اصحاب الخبرة مالكى البيجوهات الاخرى ... واذا كان حد ركب الاثنين يكون افضل فى المقارنة

الموضوع: بيجو 405 بارص_ _ تغيير الزيت كل 10,000 او 6 شهور ايهما اقرب

LinkBack

أدوات الموضوع

عرض

بيجو 405 بارص_ _ تغيير الزيت كل 10,000 او 6 شهور ايهما اقرب - انشر الموضوع فى :

-

تغيير الزيت بدون فلوس كاش -

-

تقرير عن البيجو 405 بارس -

-

-

-

-

المواضيع المتشابهه

فلتر الزيت لشيرى qq هل اجده فى البنزينه عند تغيير الزيت؟

ايهما اقرب للمهندسين الماظه ام رمسيس ؟

ايهما اقرب لعمارات العبور فى صلاح سالم "عبود ام السلام"وطلب اخر

تغيير بلي العجلة اليمين بمعدل كل 3 شهور؟

اقرب توكيل بيجو للهرم

الكلمات الدلالية لهذا الموضوع

المفضلات

المفضلات

ضوابط المشاركة