الاخ كريم طبعا محق فى الجزئية اللى بتضايقه و هو شايف ان خدمة العملاء و الكول سنتر المفروض يكون على مستوى مقبول
برضه لان التوكيل ماعندهوش test drive رسمى و بالتالى الردود من الموظفين كانت عشوائية و غير مقبولة و زيى ماقال م/كريم ان الكلام ده موجود فى توكيلات كتير فى مصر موش عز العرب بس .
انا شخصيا تعرضت لتجربة غير عادية مع عربيتى و اللى كان واقف فى صفى التوكيل موش الشركة الماليزية و انا متذكر كويس جدا ان احد المسؤلين الكبار هناك قالى التوكيل معاك و صفك كعميل لان العميل له الاولوية القصوى عندنا .
كان التسويف جاى من الشركة الماليزية و التوكيل وقف بشدة معايا و الحمد لله انا خرجت راضى عن اللى حصل .
انا عايز اضيف ان التوكيل و ان كانت خطواته بطيئة شوية و انما بيحاول يحسن من قدراته على خدمة ماركة بروتون خاصة و انهم ابتدوا بمركز خدمة صغير جدا لان العربية كانت لسه فى بدايتها بالنسبة لمصر و ماحدش كان متوقع النجاح الساحق ده .
ناخد فى الاعتبار ان العربية نجحت فعلا خلاص على الرغم من الكلام الكتير المثار حولها و تاكيدا على كده ان م/ كريم نفسه بيشكر فى الماركة و بيحترمها زيى ماقال و هو اكيد راجل فاهم موش لسه جديد فى موضوع العربيات و النجاح ده موش من فراغ و انما برضه فى دعم من الوكيل .
فى مقابلة مع العضو المنتدب لشركة بروتون الماليزية و المهندس هشام عز العرب و كانت فى فندق الميناهاوس للترحيب باعضاء نادى الجين 2 و كانت الصحافة المالزية موجودة كمان و الناس براحتها جدا و كان فى انتقادات وجهت لاداء التوكيل و هشام عز العرب رحب بالكلام ده و قال كده المناقشة تبقى موضوعية علشان المفروض ان الدنيا موش وردى و لازم هايكون فى سلبيات و الراجل وعد بانه هايحاول بقدر الامكان دعم نادى الجين 2 و اعطاؤه شكل رسمى و هايبقى فى مركز كبير جدا بجوار القرية الذكية و ذلك لدعم ماركة بروتون و هايبقى على مستوى محترم جدا و نسخة من المركز الرئيسى الموجود فى ماليزيا و الراجل كان مستمع جيد لاى انتقاد و تقبله بصدر رحب و ووعد بتغيير جذرى هايحصل باذن الله .
احنا النهاردة و على الموقع الخاص بالتوكيل على الانترنت باقدر احجز ميعاد الصيانة و يجيلى الرد بالايميل و من غير تليفونات و لا قلبة دماغ و لا اروح من 7 الصبح و الكلام ده
و لو مافيش انترنت برضه فى حجز بالتليفون و الحمد لله اعتقد ان النظام ده مستقر و مريح للعملاء جدا .
ضمان بروتون احسن ضمان فى مصر و على مسؤليتى الكلام ده و انا شايف مواقف لعملاء اعرفهم او ماعرفهمش و شايف دعم بروتون و عن طريق وكيلها طبعا و حاجات بتتغير فورا و بدون مناقشة و لا بقى استعمالك و لا استعمالى و لا الكلام الفارغ ده و الحاجة لو موجودة فى المخزن بيتم تغيرها فورا .
طبعا التوكيل بيوفر دعم كامل لفرق الصيانة اللى بتيجى من ماليزيا و شوفت بعينى المهندس / امر الكوافى – مدير خدمات مابعد البيع بيكلم العملاء اللى عندهم مشاكل مستعصية علشان خاطر المهندسين المالزيين يشوفها و يعاينوها بنفسهم .
اللى اقصده من الكلام ان فى سلبيات و ايجابيات فى اى وكيل موش شركة عز العرب بس و انا نفسى فعلا ان توكيل بروتون يبقى احسن و احسن لان العربية محترمة فعلا و تستاهل افضل من كده .
تحياتى للاخوة الاعضاء و الـ م/ كريم انا متفهم وجهة نظرك تماما و نقلتها بمنتهى الجدية لمدير بروتون مصر لاننا كعملاء الماركة دى مانحبش تبقى دى انطبعات عميل بيفكر يشترى عربية بروتون عن الوكيل الرسمى لها فى مصر .
المفضلات