الموضوع: هل مازلت مصر على شراء السيارات الصينى

العربيات الصيني يا جماعة مش فانوس رمضان بيتصنع درجات .

و العربيات الصيني مش بتنزل في أوروبا أصلا غير ألمانيا من ماركة بريليانس .
بقية الماركات مش بتبيع في أوروبا أساسا .

بلاش نخلط الورق ببعضه .

الشركات العالمية لما بتفتح مصانع لتجميع منتجاتها بتكون بشروطها هي مش شروط الصين .
زي مصر بالظبط لما مرسيدس تبني مصنع في مصر ببيكون بشروط و اشراف مرسيدس و المصريين ما عليهم إلا العمل طبقا لتوجيهات الشركة صاحبة المصنع .

إما المنتج الصيني الكامل ...... هو ده اللي عليه الكلام .
الصين بتديك منتج كويس لما بيكون لماركة عالمية علشان هما هنا مش متحكمين في شروط التصنيع
يعني مفش حاجة أسمها سوني صيني درجة أولى و سوني صيني درجة تانية
السوني سوني ....... في أي حتة .

أحنا بنتكلم عن منتج الصين نفسه .
العربيات الصيني مش زبالة للدرجة ......... و عيبهم هو التقليد الشنيع لكافة العربيات و كافة المنتجات ........ و عيبهم أيضا عدم الأهتمام بالجودة و عدم الأهتمام بعمل اسم تجاري كبير .

تعالوا نشوف عربية فيات سيينا صيني و نقارنها بعربية جيلي .
مفيش أصلا وجهة للمقارنة
علشان فيات هي اللي صنعت بأيدي صينية .
أما جيلي فهي صينية من الأول للأخر .......


معلومة تانية مفيش عربيات صيني بتدخل السوق الأوروبي أو الأمريكي علشان نقول بينزلنا هنا كذا و هما بينزلهم كذا ....

الأسواق دي فيها شروط صارمة لدخول المنتجات مش العربيات بس .
و الصين في العربيات لسة ما حققتش الشروط اللي بيطلبها الأوروبيين و الأمريكان و الكنديين لدخول السيارات إلى هذه الأسواق .

أنا أعتقد ان ماركة شيري اللي بتعمل الأسبرانزا ...... مع ماركة برليانس هما أفضل شئ من الصيني الموجود في السوق المصري .

المشاركة الأصلية كتبت بواسطة dr.sherif mansy

بعد اذن الكل لو تسمحوا لى اتدخل برد اتمنى يحسم الخلاف الأزلى ده

لا كل العربيات الصينى وحشة و لا كلها حلوة

ولا كل العربيات اليابانى او الأوروبى أو الكورى حلوة ، و لا كلها وحشة

كل موديل فيه كده و كده

لو الصينى حاجات وحشة ما كانتش شركة زى "سونى" تعمل منتجاتها هناك فى الصين و تحط اسمها عليها

المشكلة فعلا ان زى ما بعض الأخوة الأعضاء قالوا و لكن كلامهم تاه وسط النقاش ان "الصين عندها درجات لكل منتج حسب الطلب" من ممتاز و نزولا حتى زبالة
و كله بتمنه يا باشا

و على فكرة ... مش الصين بس كده

و لكن فيه ماركات ليها حد ادنى و لكن الصينى مالوش

و على فكرة ... هما مش بيضحكوا على حد

لو الحاجة مش مستوفية الشروط بيقولوا كده فى الورق الرسمى

و لكن العيب على اللى بيطلب استيراد اوطى حاجة و يخفى تحذيرات المصنع و يوهم الناس انها (و يبيعها بسعر) احسن حاجة

العربيات الصينى بتهدد سوق العربيات الأمريكانى و الأوروبى و لكن بينزلوا لهم اللى يعدى شروط السلامة عندهم و بسعر منافس و امكانيات عالية

اما البلد اللى بناها حلوانى فينزل لها المهلبية و الهريسة

فى كله مش الصينى بس

مثلا اللانسر بره بتنزل ب 4 - 6 ايرباج ستاندرد ، لكن هنا لو واحد يبقى ممتاز و لو 2 ايرباج يبقى فل الفل (و الغاوى ينقط بطاقيته)

و طبعا فاكرين التويوتا الكورولا العيون لما نزلت ، لو دورنا على النت هنلاقى ان الموديل ده تقريبا نزل فى مصر بس و لكن بره رفضوه فغيروا شكل الموديل بره و احنا اللى اخدناه هنا كذا سنة ورا بعض ، و لازم نبوس ايدينا وش و ظهر

مثلا الأفيو اللى عاملة هنا مبيعات ممتازة بتصنف من اسوأ العربيات فى أمريكا (بلدها)



المقالة الأصلية هنا .. أضغط لتراها

فيه عربيات صينى فعلا ضايعة ، مرة واحد فى الشارع عندنا حط رجله على اكصدام عربية صينى جديدة لانج (من سنتين تقريبا) راح الأكصدام نازل معاه مفكوك من العربية ، دى لا يمكن تحصل فى عربية محترمة

و لكن فيه عربيات كويسة صينى

يمكن لسه شوية على ما توصل لليابانى و الأوروبى (و علشان كده فيه ناس مترددة بخصوصها) و لكنها مبشرة بالخير

المشكلة ان الكويس بينزل بره و الضايع بينزل هنا

فى كل حاجة و لكن الصينى أكتر (و ده للسبب السابق ذكره ... الوكيل الجشع مش المصنع)

المشكلة هى المغالاة فى السعر و استيراد الأسوأ عل انه الأفضل

يعنى جشع و غش الوكيل ...

ده رأيى الشخصى

و فى النهاية انا مش بامدح او اذم فى اى نوع ، و اللى ذكرته على سبيل المثال فقط لا غير

و تحياتى

يا رجاله الراجل ده (د/شريف) قال المختصر المفيد والى بيحصل فعلا ومافيش بعد كلامة المنطقى شى يتقال.

وعلى راى الاغنية سوق (سوق على مهلك سوق...........)