بعد اداء مصر المشرف امام البرازيل ..... ما توقعاتكم لمبارة ايطاليا

السلام عليكم

بعد ما شفنا الماتش التاريخي لمصر
والاداء الاحلى للفراعنة

ما رايكم بماتش مصر وايطاليا

حتكسب ... حتتعادل ... ولا حتخسر

بانتظار ارائكم

سلاااام

we will win inschallah

يااخواننا فريقنا عنده شعرة ساعة تروح وساعة تيجى
إحنا فرحنا لأننا كنا متوقعين الهزيمة
إنما لو توقعتكم النصر أو التعادل هناخد صدمة ألعن من بتاعة الجزائر
أنا مازلت أتوقع الخسارة سواء بشرف أو لا سمح الله

والله انا مش فارق معايا مع ان كنت فرحان بماتش النهارده
بس هي البرازيل كانت واخده كام عشان تسيب الماتش:Copy of majd(4):

مش مهم النتيجة المهم الأداء الجميل والتمثيل المشرف وأنشاء الله لو أدينا زي ماتش البرازيل ربنا هيكرمنا .

ربنا يستر دي ايطاليا لا بتتهد ولا بترحم انما البرازيل ساعات بتدوخ كده وتحس انها مش بتلعب

في البطولة الماضية اللي اشتركنا فيها
اتعادلنا في أول مباراة 2-2 بأداء مشرف تقريباً مع المكسيك على ما أتذكر
والسعودية ظبطتنا بعدها فضيحة ال 6-1 الشهيرة

ربنا يستر ويخيب ظني
والتاريخ لا يعيد نفسه

تصحيح يا أبو حمزة
مبارة السعودية أنتهت 5 - 1

و كان مطرود من مصر 3 لاعبين .

اقتباس:

---

المشاركة الأصلية كتبت بواسطة tutankhamoun

تصحيح يا أبو حمزة
مبارة السعودية أنتهت 5 - 1

و كان مطرود من مصر 3 لاعبين .

---

والسعودية بعد ما كسبت مصر لاعبت البرازيل .... والبرازيل فازت عليها 8 - 2

يا رب مصر تفوز على ايطاليا يا رب :coool:

ايه يا جماعة بتصوتوا لفوز ايطاليا إخص عليكم :N_no[1]:

يا جماعة انا مش وثيق ملفوز ........... مش وثيق ملفوز

الله يمسيك بالخير يا هنيدى


لا بجد اتمنى طبعا ان مصر تغلب او تتعادل على الاقل بس دة صعب جدا لاكتر من سبب
- اولا الدفاع بتاعنا ما شاء الله علية توهاااااان وعصام الحضرى مش فى مستواة الظاهر السن لة حكمة
- ثانيا البرازيل كانت مستهترة بينا جدا ولعبت باقل جهد
- ثالثا ايطاليا شافت المباراة وهتنزل واخدة حذرها وهتلعب باعتبار ان مستوانا ثابت على المباراة دى ومتعرفش ان احنا بنلعب بمزاجنا مش بمستوانا يعنى مرة نلعب حلو ومرتين زفت
- رابعا ودة سبب رئيسى ان احنا طبعا هنفتكر اننا ابطال العالم عشان الماتش دة وهننزل نستعرض وربنا يستر متبقاش فضيحتنا بجلاجل


ومع ذلك ورغم كل دة اتمنى من جوايا اننا نفوز واطلع غلطان ياااااااااااااااااااااارب

[caution]معلومة للتصحيح فقط
جملة (( لا سمح الله ))
من الأخطاء الشائعة بين الناس
الجملة شرعا لا تجوز [/caution]

طبعا احنا عايزين مصر تكسب وربنا يستر من ايطاليا

وشكرا ابو عبدالله للتنبيه

أنا أتمنى إن شاء الله فوز مصر بس بصرف النظر عن قوة البرازيل أو إيطاليا مشكلة ماتش إيطاليا إنه عاوز مدرب عنده فكر أكتر شوية من ماتش البرازيل لأن البرازيل طول عمرها سهل إنك تسجل فيها و دايما بتراهن على إنها تسجل أكتر و الدفاع متقدم باستمرار و ده بيسهل مهمة المهاجمين أما إيطاليا فبتعتبر أصعب فريق ممكن تدخل فيه جون و التاريخ يتكلم البرازيل خسرت قبل كده ماتشات باسكور لكن إيطاليا عمرها تقريبا ما خسرت باسكور

اقتباس:

---

المشاركة الأصلية كتبت بواسطة أبو عبدالله

[caution]معلومة للتصحيح فقط
جملة (( لا سمح الله ))
من الأخطاء الشائعة بين الناس
الجملة شرعا لا تجوز [/caution]

---

ممكن توضح أكتر عشان أنا بحب أبقى فاهم المعنى و يثبت فى دماغى فمستعملهاش تانى إيه المقصود بالكلمة و إيه المعنى اللى يخالف الشريعة و شكرا على أى حال للتنويه و ربنا يجازيك خير

ازاي الناس بتدي صوتها لايطاليا مش فاهم ماتتفائلوا شوية
لو المنتخب لعب بنفس التركيز واللياقة البدنية الي احنا نسيناها ومخدناش بالنا الله يرحم المنتخب الي كان بيلعب 5 هجمات في الشوط الاول وينام باقي الماتش
وان شاء الله تريكة يوريهم الويل زي ماعمل في البرازيليين
والله لعيبتنا بياخدها الحماس عشان في ملعب وفرق بتلعب كورة مش اتحاد المهلبيه الي هنا الي ينسي الواحد الكورة مستديرة ولا مكعبة

ان شاء الله مصر تكسب او تتعادل علي الاقل ولازم اداء مشرف

اقتباس:

---

المشاركة الأصلية كتبت بواسطة أبو عبدالله

[caution]معلومة للتصحيح فقط
جملة (( لا سمح الله ))
من الأخطاء الشائعة بين الناس
الجملة شرعا لا تجوز [/caution]

---

جزاك الله خيرا بس فهمنى لإنى أعتقد أن كلمة سمح فى لا سمح الله تعادل أو تقارب قدّر فى لا قدّر الله ..

هو بصوا انا من بعد ماشفت ماتش ايطاليا وامريكا !! وخاصة الولد اللي مالوش حل Rossi ده بيشوت من نص الملعب والكورة بتيجي جون

فلازم المنتخب المصري يسد الفراغات ويمنع التمريرات وبيتهيألي هيكون ماتش اصعب من البرازيل وانا متوقع اداء قوي من مصر بس اللعيبة ماتتغرش

بيتهيالى ايطاليا هتكسب ا او 2 صفر والماتش هيبقى مكتوم

طبعا احنا لازم نشجع مصر عشان بلدنا ولازم نتمنى الفوز ولكن ليت نيل المطالب بالتمنى

انا لو ايطاليا كانت هتلاعب البرازيل كنت هتوقع الفوز لايطاليا

ايطاليا دفاع قوى هجمات مرتدة خطيرة انفرادات فى الجون

لكن لكل جواد كبوة ونتمنى ان كبوتهم تيجى معانا
لكنى اتمنى مباراة جيدة وعدم الاندفاع فى الهجوم لقوة الحصن الايطالى وسرعة الهجمات المرتدة لازم ندافع كويس نأمن نفسنا وياريت لاعبينا يكونوا واكلين ونايمين كويس عشان يقدروا يجروا ويعملوا هجمات مرتدة سريعة نجيب منها جول

يارب نجيب جول ونقدر نحافظ عليها
بس انا صراحة متفاءلة

اقتباس:

---

المشاركة الأصلية كتبت بواسطة baskota

طبعا احنا لازم نشجع مصر عشان بلدنا ولازم نتمنى الفوز ولكن ليت نيل المطالب بالتمنى

انا لو ايطاليا كانت هتلاعب البرازيل كنت هتوقع الفوز لايطاليا

ايطاليا دفاع قوى هجمات مرتدة خطيرة انفرادات فى الجون

لكن لكل جواد كبوة ونتمنى ان كبوتهم تيجى معانا
لكنى اتمنى مباراة جيدة وعدم الاندفاع فى الهجوم لقوة الحصن الايطالى وسرعة الهجمات المرتدة لازم ندافع كويس نأمن نفسنا وياريت لاعبينا يكونوا واكلين ونايمين كويس عشان يقدروا يجروا ويعملوا هجمات مرتدة سريعة نجيب منها جول

يارب نجيب جول ونقدر نحافظ عليها
بس انا صراحة متفاءلة

---

إيه ده كله بسكوته لعيبة قديمة بقى :36_7_7[1]:
ده أنا حسس إنى قدام بسكوتة الخطيب أو بسكوتة أبو جريشة

قوة إيطاليا الضاربة في نص ملعبها المفترس !

حظنا إن بوفون المرعب اللي غلب وليد و رعد بتوع الكابتن ماجد مستواه وحش اليومين دول
لأن الراجل ده في مستواه العادي ولا بالطبل البلدي بيخص فيه إجوان ! بيبقي سوبر بوفون !

و حظنا إن مدافع زي كنافارو مش هيلعب .. الدفاع الإيطالي أقوي من دفاع البرازيل
و الماتش هيبقي أصعب من ماتش البرازيل .. و عدد الأهداف أكيد هيبقي أقل بكتير .

أتمني نلعب بنفس الروح بس .. و يكون فيه حل للشوارع المفتوحة في الدفاع ..
و هفرح أوي أوي لو حسن شحاتة كان شجاع و قعد حد من الأساسيين اللي مستواهم وحش حالياَ و بدأ بلاعب من اللي أثبتوا نفسهم في ماتش البرازيل
زي عيد عبد الملك .. و ربنا معاهم .

الحضري لازم يتغير ..علشان بقى تقيل ورجله مابتترفعش عن الارض وردة فعله بقيت بطيئه جدا ....ولازم احمد عيد يستوعب انه بيلعب قدام اقوى منتخبات العالم مش مع الحرس ويبطل استعراض ...وللاسف الدفاع مالوش حل لان مفيش بدلاء ولا اساسين كمان ..وربنا يستر من العرضيات والكرات الثايته ..والاجوان اللي بتخش فينا وبقيت اسطمبه محفوظه من ايام ماتش فرنسا (5-0 )