الموضوع: نداء إلى الأستاذ بايو دينامو المنتدى بخصوص QQ

ليا ملحوظة بس علي حكايات العربيات الصيني ده ، و هقارنها بالكوري في بدايته بمصر و ليه الصيني اتظلم :_
1- الكوري كان نازل ثلاث ماركات بس دايوو ، هيونداي ، كيا
فكان الحكم عليه سهل غير الصين بلد سدس سكان العالم فيها ففيها كمية مصنعين غير عادية و اللي نزل السوق المصري ماركات صيني لا حصر لها فاتاخد العاطل في الباطل
مثلآ أنا عارف إن الشيري A11 عربية كويسة جدا ، عشان مع ناس قرايبي و بيشكروا فيها جدا
لكن النهاردة كنت في معرض المصرية اتفرجت علي العربية Landwind Fashion اللي منزلها وليد توفيق ، من بره شكلها حلو أوي و بتاخد سبعة راكب ، بس بصراحة لما تقلب في العربية ميبقاش فيه تعليق غير أيه القرف ده ، التابلوه بلاستيك ردئ مطبوع خشب شكله وحش، الأبواب فيها سوسته بلغة النجارين ، المصيبة العربية و هيا لسه في المعرض قلت أتفرج علي الكراسي الإضافية بتفتح إزاي لقيت المقبض البلاستيك اللي بتشد منه الكرسي مقطوع و هيا لسه في المعرض قلت عادي يمكن زبون شده بطريقة غلط لقيت مقبض الكرسي التاني برده مقطوع فجريت بعيد عنها لحسن بتوع المعرض يقولولي انتا اللي كسرت العربية :D :D :D
2- الكوري نزل في وقت كان اللي عنده عربية فيها تكييف و باور و زجاج كهربا أصحاب الماركات الألماني الفاخرة فقط و الياباني اللي المصريين نازلين بيها من الخليج ،فأصبح منافس جدا إن ساعتها في منتصف التسعينات بأربعين و ثلاثين ألف جنيه تقتني عريية فيها الأوبشن اللي الناس كانت شايفاها وهمية و متحلمش بيها
الصيني دلوقتي مش لاقي أوبشنز يغري الناس بيها لأن بقت خلاص حاجات أساسية في أي عربية محدش بيشتري عربية زيرو دلوقتي من غير تكييف و باور
3- الكوري كان نازل بينافس الفيات (النصر) و الياباني بتاع بلاده فكانت المنافسة من ناحية السعر في صالحه جدا غير جودته مقارنة بالفيات في النعومة و قلة الأعطال ، كان مرحلة جديدة بالنسبة للمصريين
الصيني نازل بينافس الكوري أساسا ، اللي هو سعره معقول و في منه تجميع محلي أرخص و أرخص غير المستورد من الماركات الشهيرة بس من بلاد العالم النامي ،، فمش عارف ينافس بالسعر حتي الآن ، مفيش فرق سعر مغري بينه و بين الكوري اللي خلاص أثبت نفسه يخلي الناس تقبل المغامرة
4- الكوري مسكه توكيلات جامدة غبور و ابو الفتوح و وليد توفيق
الصيني بإستثناء الإسبرانزا مسكه توكيلات مغمورة مش عارفة تنشره
لكل الأسباب دي الصيني اتظلم في مصر ،،،

المشاركة الأصلية كتبت بواسطة eng_mkhalaf

[b]
على ما أعتقد يا أخ بايو زى ما فى جهاز حماية المستهلك فى جهاز حماية القراء - مش كدة ولا أية

طب مش تقوللي أنك رئيس جهاز حماية القراء يا باشمهندس؟

طب عايز أعرف لية بعد ما عمك جابها بسنة ومبطلش شكوى مع أنها أغلى عربية صينى تروح أنت وتشترى أرخص عربية صينى !!!!!!!؟؟؟؟؟؟؟؟؟؟

هاقولك يا سيدي
لما فكرت أشتري العربيه الصيني QQ كنت متقبل أني أخد عربيه خامة كماليتها وصالونها وغيره من الأشياء الغير أساسية مش قد كده مقابل سعر مغري جدا جدا
وقولت بيني وبين نفسي مستحيل أي شركه في العالم ممكن تعمل شاسيه أو موتور أو عفشه من خامات رديئه أبدا
وقولت لنفسي الخامات الردئيه أكيد هاتكون في التابلوه الفرش الصاج الكماليات .... ألخ
وقلت لنفسي زي ما حضرتك قولت كده ليه أدفع كتير لما ممكن ادفع قليل

لكن مكنتش متخيل أن في عربيه ممكن تبقى خامتها الأساسية بالشكل ده أبدا
يعني مثلا اول ماركبتها حسيت أني راكب عربيه عافشتها صفيح من كتر الصوت الخشن إللي كنت بسمعه

لكن لما الموضوع وصل لعدم الأمان لأولادي ............ يبقى خلاص مافيش كلام يتقال

على ما أعتقد سؤال منطقى ممكن يكشف لينا حاجات تانية كتيرة فى موضوع هجومك الغير منطقى على العربيات الصينى

أنا أسف لو حضرتك شايف اني بهاجم الصيني بغير منطقية بعد التجربة الشخصيه إللي حضرتك قرأتها بنفسك

على العموم حضرتك عارف أن في رابطه معموله مخصوص لملاك أحد العربيات الصيني عشان يواجهوا به مشكلات سيارتهم ويجدوا حلول لها (والناس دي بجد رحوهم عاليه جدا جدا) بس أنا مش من النوع ده أنا بدفع فلوس عشان أريح دماغي مش عشان أدوشها

وأنا لما خضت التجربه مع أرخص عربيه في فئتها قلت لازم أنقل لكم التجربه بنفسي وده واجب عليا ومايعتبرش هجوم زي الراجل ده مثلا ما بينصح الناس بعد تجربته مع الصيني
http://www.nilemotors.net/Forum/viewtopic.php?t=7161

على العموم أنا مابهجمش الصيني بس واجبي أني أحذر الناس منه بعد تجربتي وتجربة الأخرين معه

ولو حضرتك محتاج أي استفاضه في الموضوع ممكن تراسلني على الخاص عشان في ناس كتير فهمت أن موضوع حضرتك مفتوح للهجوم عليا شخصيا وأنا شايف أني أرد على أي أستفسار أخر من خلال البريد