الموضوع: أول مصنع لصناعة السيارات فى مصر ( صناعة مش تجميع)

على فكره مش لازم بالضروره نصنع غربيه بالكامل 100 % .. حتى الشركات العملاقه المعروفه مش بتصنع كل حاجتها و بشترى و بتستورد اجزاء من هنا و هناك احيانا ممكن علشان تخفض تكلفة الانتاج لو صنعت كل العربيه بالكامل مش حتقدر تنافس - مثلا لو الشركات الالمانيه او الفرنسيه او اليابانية اعتمدت على مكونات الانتاج المحليه سعر العربيه سيتضاعف بينما لو اشترت مكونات من دول فقيره ممكن تنافس بالسعر - مرتب العامل الالمانى يساوى مرتب 30 عامل هندى - الشركات العالميه تعطى التكنولوجيا لشركات من الدول الفقيره و تشترط مواصفات محدده لتشتريها ..

اكثر من ذلك تلجأ شركات السيارات العالميه لاختيار دول لتصنيع سيارتها بها و توزيعها فى دول المنطقه تعطيهم التكنولوجيا و اهم الاجزاء خاصة الموتور و تأخذ اتاوه على كل سياره يتم انتاجها او تجميعها فى الدولة الثانيه ..
مثلا انتاج السيارات الالمانية اليوم اكتر من انتاجها بألمانيا : فى بولندا - سلوفينيا - التشيك - البرازيل - الارجنتين .. الخ
فرنسا تنتج اليوم فى تركيا - اسبانيا - و قريبا الصين و روسيا و و غيرها

و اليابان تقوم الان بنفس الشئ .. للاسف لو كان اليابانيون يثقون فى الصناعة المصرية كان يمكن اعطوا مصر بدل جنوب افريقيا حق انتاج التويوتا ( صفر المونديال فى الكوره و الصناعه ! )

مش لازم مصر تصنع سياره بالكامل مش حتقدر تنافس شركات عملاقه سبقتنا زى ما قال الدكتور احمد سامى - ضرسى بيوجعنى يا دكتور - لكن يا ريت شركة مصرية تتشطر و تعمل اتفاقية تصنيع لبعض الماركات الشهيره بس المهم الا تقتصر المكونات المصرية على الفرش و البطاريه بل تصل مثلا الى 70 % من العربية مش 3 او 5 %

- ما يقوله الاستاذ احمد 1981 عن جهه سياديه ( تتدخل ) معدش ممكن .. ياخونا الدولة بتبيع كل حاجه و مش عاوزه
تخش بنفسها فى اى حاجه و زى ما قال استاذنا العجوز :D احمد انور نظيف الدولة ما ساعدتش فى انتاج السياره رمسييس فى الستينات و سابت اداره بيروقراطيه فى شركة النصر للسيارات جابت ضرفها و مش عارف الشركة اتباعت والا لسه لكن حتتباع يعنى حتتباع ! -

اخيرا تطوير صناعة السيارات فى مصر يحتاج واحد مستثمر ملياردير زى نجيب ساويرس او محمد نصير او الملياردير المعروف محمد بك انور :mrgreen: :mrgreen: حد منهم يتدخل بقوه و جرأه و عزيمة و تحدى يقدر يعمل حاجه فى هذا المجال بدء من الناحيه العلميه و التعليميه لتخريج كوادر متميزة فى كافة نواحى هذه الصناعه و انشاء مجموعه من الصناعات المغذيه لها و عمل اتفاقيات للانتاج مع كبرى الشركات العالميه ..

الموضوع مش نتحلى بألامل و الحلم فقط لازم العلم و العمل و الاداره .. العامل المصرى ممكن يشتغل زى اليابانى
لو فيه اداره كويسه مش فهلوه .. الحلم لوحده مش كفايه و الا يتحول لسراب .. و السقوط فى هوة العجز و اليأس
برضه كارثه ..لو كان معايا بس 240000 كنت بدأت الخطوه الاولى .. يا خساره الحلم مكملش . .
محدثكم من القاهره الدكتور ابو على