بلاش جرى .. طريق اكتوبر بقى فيه مطبات

أخيرا انتبهوا ان طريق 6 اكتوبر بعد ما تنزل من المحور و حتى مدينة 6 اكتوبر (و بالعكس) أصبح مضمار سباق لبعض الملاكى و لكل الميكروباص و السرفيس و معظم النقل

و تم الآن عمل مطبات صناعية على مسافات مختلفة

كنت ماشى من الطريق ده السبت اللى فات و كل شوية تسمع فرملة واحد من الصواريخ على الطريق لما العربيات تهدى و تتكربس قبل المطب الصناعى

بمكن فيه ناس بتكره المطبات لكن انا شايف ان ده حل ضرورى كان لازم يتعمل من زمان لأن بصراحة كنت باشوف سرعات مجنونة على الطريق ده ، ده غير الحوادث اللى كانت بتحصل عليه

و ربنا يحفظنا جميعا

شكرا على النصيحة

شكرا ع التنبيه

فعلا والله المطباط ديه كانت لزمه لوجدها نظرا للسرعه الى كانت السيارات بتمشى بيها
والاجمل ان المطبات مش مرهقه للسياره والاجمل كمان ان المطابت معظمها اتعمل قبل اى ملف لان ديما الى طالع من اليمين عاوز يروح
الشمال عشان يلف بيكون الى جى من الرئيسى بيكون طاير وبيسبب مشاكل كتير

وكمان اليو تيرن بقى فعلا حلو وبتلف وانت مطمن بس المشكله
ان مفيش اى اشارات للمطباط وده غلط
وتلاقى ديما قبل المطب شرط صفره فى الارض تعرف ان فى مطب ومره تانيه تلاقى شرط من غير مطبات وده اشتغاله

بس صحيح بالنسبه لعريبات الرادار هوا ايه الى حصل للرادار؟

فعلا دى حاجه بقت صعبه جدا
شكرا ليك يادكتور على التنبيه
حفظنا وحفظك ربنا من كل شر

اقتباس:

---

المشاركة الأصلية كتبت بواسطة sephiaa2001

بس المشكله
ان مفيش اى اشارات للمطباط وده غلط
وتلاقى ديما قبل المطب شرط صفره فى الارض تعرف ان فى مطب ومره تانيه تلاقى شرط من غير مطبات وده اشتغاله

---

لأ يا باشا

بص كويس على اليمين قبل المطب هتلاقى إشارة ضوئية مرسوم عليها المطب منورة ليل و نهار

عداهم العيب المرة دى

و عقبال ما تبقى كل شوارعنا منظمة و كويسة ياااا رب

الحل مش المطبات... الحل هو الرادار

MMamdouh

اقتباس:

---

المشاركة الأصلية كتبت بواسطة mmamdouh

الحل مش المطبات... الحل هو الرادار

mmamdouh

---

آسف جدا يا باشمهندس انى اختلف معاك فى الرأى

المطب الكل هايهدى عنده

انما الرادار بيحصل الآتى :

* يتعرف مكانه و يهدوا عنده فقط و الجرى يشتغل بعيد عن مداه

* اللى معاه كاشف رادار مش هايهمه منه لأنه هايعرف يهدى امتى و يجرى باقى الطريق

* لو حد من الناس الواصلة مش هايهمه أى رادار لأنه ماحدش هايقول له حاجة و هايجرى

يبقى المطب يكسب ولا ايه رأى حضرتك ؟؟

اقتباس:

---

المشاركة الأصلية كتبت بواسطة Dr.Sherif Mansy

آسف جدا يا باشمهندس انى اختلف معاك فى الرأى

المطب الكل هايهدى عنده

---

انت افترضت ان كل اللى سايقين شايفين المطب ...لاحظ ان المطب ممكن واحد ميشوفوش و يدخل فيه بسرعتة و يفقد التحكم فى العربية و يعمل حادثة.... او حتى يفاجاء بالمطب فا يفرمل جامد فا اللى وراه يلبس فيه... تخيل الموقف بلبل مش الصبح

اقتباس:

---

انما الرادار بيحصل الآتى :

* يتعرف مكانه و يهدوا عنده فقط و الجرى يشتغل بعيد عن مداه

---

طيب هو مكان الرادار حيتحفظ و مكان المطب مش حيتحفظ؟؟؟... و بعدين لما بيبقى فيه رادار الناس بتقعد تقلب نور من الجانب المعاكس و بتلاقى كل الناس لمت نفسها لخوفها من الرادار و على الاقل حيفضل مهدى لحد ما يشوف الرادار فين

راعى كمان ان مكان الرادار بيتغير و مش كل مرة بيتحط فى نفس المكان... دا غير ان كلمة "فيه رادار على الطريق" بتخخلى الواحد حذر اكتر عشان مفيش تحديد لمكان الرادار بالتالى احتمال وجودة بيبقى على مسافة كبيرة

اقتباس:

---

* اللى معاه كاشف رادار مش هايهمه منه لأنه هايعرف يهدى امتى و يجرى باقى الطريق

---

هو فيه كام واحد عندة كاشف رادار اساسا؟؟؟ و هل تعتقد ان عددهم اكتر من الناس اللى مش حتشوف المطب و تركبة بسرعتها؟؟؟

اقتباس:

---

* لو حد من الناس الواصلة مش هايهمه أى رادار لأنه ماحدش هايقول له حاجة و هايجرى

---

اذا انت عايز مطب عشان الناس الواصلة و يتضرر بسببة باقى الناس؟؟؟ و نرجع برضة و نقول ان السواد الاعظم من الناس اللى سايقة مش "واصلين" ولا معاهم كاشف رادار و بالتالى مينفعش يبقى الناس دى الاساس فى ايجاد حل

اقتباس:

---

يبقى المطب يكسب ولا ايه رأى حضرتك ؟؟

---

لا برضة الرادار يكسب

وبعدين ايه الحكمة انى اخللى سرعة العربيات تنزل لصفر على طريق سريع متحدد فيه السرعة ب 90 كيلو فى الساعة... ما كدة انا بعمل اختناق مرورى و بدى فرصة للحوادث انها تحصل لان اساسا الطريق دة سريع

و كمان مش من المطقى خالص انى اعاقب كل الناس عشان قلة بتجرى... انا زنبى ايه البس مطب على 90 كيلو عشان فيه ناس بتجرى؟؟؟ الصح ان اللى يخالف يتعاقب مش نعاقب الكل

و بعدين فى الاخر اللى بيوجع اى واحد الفلوس... لما واحد يتهبد 500 جنية مخالفة مش حيجرى تانى حتى فى وسط الصحراء... لكن ايه ذنب واحد ماشى محترم يتهبد المطب و عربيتة تبوظ او يفرمل و اللى وراه يلبس فيه و يبوظلة عربيتة؟؟؟؟؟

المطب الصناعى يتعمل قبل تقاطع مثلا او عند مدخل منطقة سكنية او مدرسة لان سرعتك بتبقى بالفعل قلت كتير و التهدية مش حتسبب حوادث اضافة الى ان تهدئة سرعة العربية ضرورة للحفاظ على الارواح

لكن وجود مطب صناعى على طريق سريع يعتبر درب من دروب التخلف اللى بتبلينا بيها البلد زى كدة صفوف عين القط اللى فى وسط نفق الازهر و تبقى انت ماشى فى امان الله و تلاقى واحد ناصح جدا مهدى و ماشى بسرهة 5 كيلو فى الساعة عشان يعدى عيون القط... غالبا ما بينتهى الموضوع بان عربيتة تبقى هاتشباك لما واحد يرزعها من ورا...


و زى برضة المطباط اللى فى اخر طريق العاشر و انت داخل على الدائرى... لا ليها لزمة ولا منها حكمة ولا حد شايفها... اهى بلاوى بتتحدف على الناس كدة و خلاص... مينفعش المطبات تترمى عمال على بطال خصوصا على الطرق السريعة

MMamdouh

باشمهندس ممدوح
أولا احب اشكرك على ردك و بصراحة انا مستمتع بالنقاش معاك لأن بتعجبنى طريقتك فى توضيح وجهة نظرك

و لكن اسمح لى اتفق معاك فى نقط و اختلف فى نقط

أولا انا مش باقول المطبات الصناعية هى الحل المثالى و بكده نبقى جبنا الديب من ديله .. اكيد لأ و لكن انا باقارنها بالرادار و باشوف مين فعال اكتر

اقتباس:

---

المشاركة الأصلية كتبت بواسطة MMamdouh

انت افترضت ان كل اللى سايقين شايفين المطب ...لاحظ ان المطب ممكن واحد ميشوفوش و يدخل فيه بسرعتة و يفقد التحكم فى العربية و يعمل حادثة.... او حتى يفاجاء بالمطب فا يفرمل جامد فا اللى وراه يلبس فيه... تخيل الموقف بلبل مش الصبح
MMamdouh

---

موافق على كلام حضرتك و لكن
أولا فيه اشارات توضيحية قبله و زى ما قلت قبل كده انها منورة ليل و نهار
ثانيا بنفس مبدأ اللى مش هاياخد باله من المطب و يعمل حادثة فطبيعى انه ممكن ما ياخدش باله من عربية طالعة من تقاطع الشيخ زايد مثلا او واحد بيعدى من عند هايبر ون و اعتقد مع السرعات الفظيعة اللى الناس بتمشى بيها هناك هاتبقى مصيبة
ثالثا مش كل اللى سايق مش ها ياخد باله من المطب بدليل انه من ساعة ما عملوهم حتى الآن مافيش منهم حوادث و لكن طريق اكتوبر كنت بتشوف فيه يوميا حادثة سرعة على الأقل

اقتباس:

---

المشاركة الأصلية كتبت بواسطة MMamdouh

طيب هو مكان الرادار حيتحفظ و مكان المطب مش حيتحفظ؟؟؟... و بعدين لما بيبقى فيه رادار الناس بتقعد تقلب نور من الجانب المعاكس و بتلاقى كل الناس لمت نفسها لخوفها من الرادار و على الاقل حيفضل مهدى لحد ما يشوف الرادار فين

راعى كمان ان مكان الرادار بيتغير و مش كل مرة بيتحط فى نفس المكان... دا غير ان كلمة "فيه رادار على الطريق" بتخخلى الواحد حذر اكتر عشان مفيش تحديد لمكان الرادار بالتالى احتمال وجودة بيبقى على مسافة كبيرة
MMamdouh

---

لا والله يا باشا
أولا المطب مش واحد ... دول كتير و لكن هاتحط كام رادار على الطريق ؟؟؟
و بعدين المشكلة فى الرادار فى كذا حاجة ، لما يتعرف مكانه ، ناس ما بيهمهاش الرادار من بابه (لأى سبب كان) ، ممكن تتمسك انت غلط علشان عديت من عربية و سرعتك بقت 92 لثانية بدل 90 القصوى ...الخ

و بعدين لو كلمة رادار على الطريق بتخلى الناس حذرة امال السرفيس و البيجو و الميكروباصات و اتوبسات السياحة على الطرق السريعة بتجرى ازاى ؟؟؟و فوق السرعة القانونية بمراحل

اقتباس:

---

المشاركة الأصلية كتبت بواسطة MMamdouh

هو فيه كام واحد عندة كاشف رادار اساسا؟؟؟ و هل تعتقد ان عددهم اكتر من الناس اللى مش حتشوف المطب و تركبة بسرعتها؟؟؟
MMamdouh

---

سعادتك ادخل على الموضوعات دى فى المنتديات (و منهم منتدانا الغالى) و تعرف هما قد ايه
الموضوع منتشر جدا دلوقت

اقتباس:

---

المشاركة الأصلية كتبت بواسطة MMamdouh

اذا انت عايز مطب عشان الناس الواصلة و يتضرر بسببة باقى الناس؟؟؟ و نرجع برضة و نقول ان السواد الاعظم من الناس اللى سايقة مش "واصلين" ولا معاهم كاشف رادار و بالتالى مينفعش يبقى الناس دى الاساس فى ايجاد حل
MMamdouh

---

يا باشمهندس انا ذكرت الناس الواصلة و اللى معاهم كاشف رادار كأمثلة مش للحصر
طب مش تقليب النور متبع (زى حضرتك ما ذكرت) ؟؟؟ يعنى كل الناس عرفت الرادار فين و هدت عنده و بعده الجنان يشتغل تانى

اقتباس:

---

المشاركة الأصلية كتبت بواسطة MMamdouh

لا برضة الرادار يكسب

وبعدين ايه الحكمة انى اخللى سرعة العربيات تنزل لصفر على طريق سريع متحدد فيه السرعة ب 90 كيلو فى الساعة... ما كدة انا بعمل اختناق مرورى و بدى فرصة للحوادث انها تحصل لان اساسا الطريق دة سريع

و كمان مش من المطقى خالص انى اعاقب كل الناس عشان قلة بتجرى... انا زنبى ايه البس مطب على 90 كيلو عشان فيه ناس بتجرى؟؟؟ الصح ان اللى يخالف يتعاقب مش نعاقب الكل
MMamdouh

---

يا باشمهندس لو الناس بتمشى فى طريق اكتوبر على 90 كان يبقى جنة ، و بعدين مين قال انه سريع اصلا و لا نحسب صلاح سالم انه سريع هو كمان
خلينا صرحاء فى النقطة دى ، ده لما كنت بامشى عليه بتبقى عينى فى وسط راسى لأحسن صاروخ و لا طيارة جاية من ورا تلبس فى و انا على 90 لأن (و اكيد حضرتك عارف) كانوا بيمشوا على سرعات فوق ال110 على اقل تقدير

و بعدين مين قال قلة ؟؟؟ شوف سعادتك عربيات الشباب المستهتر ماشية ازاى ؟؟ السرفيس ماشى على كام ؟؟ ده حتى النقل بتاع المصانع و المطابع بتاعة الجرايد كانوا بيمشوا على سرعات قاتلة ... يبقى كل دول قلة ؟؟؟

و مرة تانية نتكلم بصراحة ... كام مخالفة بتشوفها صاحبها بيتعاقب ؟؟؟
(و بلاش نقول المفروض كده لأن المفروض حاجات كتير و ما بتحصلش)
من يومين مجموعة شباب فى لانسر بومة الساعة 6 مساء بيجروا فى ش جامعة الدول و عند الأشارة اللى قبل ش سوريا فيه تكدس فالفرامل ما سعفتوش علشان السرعة بتاعته فلوش يمين و شمال و لبس 3 عربيات فى بعض و بعدين طلع يجرى و ماحدش عمل له حاجة (طبعا سيادتك فاهم معنى كلمة عند الأشارة يبقى ايه )

اقتباس:

---

المشاركة الأصلية كتبت بواسطة MMamdouh

و بعدين فى الاخر اللى بيوجع اى واحد الفلوس... لما واحد يتهبد 500 جنية مخالفة مش حيجرى تانى حتى فى وسط الصحراء... لكن ايه ذنب واحد ماشى محترم يتهبد المطب و عربيتة تبوظ او يفرمل و اللى وراه يلبس فيه و يبوظلة عربيتة؟؟؟؟؟
MMamdouh

---

لا لا لا يا باشمهندس
الفلوس بتوجع الناس اللى زينا اللى بتشقى و تتعب فيها و عارفة قيمتها
لكن اللى معاه عربية بربع و لا بنص مليون و عمال يجرى بيها ال 500 جنيه دول مصروف يوم و لا اتنين بالنسبة له
اللى شغال سواق على عربية نقل او سرفيس مش فارقة معاه لأنه مش بيدفع حاجة

طبعا اللى محترم مالوش ذنب عربية تلبس فيه من ورا و تبوظله عربيته و لكن الأحتمال اكبر بكتير ان نفس المحترم يعمل حادثة بسبب اللى بيجروا و ممكن هما اصلا يلبسوه فى حد و يهربوا بالف سلامة ، و الله العظيم شفتها كتير على طريق اكتوبر و بيبقى هاين على انى اجيب نمرة المتسبب فى الحادثة او الحقه و اوقفه باى طريقة و لكن هيهات ، ماهو فلت خلاص

اقتباس:

---

المشاركة الأصلية كتبت بواسطة MMamdouh

المطب الصناعى يتعمل قبل تقاطع مثلا او عند مدخل منطقة سكنية او مدرسة لان سرعتك بتبقى بالفعل قلت كتير و التهدية مش حتسبب حوادث اضافة الى ان تهدئة سرعة العربية ضرورة للحفاظ على الارواح
MMamdouh

---

طب ماهو ده اللى حاصل فعلا
* عند هايبر ون
* عند مدخل الشيخ زايد
* قبل الملف الجامد و اليو تيرن اللى بعد الشيخ زايد بشوية
* قبل ميدان جهينة
*قبل جامعة مصر

و لكن قبل المطبات العربيات عمرها ما كانت بتهدى عند الأماكن دى ... الطيارات و الصواريخ كانت بتبقى شغالة

اقتباس:

---

المشاركة الأصلية كتبت بواسطة MMamdouh

لكن وجود مطب صناعى على طريق سريع يعتبر درب من دروب التخلف اللى بتبلينا بيها البلد زى كدة صفوف عين القط اللى فى وسط نفق الازهر و تبقى انت ماشى فى امان الله و تلاقى واحد ناصح جدا مهدى و ماشى بسرهة 5 كيلو فى الساعة عشان يعدى عيون القط... غالبا ما بينتهى الموضوع بان عربيتة تبقى هاتشباك لما واحد يرزعها من ورا...


و زى برضة المطباط اللى فى اخر طريق العاشر و انت داخل على الدائرى... لا ليها لزمة ولا منها حكمة ولا حد شايفها... اهى بلاوى بتتحدف على الناس كدة و خلاص... مينفعش المطبات تترمى عمال على بطال خصوصا على الطرق السريعة

---

MMamdouh



عين القط دى بلوة فى مصر .. الناس بدل ما تهدى بتقف و كأن عين القط فيها سكاكين بتقطع الكاوتش
انا متفق معاك فى النقطة دى
و متفق معاك فى ان المطبات ما ينفعش تترمى عمال على بطال
انا باتكلم على وجودها فى طريق اكتوبر فقط
و لكن انا شايف انها حاليا على طريق اكتوبر نفعها اكبر من ضررها

و عموما انا سعيد جدا بالنقاش معاك و اتمنى لو اسمع ردك على اللى انا قلته دلوقت

و تحياتى

كويس والله فى اهتمام بارواح البشر اهوه

ياجماعة اللى يمشى فى الطريق ده ياخد باله عقبال الباقى

شكرا يا دكتور

ألف شكر على التنبيه

اقتباس:

---

المشاركة الأصلية كتبت بواسطة Dr.Sherif Mansy

باشمهندس ممدوح
أولا احب اشكرك على ردك و بصراحة انا مستمتع بالنقاش معاك لأن بتعجبنى طريقتك فى توضيح وجهة نظرك

---

ربنا يخلليك يا دكتور

اقتباس:

---

و لكن اسمح لى اتفق معاك فى نقط و اختلف فى نقط

أولا انا مش باقول المطبات الصناعية هى الحل المثالى و بكده نبقى جبنا الديب من ديله .. اكيد لأ و لكن انا باقارنها بالرادار و باشوف مين فعال اكتر

---

بالضبط و هو دة هدف المناقشة الاول

اقتباس:

---

موافق على كلام حضرتك و لكن
أولا فيه اشارات توضيحية قبله و زى ما قلت قبل كده انها منورة ليل و نهار
ثانيا بنفس مبدأ اللى مش هاياخد باله من المطب و يعمل حادثة فطبيعى انه ممكن ما ياخدش باله من عربية طالعة من تقاطع الشيخ زايد مثلا او واحد بيعدى من عند هايبر ون و اعتقد مع السرعات الفظيعة اللى الناس بتمشى بيها هناك هاتبقى مصيبة
ثالثا مش كل اللى سايق مش ها ياخد باله من المطب بدليل انه من ساعة ما عملوهم حتى الآن مافيش منهم حوادث و لكن طريق اكتوبر كنت بتشوف فيه يوميا حادثة سرعة على الأقل

---

انا سعيد ان المطبات مسببتش حوادث بس انا شوفت قبل كدة حوادث بسبب مطبات زى كدة خصوصا لما تبقى لسة معمولة جديد و محدش عارف مكانها... كمان اللوحات الارشادية بتبقى محطوطة غلط و بينها و بين المطب 2 سنتى و على ما تشوف اليافطة تكون ركبت المطب بالفعل... انا ساعات بحس انهم بيعملوا كدة عن عمد

اقتباس:

---

لا والله يا باشا
أولا المطب مش واحد ... دول كتير و لكن هاتحط كام رادار على الطريق ؟؟؟
و بعدين المشكلة فى الرادار فى كذا حاجة ، لما يتعرف مكانه ، ناس ما بيهمهاش الرادار من بابه (لأى سبب كان) ، ممكن تتمسك انت غلط علشان عديت من عربية و سرعتك بقت 92 لثانية بدل 90 القصوى ...الخ

---

مهى الفكرة فى "وجود الرادار" و دة اللى بخللى الناس حذرة و تغيير مكانة باستمرار زى ما بيحصل حيقلل من فرص موضوع حفظ مكانة... السؤال الاهم... هل المسافة بين كل مطب و التانى تسمح ان واحد يعدى السرعة القانوية؟... يعنى هل ممكن واحد يجيب 100 كيلو بين مطبين؟؟؟... لو دة ممكن يبقى برضة المطبات مش فعالة بالدرجة اللى هى

اقتباس:

---

و بعدين لو كلمة رادار على الطريق بتخلى الناس حذرة امال السرفيس و البيجو و الميكروباصات و اتوبسات السياحة على الطرق السريعة بتجرى ازاى ؟؟؟و فوق السرعة القانونية بمراحل

---

الناس دى بتعمل كذا فردة على الطريق رايح جاى و بينبهوا بعضهم... بالتالى لو واحد عدى و ملقاش رادار بيفضل يجرى رايح جاى طول اليوم و العكس بالكس لو فيه لجنة كلهم بيبلغوا بعض و حتى فى الموقف بيبقوا عارفين ان فيه رادار على الطريق

اقتباس:

---

سعادتك ادخل على الموضوعات دى فى المنتديات (و منهم منتدانا الغالى) و تعرف هما قد ايه
الموضوع منتشر جدا دلوقت

---

ماشى هو اكيد انتشر عن زمان بس برضة لسة موصلش لدرجة ان يبقى السواد الاعظم من الناس معاها كاشف رادار... صح؟

اقتباس:

---

يا باشمهندس انا ذكرت الناس الواصلة و اللى معاهم كاشف رادار كأمثلة مش للحصر
طب مش تقليب النور متبع (زى حضرتك ما ذكرت) ؟؟؟ يعنى كل الناس عرفت الرادار فين و هدت عنده و بعده الجنان يشتغل تانى

---

مع تقليب النور الوضع مختلف لسبب... الناس بتقلب نور مسافة كبيرة من بعد اللجنة من الاتجاة المعاكس فا الناس بتبقى ماشية متكهربة طول السكة... مرة كان فيه رادار عند ميراج ستى اللى على الدائرى و كان فيه ناس بتقلب نور من عند كارفور... اذا انت غطيت مساحة كبيرة جدا من الطريق برادار واحد لان الناس بتخاف و التقليب بيجيب نتيجة فعلا... صحيح الناس مبتتقفش رادار لكن على الاقل بيمشوا قانونى غصب عنهم و هو المطلوب

اقتباس:

---

يا باشمهندس لو الناس بتمشى فى طريق اكتوبر على 90 كان يبقى جنة ، و بعدين مين قال انه سريع اصلا و لا نحسب صلاح سالم انه سريع هو كمان
خلينا صرحاء فى النقطة دى ، ده لما كنت بامشى عليه بتبقى عينى فى وسط راسى لأحسن صاروخ و لا طيارة جاية من ورا تلبس فى و انا على 90 لأن (و اكيد حضرتك عارف) كانوا بيمشوا على سرعات فوق ال110 على اقل تقدير

---

هو الطريق دة مش سريع اصلا؟؟؟ مش دة امتداد من محور 26 يوليو حتى مدخل مدينة اكتوبر؟؟ اذا دة طريق سريع... صح؟؟

الخطاء بقى الاساساى هو ان يتعمل U turns قريبة من اماكن خروج الناس من زايد و من هايبر بالشكل اللى يخللى الناس دى اشبة بالسلحفاة فى وسط طريق سريع... اضافة لكدة فيضان المشاه اللى بيعدوا طريق زى كدة... المفروض يبقى الU turn ابعد من كدة بكتير و يتعمل كوبرى مشاة... لكن الوضع الموجود حاليا هو درب من دروب التهريج

نفس الموقف موجود فى الU turn اللى فى المنصة... و انت ماشى على منزل اكتوبر و متجة على المنصة تلاقى واحد ماشى بسرعة 2 كيلو فى الساعة قاطع الطريق بالعرض و بلف من قدامك... و انا شوفت حوادث بالهبل فى الحتة دى... كان زمان الU turn عند نادى الزهور و الحياه حلوة... لكن واحد عبقرى قرر عمل ملف فى الحتة دى عشان تحصل مصايب... و غالبا هو نفس الشخص اللى قرر يعمل خطوط عبور مشاة فى صلاح سالم امام الازهر بارك بالرغم من عدم وجود اشارة ضوئية عشان العربيا تقف و الناس تمشى... و بما ان دة مستحيل يتعمل فى صلاح سالم و الحكومة مش طالبة معاها كوبرى مشاه فا توقع الكثير و الكثير من الحوادث و القتلى فى الحتة دى خصوصا فى الاعياد

اقتباس:

---

و بعدين مين قال قلة ؟؟؟ شوف سعادتك عربيات الشباب المستهتر ماشية ازاى ؟؟ السرفيس ماشى على كام ؟؟ ده حتى النقل بتاع المصانع و المطابع بتاعة الجرايد كانوا بيمشوا على سرعات قاتلة ... يبقى كل دول قلة ؟؟؟

---

انا قصدى قلة مقارنة بباقى الناس اللى بتستعمل الطريق

اقتباس:

---

و مرة تانية نتكلم بصراحة ... كام مخالفة بتشوفها صاحبها بيتعاقب ؟؟؟
(و بلاش نقول المفروض كده لأن المفروض حاجات كتير و ما بتحصلش)

---

انا بصراحة شوفت كماين الرادار على الدائرى مضبطة الناس تمام و كلة بيتاخد رخصة

اقتباس:

---

من يومين مجموعة شباب فى لانسر بومة الساعة 6 مساء بيجروا فى ش جامعة الدول و عند الأشارة اللى قبل ش سوريا فيه تكدس فالفرامل ما سعفتوش علشان السرعة بتاعته فلوش يمين و شمال و لبس 3 عربيات فى بعض و بعدين طلع يجرى و ماحدش عمل له حاجة (طبعا سيادتك فاهم معنى كلمة عند الأشارة يبقى ايه )

---

طيب هل معنى كدة اننا نعمل مطبات فى جامعة الدول ولا نحط رادار؟؟؟ العقوبة لازم تبقى غليظة و مش عقوبة مادية... يعنى دى اسمها hit & run ولازم تبقى عقوبتها حبس مش مجرد غرامة لان الغرامة مع الناس دة بتبقى فكة

اقتباس:

---

لا لا لا يا باشمهندس
الفلوس بتوجع الناس اللى زينا اللى بتشقى و تتعب فيها و عارفة قيمتها
لكن اللى معاه عربية بربع و لا بنص مليون و عمال يجرى بيها ال 500 جنيه دول مصروف يوم و لا اتنين بالنسبة له
اللى شغال سواق على عربية نقل او سرفيس مش فارقة معاه لأنه مش بيدفع حاجة

---

you got that right

اقتباس:

---

طبعا اللى محترم مالوش ذنب عربية تلبس فيه من ورا و تبوظله عربيته و لكن الأحتمال اكبر بكتير ان نفس المحترم يعمل حادثة بسبب اللى بيجروا و ممكن هما اصلا يلبسوه فى حد و يهربوا بالف سلامة ، و الله العظيم شفتها كتير على طريق اكتوبر و بيبقى هاين على انى اجيب نمرة المتسبب فى الحادثة او الحقه و اوقفه باى طريقة و لكن هيهات ، ماهو فلت خلاص

---

لا حول ولا قوة الا بالله... حسبنا الله و نعم الوكيل

اقتباس:

---

طب ماهو ده اللى حاصل فعلا
* عند هايبر ون
* عند مدخل الشيخ زايد
* قبل الملف الجامد و اليو تيرن اللى بعد الشيخ زايد بشوية
* قبل ميدان جهينة
*قبل جامعة مصر

---

ماشى كل ما سبق عادى ماعدا منطقة كارفور... المنطقة دى مش سكنية ولا منطقة مدارس و مفيهاش مكان عبور مشاه اصلا بالتالى وجود المطبات غير مبرر

اقتباس:

---

عين القط دى بلوة فى مصر .. الناس بدل ما تهدى بتقف و كأن عين القط فيها سكاكين بتقطع الكاوتش
انا متفق معاك فى النقطة دى
و متفق معاك فى ان المطبات ما ينفعش تترمى عمال على بطال
انا باتكلم على وجودها فى طريق اكتوبر فقط
و لكن انا شايف انها حاليا على طريق اكتوبر نفعها اكبر من ضررها

---

انت عارف احنا بنعمل ايه دلوقتى؟؟؟ بنحاول نلاقى اى محلل للمشاكل المستعصية فى مصر.... يعنى فى الاساس المشكلة هى فى قلة او عدم وعى الناس بقوانين المرور و من ثم الالتزام بيها... و البعض الاخر عارف القوانين و بيخرقها لان مفيش رادع قوى... اضافة الى كدة الى ان النوعية دى من الناس متربتش على احترام القوانين... هما بس اتعلموا يلزموا لما يبقى فيه رقيب

اول ما الرقيب دة يختفى يعملوا اللى هما عايزينة و دى ثقافة الواحد بيتربى عليها من صغرة و مستحيل تغييرها او على الاقل صعب جدا جدا لاننا شعب اتربى على ان الفهلوة شطارة و الالتزام بالقوانين قلة حيلة

يضاف الى كدة العباقرة اللى بيصمموا الطرق اساسا و اللى اعتقد محدش فيهم فاهم هو بيعمل ايه... و مثال على كدة القصة بتاعت طريق المنصة و قبلها كوبرى السيدة عائشة اللى العربيات بتقع من علية و كمان الاختناق اللى بيعملة كوبرى الجلاء (كوبرى حارتين بعد شارع 4 حارات) بالاشارة بتاعتة (هو لية اصلا فيه اشارة طالما الاتجاة العمودى له نفق تحت الارض؟؟) و طبعا الرصيف الفاصل فى وسط شارع القصر العينى اللى هو اساسا شارع اتجاة واحد و بالتالى ملوش اى لزمة الرصيف و طريق العاشر اللى 70% من عرضة عبارة عن جزيرة وسطى و الطريق بتاع العربيات مخنوق جدا الخ الخ الخ

المشكلة مش مشكلة طريق 6 اكتوبر... دى مشكلة سلوكيات شعب و الية تخطيط و تنفيذ عاجزة

اقتباس:

---

و عموما انا سعيد جدا بالنقاش معاك و اتمنى لو اسمع ردك على اللى انا قلته دلوقت

و تحياتى

---

و انا اسعد يا دكتور و الله و انا بحب دايما ادخل فى مناقشات مع الماس المثقفة اللى زيك و نتبادل وجهات النظر بشكل حضارى... خصوصا ان العثور على شخص يتقبل وجهة نظرك و يتناقش معاك فيها بموضوعية بقى شبة مستحيل فى زمن اصبح كل واحد فيه يعتقد انه عالم بظواهر الامور و بواطنها و باقى الناس جهلة

بكرر شكرى مرة تانية ليك و انا فعلا سعدت بالتحاور معاك

MMamdouh

انا بكره المطبات ...
المطبات فعلاً تعتبر كارثة على الطرق السريعة

حد عارف مطار المنصورة الحربي؟ ( على طريق المنصورة-السنبلاوين)
المهم..
مدخل المطار له طريق متفرع من الطريق السريع اللي انا بتكلم عليه.. فجأة.. لقينا مطب (جبل) قبل المدخل .. طبعا بدون لوخات تحذيرية و الكلام دا ... طبعا الناس اللي عالطريق متعودة الحتة دي في الطريق سريعة مفيش مشاكل.. فجأة نلاقي حوادث فظيعة عند المطب و رمل واقع و ظلط واقع .. كل دا عند المطب الجديد . و حوادث حدث ولا حرج .. من ميكروباصات دخلت في عربيات ملاكي صغيرو اتقلبت بالناس اللي فيها .. الي عربيات نقل ضخمة تدخل في الحاجز الخرسانى هي و عربيات تانية ... ( قمة التهريج يعني )
بعد سلسلة الحوادث.. ركبوا لافتة تحذيرية و الناس خلاص عرفت مكان المطب و اتعودنا عليه
تشاء الظروف ان في "شخصية هامة" هتيجي المنصورة عن طريق المطار .. طبعا المطب إتشال... مع وجود اللوحة التحذيرية بس الناس اتعودت ان المطب الحمد لله اتشال و بطلت تهدي...
بعد ما الشخصية الهامة جت و مشيت المطب رجع تاني!! اه و الله و الكلام دا انا شفته بنفسي
و اتكررت مهازل الحوادث تاني...
و تشاء الظروف ان تأتي شخصية هامة اخرى لجامعة المنصورة ايام اسبوع شباب الجامعات ... المطب اتشال تاني .. و طلت اللافتة التحذيرية فقط .!!

حتى الآن توجد لافتة تحذيرية لمطب لكن لا يوجد مطب في تلك المنطقة!
و حسبي الله و نعم الوكيل في المسؤولين عن طرف السريعة اللي مش عارفين يسيطروا على المسرعين يقوموا يقرفوا كل الناس و يتلفوا ممتلكاتهم و يفقدوهم ارواحهم

شكرا على المعلومه