Octavia A5 2008

**ibrahim_awwad** · 07-10-2007 02:25 PM

صباح الفل ورمضان كريم، انا معروض عليا أوكتافيا A5 2008 بكل الكماليات ما عدا فتحة السقف بس خليجى وتمنها 179 يعنى بتخفيض اكتر من 12 الف عن الوكيل مع العلم بإن الوكيل مانزلش 2008 لسه.
ممكن النصيحة الله يخليكوا؟؟

**NaderNabil** · 07-10-2007 03:55 PM

أنا مش مطمن لموضوع 2008 ده
علشان وقت ماكنا بنشتري من التوكيل قالولنا مينفعش التجار ينزلوا موديل السنة اللي جاية قبل الوكيل
أنا عيزك تتأكد من حاجة...بس على رقم الشاسية اللي موجود تحت البرابريز نحية السواق
و بص على اخر رقم من اليمين لو 7 يبقى 2007 لو 8 يبقى 2008

**ibrahim_awwad** · 07-10-2007 04:45 PM

أصل ديه مش من الوكيل دي خليجى بس انا هاتفرج على العربية النهارده وهاشف 7 ولا 8. بس انا مش عارف لو خليجى اتكل على الله ولا لأ؟؟

**Heshaam** · 07-10-2007 05:25 PM

رغم كل مساوئ معظم التوكيلات في مصر إلا إن الضمان له تمنه

وكمان المبلغ اللي حضرتك هتدفعه ده ما يحتملش المغامرة لو لا قدر الله طلع فيها مشكلة

رأيي خليك مع التوكيل أفضل حتى لو هتستنى شوية (وكمان لو مش هيفرق معاك أنه لو 2008 نزل ممكن تلاقي بواقي 2007 رخصت سوية وبرضه بالضمان)

وربنا يوفقك

**ibrahim_awwad** · 07-10-2007 05:40 PM

شكراً جزيلاً والله انا محتار فعلاً ربنا يستر

**Sharky** · 08-10-2007 01:30 AM

رأيي خليك مع التوكيل أفضل حتى لو هتستنى شوية (وكمان لو مش هيفرق معاك أنه لو 2008 نزل ممكن تلاقي بواقي 2007 رخصت سوية وبرضه بالضمان)

+1
لإن أى عيب فى العربيات دى بيكلف مبلغ محترم و التوكيل حيقولك ماليش دعوة دى خليجى
طبعا مش حتبقى وقتها وفرت فلوس

**Ahmed Samy** · 08-10-2007 03:33 AM

التوكيل أصلا بيقوللك أنا ماليش دعوة الأول تقوم تزعق , ينقل على plan B اللي هي نصلح مرة و اتنين و تلاته لحد ما يطلع عينك ويبقى نفسك تروح بره بس فلوسك واجعاك
بد كده plan C انه يقوللك هانبعت نجيب أم الخلول من ألمانيا بعد شهر

و الله كل اللي معاه العربيات التوكيل و حصله حاجه بيضرب نفسه بال .......العصاية

**Ahmed Anwer** · 08-10-2007 03:52 AM

مش للدرجة يا أ/ أحمد في توكيلات كتير بتخاف علي سمعتها
علي الأقل كناحية نفسية بتحس إنك مطمن و معاك ضمان
لأ طبعا ،، الضمان مهم جدا ،،
مع قلة الضمير في بلدنا للأسف ، سواء من الوكلاء أو من التجار اللي متضمنش هما جايبين العربيات دي منين ، اهي ورقة بتبقي مريحاك

**Sharky** · 08-10-2007 10:06 AM

مش للدرجة يا أ/ أحمد في توكيلات كتير بتخاف علي سمعتها
علي الأقل كناحية نفسية بتحس إنك مطمن و معاك ضمان
لأ طبعا ،، الضمان مهم جدا ،،
مع قلة الضمير في بلدنا للأسف ، سواء من الوكلاء أو من التجار اللي متضمنش هما جايبين العربيات دي منين ، اهي ورقة بتبقي مريحاك

+1

**mm_aaziz** · 09-10-2007 02:36 PM

وكيل سكودا اوحش توكيل فى مصر وانا واصحابى مسمينيه توكيل المتسولين ، ببساطة لان كل العاملين فيه من المهندس للبواب بيقولولك "اى خدمة يا باشا" وطبعا بينتظروا المعلوم ، والا فانت من المغضوبين عليهم.
فى معارض محترمة بتدى ضمان على الخليجى مثل ناشيونال موتورز و موتور سيتى ، والعربية الخليجى مواصفاتها احسن و سعرها ارخص ، ومواصفاتها احسن لمصر عن الوكيل اللى مش عايز يعترف ان مصر جواها اصبح مثل الخليج و يحتاج مواصفات خاصة فى تكييف السيارة والطلاء و خراطيم الموتور والفيبر والكاوتش المستخدم فى السيارة.
تخيلوا سيارة الوكيل فيها سخانات للكراسى؟ دى مواصفات مصر ولا كندا؟