الموضوع: النقد الموضوعى

السلام علبكم ورحمة الله وبركاته

لقد تبادلنا الاراء انا والاستاذ توت فى موضوع سابق نقطة حرية ابداء اى شخص لرايه فى اى شىء حتى لو لم يستطع تجربة هذا الشىء بشكل مباشر وعلى سبيل المثال الاعضاء الذين لم يمتلكوا العربية او لم يتعاملو مع التوكيل بعد بس انا حبيت بس ااكد على نقطه تانيه برضه عشان برضه احقاقا للحق تكون الامور واضحة للجميع خاصة بعد انتشار مواضيع كتير فى الفترة الاخيرة فيها كتير هجوم على بعض الاشياء تخص العربية و التوكيل وسواء كان الدافع النقد الموضوعى او غيره احب برضه زى مادافعت باستماته عن حرية ابداء الراى لكل الاعضاء احب برضه فى نفس الوقت نفكر بعضنا ببعض الحاجات اللى ياريت كلنا ناخد بالنا منها وانا كلامى بالاخص المرة دى للاعضاء من غير مالكى العربية وانا واحد منهم


1-زى ماهو من حقنا كلنا ان نقول راينا لازم الراى ده يكون موضوعى بشكل كبير بعيد عن واحد صاحب صاحب اخو واحد صاحبى قال لى مش عارف ايه فى العربية او فى التوكيل . ياريت تكون الاراء مبنية على اساس اراء ناس جربت فعلا واتعرضت لمشاكل وحلتها وبالتالى لما يتكلم حد بناءا على راى سابق لاحد ملاك العربية اكيد هيكون اكثر واقعية عن اى حد تانى


2- ياريت كلنا ناخد بالنا من اى كلمة بنقولها ونبقى عارفين مصدرها كويس لان الاراء او المعلومات مجهولة المصدر بتعمل بلبلة كبيرة جدا لاى حد بيدخل المنتدى وبيدور على معلومة فهو مش ناقص لخبطة اصلا ده غير ان ده بيلقى عبىء كبير جدا على اعضاء المنتدى المحترمين انهم يردوا ويبرروا ويفسروا ويجيبوا امثلة وناقص يجيبوا الكتب والمراجع كمان عشان يوضحوا الصورة ويزيلوا البلبلة الناتجة عن المشاركات اللى احيانا بتضر اكتر ما ينفع


3- ياريت برضه ناخد بالنا مدى اهمية المنتدى للناس لجمع المعلومات اللى بياخدها على انها شبه مسلم بيها من الناس المجربة وعشان كده لازم الكل يتوخى الحرص ويراعى ربنا وضميره فى كل كلمة يكتبها


4 - مش معنى حرية ابداء الراى ان رايك هو دائما صح. لأ انت حضرتك بتقول راى او معلومة قد يوافق عليه الناس او لا يوافقوا او الناس تصحح المعلومة او تنفيها وطبعا من حق حضرتك تدافع عن راييك بس دفاع مش لمجرد الدفاع لا انا بدافع واذا ثبت انى خطأ خلاص مفيش مشكلة والموضوع ينتهى بمنتهى الاحترام مش معنى ان راييك طلع غلط انك وحش ومش معنى ان راييك طلع صح انك احسن من كل الناس التانية الانسان يخطا ويصيب فده عادى


5- ارجوا من كل صاحب راى انه يبقى مقدر ان اصحاب العربية لما بيدافعوا عن حاجه بيبقى مش عشان اثبات راييهم على اد ما بيكون لتوضيح صورة غلط ممكن تلزق وماتنمحيش عن العربية او التوكيل وده ممكن ياثر على اراء الناس بشكل سلبى


6- اعضاء منتدى بروتون هم بمنتهى الامانه والصدق ناس فى غاية الاحترام والادب والعلم وعلى اد حبهم واعجابهم بالعربية ودفاعهم الشديد عنها الا انهم حياديين بشكل كبير جدا ومابيخبوش اى عيب او شىء سلبى وعندكم المواضيع فى المنتدى فيها كل اللى نفسكوا فيه فالناس دى انا عمرى ما شفتها بتدافع عن باطل او بتزور الحق فنصيحة لاى حد الجدال لمجرد الجدال مالوش فايدة فاى نصيحة او راى بيكون لوجه الله فياريت الكل يحترم خبرة الناس وميعاندش لمجرد العناد ويوفر الجهد والعناء اللى الكل بيبذله لتوضيح وتصحيح الصورة


7-ياريت لو اى حد بيعرض مشكلة ما او تجربة سيئه حصلت له وهو لسه بيفكر فى العربية انه يبقى محدد جدا جدا جدا بعيدا عن التهويل او المبالغة او اسلوب التشويق فى العنوان او المقدمه بحيث الكلام قد يوحى بحاجات كتير قليلى الخبرة ممكن يفهموها غلط او يكونوا من خلالها صورة غلط عن اى موضوع فياريت كل كلمه تكون موزونه جدا لتجنب وجود اى تاثير سلبى على اصحاب العربية او الاعضاء الباحثين عن المعلومة او الراغبين فى الشراء


احب فى النهاية بس اؤكد انى لم اقصد احد بعينه فى اى مشاركه او موضوع , الجميع هنا اخوه ولا يجمعنا هنا الا الرغبه فى تبادل المعرفه والخبره بدون اى ضغائن او نوايا سيئه عشان كده اتمنى ان الغرض من كلامى يكون وصل بشكل صحيح وانه يكون اضافه بسيطه لتطوير اسلوبنا للافضل وكل كلامى السابق ده برضه اجتهاد خاص بيا انا مش بحط قواعد او بفرض راى وقد يتفق معى البعض ويختلف البعض الاخر ولكن من المؤكد ان رايى ده لوجه الله ويمثل رغبه حقيقيه لتطوير شكل فى مشاركاتنا وموضوعاتنا لتكون اكثر تطورا وموضوعيه فى المستقبل باءذن الله

سلامى للجميع

المشاركة الأصلية كتبت بواسطة jisso82

أستاذ أحمد كلام جميل و محترم كالعادة و فى مناقشة سابقة مع أيمن بخصوص بعض الأعضاء اللى بيهاجموا العربية من غير ما يشوفوها لايف أصلا مش يجربوها كمان أكدنا على كلام كتير من اللى حضرتك قلته و اتفقنا كمان إن مافيش عربية فى الدنيا هى الأفضل بشكل مطلق و إن ده بيرجع فى الأساس لحاجة الشخص من العربية اللى بيشتريها يعنى فى اللى يهمه الشكل و اللى يهمه الكماليات و اللى يهمه الأساسيات و اللى يهمه الموتور و فى الآخر كل شخص له ظروفه اللى بتفرض عليه فئة سعرية معينة و دايما الواحد بيجيب أحسن حاجة فى حدود المبلغ المتاح ليه يعنى اللى حاطط ميزانية يجيب عربية ب700 ألف جنيه مثلا صعب إقناعه بعربية ب100 ألف مهما كانت إمكانياتها و برده إذا كان حد آخره 60ألف مثلا ما ينفعشى تقوله تعالى على نفسك و جيب ب140 دى فيها حاجات أعلى بكتير.
و أكتر حاجة أحب أعيد عليها فى كلام حضرتك الناس اللى بتسمع معلومة فى أى حتة و من أى مصدر و تيجى ترميها بمعنى الكلمة للأعضاء. لازم يا جماعة الناس تعرف إن ده مش صفحة تعليقات القراء فى مجلة فنية. ده مكان الواحد بيدخله عشان ياخد معلومة أو يأكد على معلومة تفيده فى إنه يشترى سلعة غالية ومهمة و تتعلق بحياته (طبعا الأعمار بيد الله) بس حبيت أوضح أهمية السلعة محور الكلام فأرجو من أى حد يتكلم و يقول رأيه فى حاجة يبقى واثق تمام الثقة من كلامه لأن ممكن بناءا عليه شخص يجيب الحاجة اللى هو شكر فيها أو يسيب الحاجة اللى هو زم فيها و بتهيألى على الرغم إن ده مش موضوع دينى إلا إن ربنا بيحاسبنا على أمانة الكلمة مهما كانت موضعها و لو لقدر الله واحد اتضر ماديا أو معنويا بسبب رأى شخص ما توخاش الدقة الكافية قبل ما يقول رأيه و أثر فى قرار الشراء لناس كتير أعتقد إن تكون انه هيتحمل ذنب أى حاجة هتحصلهم نتيجة الفتوى دى.
آسف للإطالة بس الموضوع فعلا كان محتاج توبيك خاص و شكرا مرة تانية للمميز أستاذ أحمد فتحى.

بالظبط كده زى ما حضرتك بتقول الكلمه امانه يعنى الكلمه دى ممكن تخلى واحد ينخدع فى معلومه او فى راى

يخليه يتضر بعد كده بسببها او على اقل تقدير لا يجد ماكان يعتقد انه موجود فى السيارة او يصرف نظر عن سيارة

فيها كل اللى هو عاوزه فياريت الكل يلتزم الدقه الشديده وخاصة فى المعلومه او فى الراى واى كلمه بتصدر منه

خاصة ان الكلام هنا مش بيبقى بين اتنين اصحاب بيتمشوا بالعربيه كلامهم مش بيخرج بينهم لا دى موقع كبير

ومشهور ناس كتير اكيد بتثق فى اراء الناس اللى فيه

سلامى للجميع