تليفزيون فلات LCD ب1300 جنيه فقط....فكرة مفتكسة
الفكرة دى انا نفذتها عندى فى البيت . وكل ضيوفى اللى اتعزموا عندنا على الفطار اتعقدوا منها وافتكرونى شارى تليفزيون بشوية آلافات كتير فى حين ان الموضوع تلكلف 1300 جنيه فقط
حاليا ارخص تليفزيون فلات LCD ثمنه حوالى 3000 جنيه ، لكن الفكرة اللى هقولهالكم دى هتتكلف 1300 جنيه فقط
المطلوب:
1-مونيتور كومبيوتر فلات، 19 او 20 بوصة( LG وسامسونج ثمنه فى دود 1150 و benq ال 20 بوصة بسماعات ثمنه 1200
2- جهاز TV box وده عبارة عن جهاز بحجم كف اليد ومعاه ريموت كونترول، ثمنه يتراوح من 100 الى 120 جنيه وموجود فى كل مولات الكومبيوتر وفيه منه اكثر من نوع، الجهاز ده بياخد الإرسال التليفزيونى ويطلعه فى شكل VGA ، والريموت كونترول فىيه كل وظائف التليفزيون العادى
2- طقم سماعات كومبيوتر او ووفر وسماعات، ودول ممكن تجيبهم وممكن لأ لأن البوكس نفسه فية سماعة داخلية ، لكن هم طبعا هيفيدوا لتحسين الصوت
كل اللى هتعمله بعد شراء هذة الأشياء انك توصل ايريال التليفزيون فى دخل ال tv BOX وتوصل خرج الvga للشاشة وخرج الصوت للسماعات وبعدين توصل الباور لكل الأجهزة دى، وبعد ما تشغل الأجهزة تبرمج القنوات على الtv BOX من خلال قوائم عادية زى بتاعة اى تليفزيون، وصدقونى النتيجة شكلها مبهر وفى منتهى الاناقة،
فقط فيه ملحوظة صغيرة، لما تشترى الشاشة ممكن تجيب شاشة مربعة ودى هتبين لك الصورة كلها، او تجيب شاشة مستطيلة، ودى صورتها احلى وشكلها تحفة، بس على حساب خسارة جزء بسيط من مساحة الصورة من اعلى ومن اسفل( يعنى الشاشة هتكون مليانة قدامك لكن مش جايبة كل الصورة المرسلة، رايح منها حتة بسيطة من فوق ومن تحت)
حتة خبيثة تانية، حاول تشترى شاشة من ماركة تكون بتصنع تليفزيونات( LG او سامسونج مثلا) علشان لما حد يشوفه يقتنع انه تليفزيون وليس شاشة كومبيوتر
اتمنى الفكرة تكون عجبتكم