الموضوع: التوحيد القياسى للسيارات فى مصر ( فكره للنقاش )

المشاركة الأصلية كتبت بواسطة ahmedfathy77

السلام عليكم ورحمة الله وبركاته

انا جت لى فكره كده حبيت اخد راى الاخوه البروتوناويه فيها والصراحه

انا الفكرة دى جت لى بعد ماشفت مقارنات كتير القسم هنا وفى

قسم المقارنات وشفت شكل المشاركات وكان كتير منها فعلا ناتج

عن خبره كبيره وكتيربرضه ناتج عن الفتى بدون علم ده غير المعارك

اللى بتدب دائما عند الاختلاف فى الاراء وسبق ان اشرت للموضوع ده

قبل كده فى موضوعى ( النقد الموضوعى ) عشان كده قلت طب ليه

مانفكرش فى حل يكون علمى ومحايد بعيد عن الاهواء والافتراضات.

الحل طبعا فيه شىء من الصعوبه بس انا قلت والله انا اطرحه ونناقشه

يمكن ييجى يوم وينفع يتنفذ وحتى لو متنفذش يبقى نلنا شرف

المحاوله للاصلاح وكانت الفكره دى كالاتى :


شوفنا فى الفترة اللى فاتت مشاكل كتير جدا بين العملاء والتوكيلات

والجهه الوحيده اللى كانت بتساعد الناس فى حلها هو جهاز حماية

المستهلك لما بيشكل لجنه من اساتذة الجامعه لدراسة الحاله

وتقييمها عشان كل واحد ياخد حقه فقلت طب ليه ما يبقاش فيه فى

مصر جهه معتمده من الدوله مكونة من اساتذة ميكانيكا السيارات فى

مصر الجهه دى تقوم بعمل اسس واختبارات ومقاييس ثابته لدراسة

السيارات فى مصر الجهه دى يبدا عملها مش لما حد يقدم شكوى لأ

الجهه دى تقوم بدراسة اى موديل سيارة يتم استيراده حاليا او

مستقبلا فى مصر ومش المفروض ان عملها روتينى زى لجان الفحص

فى الجمارك اللى بتحدد الموديل والسى سى والامكانيات ووو انا

بتكلم عن لجنة اول خطوة بتقوم بعملها هى الحاجات دى تحديد دقيق

وشامل لكل تفصيلة فى السيارة وذلك عشان يتثبت مواصفات اى

عربية عندهم وبالتالى محدش يقدر انه ينزل اى عربيه مخالفه

للمواصفات اللى هو اثبتها قبل كده تانى حاجه يتم تحديد الجوده لكل

عنصر فى السيارة يعنى اكيد مثلا المحرك اللى فى الصينى مثلا مش

زى اللى فى مرسيدس حتى لو تشابهوا فى عدد الاحصنه والعزم .



وبرضه تقوم بدراسة جودة المواد المستخدمه فمثلا صاج كل عربية

مش زى التانى ,خامات الصالون بتختلف, الطلاء وجودته بيختلف يعنى

يقوموا باعطاء درجة لجودة كل عنصر يتم دراسته من 10 مثلا ويكونوا

محددين رقم عشرة ده يعنى ايه ومواصفاته ايه وبالتالى هنقدر نعرف

الفرق بين كل سيارة والتانيه حتى لو تشابهوا فى مسميات

المواصفات الخاصه بالسيارة والكماليات ده غير ان الاختبارات دى

ممكن تحدد الاعمار الافتراضيه لكل عنصر وده اكيد عامل مهم جدا جدا

لو هتقارن بين عربيتين واسعارهم



حاجه تانيه مهمه جدا برضه دراستها الا وهى دراسة اداء السيارة

على الارض يعنى لازم يكون فيه تجربه قياده فى ظروف قياسيه يتم

تحديدها بحيث تكون مناسبه لظروف المجتمع المصرى مش قياسيه

منقوله من كتب بتتكلم عن بلاد مايعرفوش فيها شكل المطب والحفر

ايه واعطاء تقييم لكل خاصيه مزوده بها العربيه وتقييم لادائها مثلا من

حيث التسارع واستهلاك البنزين والثبات ووووو بحيث يتم برضه تقييم

كل ما يهم المستهلك فى اداء السيارة وبالطبع بعد عمل الاختبارات

دى اكيد هناخد نتيجه محترمه جدا من متخصصين بعيدين عن شركات

السيارات والوكلاء وسياسات التسويق بحيث لما حد ينزل اعلان فى

الجرنان ويعد يوصف لنا العربية اللى بيسوقها انها امكانات المرسيدس

بسعر 128 يبقى كل الناس فاهمه الحقيقه قبل مايشتروا وبعد كده

نلاقى ناس تقول لك ده التوب جير قال وعاد عن العربية كذا يا عم توب

جير ايه بس اللى بتستشهد بيه اللى بيجربوا فيه عر بيات العادى

بتاعها 500 و600 حصان وتمنها حفنه من الملايين وييجى يتكلم على

عربيه بمقاييسهم السعرية والفنيه عجله بسنادات فبالتالى التوب

جير ده عشان تستمتع بمشاهدة وتجربة عربيات عمرنا ما هنشوفها

الا على النت او لو ربنا كرمك ورحت لهم هناك.



التقرير ده ممكن يتعمل بشكل ملزم يعنى يبقى زى اى وثيقه لا غنى

عنها لدخول السيارة مصر وحتى لو تمن الاختبارات دى اتحملت على

التوكيل والتوكيل حملها على العملاء برضه العميل هو الكسبان لانه

هيبقى عارف هو بيشترى ايه بالظبط مش بيشترى سماعى وده اكيد

هيوفر عليه مصاريف ممكن يتكلفها فى المستقبل نتيجه لانه اشترى

الوهم وانا متاكد ان حاجه زى دى هتبين الفروق الحقيقيه بين العربيات

فى مصر وهتخلى ناس كتير من الوكلاء يتكسفوا ويقيموا عربياتهم

طبقا لامكانياتها مش باساليب الفهلوه والضحك على المستهلكين ده

غير انه هيولد نوع من الشفافيه للعملاء عند الشراء يعنى كل حاجه

هتكون فى النور ومقيمه بلجنه محايده بعيده عن المصالح.



انا عارف انى بحلم حلم قد يعتبره البعض خيال علمى بس ليه

مانجربش نحلم بحاجه صح مره يمكن حد من الناس اللى عندها قدرة

تنفيذ الاقتراح ده فى شكل لجنه او جهه زى دى يشوف الفكره ولو

لقاها مفيده يحاول ينفذها وتعم الفايده فياريت لو حب حد من

حضراتكم يشاركنا الراى فى الموضوع مايكتفيش مثلا انه يقول لى يا

عم انت بتحلم او كلام زى ده لا حضرتك قول لى انت بتحلم بس لو

تخيلنا ان الحلم ممكن يتحقق ممكن يبقى افضل لو عملنا كذا او اضفنا

كذا ومفيش مشكله لو قال ان الفكره اصلا مش كويسه اى راى له

احترامه معلش استحملوا الافتكاسات دى بس برضه اهو نوع من

التغيير اننا نناقش حاجه نتمنى انها تحصل حتى لو صعب تنفيذها

المهم تكون الفكره تستاهل النقاش

سلامى للجميع

رشيد : مواصفة قياسية للسيارات المصرية لتعزيز قدرتها التنافسية

14 نوفمبر 2009 - 15:51


أعلن المهندس رشيد محمد رشيد وزير التجارة والصناعة تطوير المواصفات القياسية للسيارات وفقا للعالمية لتعزيز قدرة الإنتاج المحلي التنافسية وتحقيق أعلى معايير الأمن والسلامة للمستهلك المصري.

وتشمل المواصفة -التي مازالت قيد الإعداد - إلزام المصانع والشركات العاملة في قطاع السيارات بوضع علامة سلامة مصرية طبقا للمعايير العالمية على السيارات المحلية والمستوردة تؤكد للمستهلك أن هذا المنتج أمن ومطابق للمواصفات.وذلك حسب الموقع الرسمي لقطاع الأخبار يوم السبت.

يأتي ذلك في الوقت الذي قال فيه اللواء عفت عبدالعاطي رئيس شعبة السيارات باتحاد الغرف التجارية إن 14 شركة عالمية تعمل محليا بتجميع السيارات بجميع فئاتها من سيارات الركوب إلى النقل والحافلات.

وخلال 2008، بلغ إجمالي الاستثمارات في صناعة السيارات وقطع الغيار في مصر 7 مليارات جنيه.ويعمل بالقطاع أكثر من 75 ألف مصري ، وتشترط الحكومة المصرية أن تصل نسبة المكون المحلى إلى نحو 45% في نشاط تجميع السيارات.

وتعكف هيئة المواصفات والجودة على إعداد مشروع متكامل لتطوير المواصفات القياسية المصرية المتعلقة بقطاع السيارات والمركبات بأنواعها الخاصة والتجارية والصناعات المغذية لها بما يتوافق مع المنظومة الدولية للمواصفات والفحص واللوائح الصادرة من الأمم المتحدة ووفقا للتوجهات الأوروبية تمهيدا لانضمام مصر إلى اتفاقية الأمم المتحدة الخاصة بالمركبات وأجزائها.

وقال الوزير أن الهيئة شكلت لجنة من الخبراء المتخصصين في مجال المركبات وممثلين لعدد من الجهات الأخرى لوضع الاستراتيجية والبرنامج الزمني لتطوير المواصفات الخاصة بالسيارات ونظم تقييم المطابقة بهدف تطوير هذا القطاع ورفع القدرة التنافسية للمنتجات المحلية.

ContactCars | رشيد : مواصفة قياسية للسيارات المصرية لتعزيز قدرتها التنافسية

الحمد لله حلمنا قرب انه يبقى حقيقه قولوا يا رب