مش عارف ليه دايما بتونس بالموضوع ده
علي طول بحب ارجع اقرأ اللي كتبته فيه
بحب اكتر اقرا الردود بتاعتكم عليه
فعلا الفرحه ما تكملش الا بالاحباب
الفتره اللي فاتت اتعرضت لضغوط اقدر اقول عليها انها الاصعب في تاريخ حياتي
لكن بفضل الله و بدعواتكم احبابي كله بيهون و ربنا بيسر الصعب
المهم مش حطول عليكم زي زمان
انا حبيت اقول لكم انكم احلي صحبه و اغلي اهل و احباب
محبتش اكتب في الموضوع اللي ابن امي فتحه بمناسبه زفافي
مش عارف ليه مع اني كل يوم بقراه صبح و ليل
حبيت اكتب هنا يمكن علشان عايز الموضوع هناك يفضل بتاعكم انتم بس
مش عارف
اللي عارفه و متاكد منه ان فرحتي عمرها ما تكمل الا بيكم
يارب يديم الفرحه و الاخوه و المحبه و يجعلنا صحبه مباركه دايما
انا مش باجي المنتدي كتير ليه
انا مش برد علي المكالمات ليه
الحقيقه سببين
السبب الاول و ده انتم عرفينه طبعا و هوه كتر السفر و الترحال من بلد لبلد بطبيعه الشغل و اللي كتير منكم عارفين تفاصيله
السبب التاني و هوه عدم قدرتي علي تحمل الحب و المشاعر الجميله النبيله دي
ده يمكن بسبب ارهاق او تعب او يمكن علشان ما اتعودتش ان فيه حد يهتم بيه و يحبني و يخاف عليه زيكم
فيه انسان بالنسبه للمنتدي عضو و بالنسبه لي اهلي و عزوتي و ناسي الانسان ده علي مدار اسابيع بيبكيني من كتر اهتمامه بيه و حرصه عليه مش عارف اقول ايه و مش حقول اسمه علشان انا عايز الله يكرمه و يجعل اللي بيعملوا معايا في ميزان حسناته
اللي اقدر اقوله له ربنا يخليك ليه يا احلي و اجمل و انبل انسان شفته في حياتي
اللي بتعمله معايا فعلا ما حدش عمله و ما كنتش منتظره من أي انسان
لكن انت و اه منك انت يا اللي في بالي
الجرعه بتاعت امبارح كانت جامده قوي
بجد انا نفسي الله عز و جل يوصلك انت ايه بالنسبه لي
و مش عايز اقول لك انت و اسرتك عندي و عند عيلتي ايه
مسيرك تشوف بعينك يا حبيبي يا غالي
خلاص الايام بتجري و سوف يتم الانتقال من مسكن الاهل الي مسكن الزوجيه
خليط عجيب من المشاعر
ما خبيش عليكم اولها مشاعر الارهاق انا فعلا مرهق لدرجه تمنعني من الاحساس باي حاجه
الفتره اللي فاتت كانت كلها سفريات عجيبه و مكوكيه
لكن اللي بيطغي علي مشاعر الارهاق حاجه اجمل من أي احساس حسيت بيه و هوه فرحه زوجتي و والدتها اللي هيه فعلا امي
شعور غريب انك تحس ان فيه حد فعلا بيسعي انه يفرحك
انا طبعا مش عارف اجمع لاني بشتغل بقالي حوالي 11 ساعه و مش شايف قدامي
ان شاء الله نازل بكره الاسكندريه
الحمد لله كل شيئ تمام و في انتظار تشريفكم ليه يا احباب
انا بتاسف اني ما اقدرتش اخلي الفرح يوم الجمعه لظروف الاجازه بتاعتي لكن تتعوض في افراحكم
رجائي الوحيد ان ما فيش حد يرهق نفسه اكتر من اللازم الله يخليكم
و ان شاء الله انا حكون موجود في مقابله الشهر القادم و تكون فرصه جميله للي مش حيقدر ييجي انه يبارك لي و فرصه اجمل لي اني اغرق في حبكم
بجد بجد بجد ربنا يخلينا لبعض و جزاكم الله كل الخير علي الدعوات الجميله و الامنيات الطيبه اللي في موضوع التهنئه عقبال يارب ما نهني كل العزاب علي زفافهم و كل الازواج علي عوضهم و كل الاباء علي احفادهم
انا حروح انام شويه علشان خلاص ما فيش بنزين و اللمبه منوره و خايف الطرمبه تتسد
ما قولتوليش مين اللي حيسوق عربيتي و انا فيها يوم الفرح
اللي اقدر اقوله ان بجد فرحتي مش حتكمل الا بيكم
و اقبلوا اسفي علي عدم الرد علي الموضوع الخاص بفرحي لاني مصر انه يفضل بتاعكم و اني ما اكتبشي فيه