النجدة!! دواسة الدبرياج عندى عِلْيِت

امبارح بالليل فى لحظة نرفزة غبية قرصت جامد جداً على العربية و أنا طالع بيها ... بعدها على طول فوجئت ان دواسة الدبرياج عليت (يعنى المشوار اللى الدواسة بتطلعه عشان العربية تبدأ تتحرك بقى أطول) و من ساعتها و أنا مخى قاعد يودى و يجيب ... يا ترى ايه اللى حصل و سبِّب الموضوع دة؟ هل كدة الاسطوانة أو الدسك فيهم مشكلة؟ مع العلم ان العربية سحبها لم يقل و زيت الفرامل مستواه طبيعى ... و لو فى مشكلة حصلت هل الضمان يغطيها (العربية لسة مكملة 31 ألف كيلو -- و لم يسبق حدوث أى مشاكل بها اطلاقاً)؟

و فى النهاية عايز أوصى نفسى و إياكم بنصيحة المصطفى صلى الله عليه و سلم "لا تغضب ... لا تغضب ... لا تغضب"

ليه كده يا ابوحميد بلاش نرفزتك تطلع على العربية

انا عارف انها بسيطة وحصلت معايا قبل كده فى الأوبل استرا بس ازاى اتصلحت مش فاكر

لا تقلق

اعتقد رجرشة الدبرياج و الله اعلم

اقتباس:

---

المشاركة الأصلية كتبت بواسطة amrnader

اعتقد رجرشة الدبرياج و الله اعلم

---

+1

معلش يا احمد باشا
ان شاء الله خير وحاجة بسيطة
بس يا ريت ما تسيباهاش وروح هوندا اعملها بسرعة

أشكركم يا جماعة جداً على الرد السريع دة ..

طيب بعد ما أعمل الرجلشة هل اللى حصل دة حيقلل من عمر الاسطوانة؟ و الرجلشة هل بتتعمل عن طريق ضبط محدد من جهاز بحيث يرجع الدواسة لنفس ضبطة الفابريكة وللا الفنى بيرجلش يدوى و أجرب و أقوله كدة كويس أو لأ؟ و الرجلشة محتاجة تتعمل فى التوكيل وللا ممكن أى ميكانيكى يعملها؟

الرجلشة بتتعمل يدوى عند ميكانيكى او فى التوكيل وفعلا انت بتجرب وتشوف اذا كانت زى الاول ولا لاء, وطبعا اى قرص وحرق على غيار العربية وخاصة الغيار الاول بيقصر عمر اسطوانة الدبرياج بس طالما مرة ولا مرتين فى العمر مش هتبقى مشكلة كبيرة, متقلقش نفسك اكتر من اللازم وربنا يسترلك طريقك يا ابو الجنود :mrgreen:

عبدالله باشا ربنا يطمنك و شكراً على الرد ... بكرة ان شاء الله أضبطها فى التوكيل .. بس أفهم من الكلام دة انى لو سبتها على الارتفاع الجديد للدواسة مش حيحصل مشكلة؟ و للا لازم تترجلش؟ معلش أصل أنا بتجيلى أرتكاريا لما أى ميكانيكى يحط ايده فى العربية :mrgreen:

طبعا يا احمد باشا لازم تترجلش لان طول المشوار دة اولا بيتعب رجل السائق وثانيا بيأثر على العمر الافتراضى للديسك والاسطوانة وربنا يكفيك شر الميكانيكية يا ريس.

هوندا سيتى ما فيهاش دسك واسطوانة , الفتيس بتاع الملنوال و الاوتوماتك من نوع ; CVT

اسف جدا لتسرعى فى الرد بهذة المعلومة الخاطية اعلاة و حاولت امسح كلمة المانوال كان الست دقايق عدوا ..الصبح حاساللك الميكانيكى بتاعى واقوللك قال اية