المشاركة الأصلية كتبت بواسطة 00007
السلام عليكم ورحمة الله وبركاتة
بص بقى و ركز معايا كويس فى موضوع البيع و الشراء
* الحالة الأولى :(بائع) لو انت اللى هتبيع
بالنسبة لشهادة المخالفات اللى انت طلعتها : للأسف الشديد هيبقى ملهاش لازمة لو ملحقتش تبيع قريب , لإن المشترى الجديد هيطلب منك شهادة مخالفات بميعاد حديث يثبت له ان حضرتك معملتش مخالفات فى الوقت القريب اللى فات
بالنسبة لشهادة التصنيع المحلى : حضرتك المفروض تنسى الإسم دة , و تستبدلة بإسم تانى اللى هو " شهادة البيانات "
* شهادة البيانات :
لو الرخسة لسة ادامها شوية و مخلصتش " رخصة العربية " يبقى مفيش داعى لشهادة البيانات , إلا فى حالة وحيدة بس اللى هى : ان الرخصة بتاعة عربية حضرتك تكون فيها تعديل بخط موظف او شئ زى كدة , و دة بيطلبوة قبل التسجيل و لازم تطلع شهادة بيانات , غير كدة لا , مش هتحتاجها
ملحوظة : عند البيع و الشراء : مفيش حاجة اسمها شهادة تصنيع محلى
---------------------------------------------------
* الحالة الثانية : (مشترى) : لو حضرتك اللى هتشترى
* لو حضرتك عايز تشترى عربية مستعملة :
بتشوف العربية و تكشف عليها فى بنزينة محترمة او توكيلها المختص , وبعد كدة بتطلب من صاحب العربية شهادة مخالفات ( اساسى ) , و شهادة بيانات فى حالة الخطأ اللى انا قلتة فوق فى رخصة العربية , غير كدة لا حاجة إن شاء الله لشهادة البيانات , و متنساش العربون
معلومة : تقدر تخلص ورقك فى اى شهر عقارى يعجبك , اختار اللى انت جربتة قبل كدة وعارف السكك بتاعتة
وعندك مثال : شهر عقارى شبرا , زنانيرى ,,, و هو يحتوى ايضاً على شهر عقارى الظاهر و فى الغالب مش بيكون زحمة بالنسبة لتسجيل السيارات بعقد بيع نهائى
---------------------------------------------
معلومات ع الماشى :
*عقد البيع الإبتدائى :
تشترية حضرتك من اى مكتبة جمب الشهر العقارى او اى مكان , بتكتب حضرتك انت و الطرف الأخر كل البيانات المطلوبة ( اسم و عنوان و رقم بطاقة و رقم السيارة و رقم المحرك و رقم الشاسية , و ماركة السيارة و الموديل ), و بتكتبوا فية سعر العربية الحقيقى و بتكتب فى خانة المتبقى : المبلغ اللى حضرتك ناوى تخلية لما بعد التسجيل النهائى
مثال : العربية تمنها 50 الف جنية , تديلة مثلا 48 الف جنية , و تكتب دة و تكتب ان باقى لة الفين جنية , و تخليهم معاك لحد ما يتم التسجيل
نصيحة : بلاش موضوع العقد الإبتدائى اصلاً ,إلا لو كنت مستعجل اوى و عايز تاخد العربية و مش لاقى اى شهر عقارى متاح ادامك , و بعدها تانى يوم إن شاء الله تنزل انت و البايع تخلصوا فى الشهر العقارى ( حالة لو كنت حضرتك مشترى )
إ*زاى حضرتك بتضمن ان اللى كلمك و اتفرج على العربية هيشترى :
حضرتك بعد ما يتفرج , بتسألة إذا كان جاد فى الشراء ولا لا ؟ لو كان جاد خلاص يسيب هو لحضرتك عربون , من 500 جنية إلى 1000 جنية ودول عشان حضرتك تروح تجيب شهادة المخالفات و شهادة البيانات و انت متطمن ان مفيش مشاكل إن شاء الله , لإنة لو مجاش مش مشكلة
* بالنسبة لشهادة المخالفات لو انت عايز تطلعها :
طالما انت عرفت تطلعها مرة , اعتقد الموضوع سهل بإذن الله , وتكلفتة حالياً خمسة جنية , بتروح برخصة العربية و تسلمها للموظف و تنتظر دورك لو معلكش مخالفات تطلعها و بتدفع الخمسة جنية تبرع لـ " جمعية الحرف التقليدية المصرية " وهى شئ إجبارى و اعتبرة رسوم
-----------------------------------------------------------
لو فى اى حاجة مش واضحة تقدر تتفضل و تسأل براحتك , وانا تحت أمرك إن شاء الله
والسلام عليكم ورحمة الله وبركاتة[/b]