-
انا والمارش وتايسون
تجربة حصلت لى فى الأيام الماضية حبيت انقلها لكم للفائدة
الأسبوع الماضى حصل ان مارش السيارة الريجاتا قطع ، غالبا نتيجة لأسلوب التعامل معاه من قبل السيدة زوجتى، المهم ان ده حصل يوم احد وكنت مع زوجتى لحسن الحظ فنقلت مكانها ودورنا السيارة زق وقضيت بيها اليوم كدة
المهم انا كنت لسة مغير المارش ده قريب، وبصراحة استحرمت 200 جنيه ثمن مارش جديد فقلت اخد فرصى فى انى اصلحه الأول
قمت بفك المارش من العربية، المارش مربوط ب 3 مسامير من جهة الأمام مجمعينه فى فارغة الفتيس بتاع الموتور، ومتوصل بسلكين كهرباء، واحد غليظ مربوط بصامولة 13 وده اسمه سلك اللقط وجايب من موجب البطارية مباشرة، اما الآخر فهو سلك الكونتاكت وده سلك رفيع مربوط بسوكيت وجايب من الكونتاكت، اما السالب فهو عبر جسم المارش الى جسم المحرك الى جسم السيارة، واجمل ما فى مارش الريجاتا انه يمكن فكه وتركيبه من أعلى السيارة ، فمت بفك مسامير المارش و الأسلاك ولف سلك اللقط وسلك الكونتاكت بشريط عازل لتأمين السيارة من حدوث قفلة وطلعت المارش اخدته فى كيس واكتفيت بذلك فى هذا اليوم لأنه كان يوم حد
فى اليوم التالى وبعد سؤال بعض الأصدقاء توجهت الى ميدان عابدين ، تحديدا على يمين قصر عابدين لو وشك للقصر وضهرك لباب اللوق ، الى ورشة الأسطى تايسون الكهربائى
بعد حضور المذكور قرب أذان الظهر قام بتفوير المارش وفحصه، وقال لى محتاج طقم جلب وشربونات ، المهم جاب الجلب والشربونات وركبها وضبط حاله وقفل المارش وجربه، شغال وزى الفل
اخدته انا فى نفس الكيس البلاستيك اللى جبته بيه ورجعت البيت، وركبته، التركيب كان سهل جدا لأن المارش فيه زنبة فى ثقب احد المسامير بتخليه يبات فى مكانه، ومصصم بطريقة تخلى شخص واحد يركبه ، وصلت الأسلاك فى مكانها ودورت ، دارت على طول ، التركيب اخد بالضبط 5 دقائق ، والكهربائى اخد فى قطع الغيار والمصنعيات 40 جنيه فقط
-
-
و الله ياباشمهندس فكرتنى بالمهندس سبعاوى فى عيله زيزى ( فؤاد المهنس ) و هو بيحط القطن فى ناحيه يطلع نسيج من الناحيه التانيه :D :D :D
-
-
ميه ميه يا باشا أهو ده الكلام
-
صح مذاكر كويس : طلعت قماش ... طلعت قماش .. طلعت قمممممممماش :D :D :D
بس يا دكتور احمد فيه حاجه محيرانى .. ايه حكاية : Germany ..Germany .. Germany ده ؟؟؟
انت عضو فى التنظيم النازى بتاع عمنا هتلر الله يرحمه ؟؟ .. اذا كان كده يا ريت تبعت لى استماره عضويه و تكون عائليه انا و العيال لو سمحت .. :evil: :evil:
-
والله برافواااااااااااااا عليك
-
أصلي أول ما ركبت ركبت BMW E21
و بعدين ركبت بولو 99
و بعدين جبت لانسر 2002
Germany Germany Germany
و أنا لازم أرجع لحظيرة BMW قريبا جدا
-
يبقى : Germany Germany Japan لحين العوده لل : BMW ..
انا شخصيا معجب بال Passat ماكينه جميله Sehr Schone Maschine و رشيقه من بره ( من جوه معرفش بصراحه ) .. لو كسبت شهاده المليون حاطير للتوكيل ... بس برضه مش حفرط فى اللادا ... عشرة عمر و اللى مالوش خير فى اللادا .....
-
تعرف يا باشمهندس الحاجه بيبقى ليها طعم تانى لما الواحد يعملها بأيده
-
طعم تانى ايه بس .. هو كان عمل صينية مكرونه بالبشاميل ؟؟ :mrgreen: :mrgreen: :mrgreen:
-
لأ بجد فعلا
لما تعمل الحاجة بنفسك بيبقى شعور لذيذ
-
اكيد " طعم " تانى و شعور " لذيذ " .. غير عمليا بتوفر مصاريف .. على الفكره فى امريكا معظم الناس ومنهم الاغنياء و المليونيرات بينضفوا عربياتهم بنفسهم استمتاعا بلذه العمل .. و الرئيس السابق كارتر كان بيصلح الكراسى و الترابيزات المكسوره له و لجيرانه كمان .... لا لا ... بلاش حد يعمل مقارنات يا جماعه !
:mrgreen: :mrgreen: :mrgreen:
-
هو عم تايسون دة اى نظامة
اى مشكلة فى الكهرباء بيعملها و المصنعية غاليه ولا معقول؟
-
بس يا باشا انت ممكن كنت غيرتهم بنفسك ووفرتتمن التركيب والمصنعية لأن الجلب والشربون ونقطة الوفر لوود مش حتجيب أكتر من 12 جنية - أنت كنت ممكن تركب الأوروبى أبو نجمة وهيكون بحوالى 25 جنية بس أنت هتنساة على الأخر
-
كان ممكن تروح لإبراهيم فى الحى السابع يا خالد صنايعى و أمين و قديم أوى
ولا إنت مش جربته مش عجبك ؟
Content Relevant URLs by
vBSEO 3.6.0 PL2