الحقونى يا جماعة الانوس بقت لغز عند الميكانيكية

المنطقة الصناعية الى فى السابع كلها مش عارفة حل للانوس:K_crying[1]:
لدرجة انهم فكوا المقصات والمساعدين وكانوا عايزينى اكشف على علبة الدركسيون مع العلم العربية 2008 وعاملة 12 الف بس وفى الاخر قالولى روح التوكيل علشان محدش يعمل شغل عليك والتوكيل بصراحة حاسس لو رحتة هيدفعونى مبلغ محترم ومش وقتة دلوقتى

العربية الى حلتى طلعت بيها على رصيف صغير مردوم بوش العربية والموتور اتخبط من تحت جامد والموتور كان مية بحركة بايدى بيتحرك

الاضرار وقتها ... مفيش اى حاجة حصلت غير الخضة على العربية
بعديها بيومين وانا ماشى لما بعدى فى شارع مكسر بسمع كركبة عالية اوى من قدام وبالذات لما ادوس دبرياج بحس بيها اكتر والموتور كان مية بحركة بايدى بيتحرك!!!!!!!
قمت رحت بيها عن عفشجى علشان قلت من الصوت بص عليا وقالى مفهاش اى حاجة والعفشة سليمة ولسة جديدة انا بصراحة استغبيتة وسبتة ومشيت
رحت لواحد تانى بص وقالى نفس الكلام!!!!!!!!
ركبتة العربية وجربها الى دى اكيد قواعد قام بص على قواعد الموتور لاقاها سليمة وقالى قاعدة الفتيس مقطوعة رغم ان الصوت اعلى من انوا يكون من قاعدة الفتيس
فكناها وغيرناها وقالى كدة خلاص خلصت جينا نجرب مفيش اى حاجة اتغيرت قام قايلى كمان القاعدة الشمال عايزة تتغير وغيرناها وبرضك مفيش اى تغير
دفعت 150 ج على قلة فايدة
بس الموتور ثبت فى مكانة عن الاول بكتيرررر

واحد صاحب ابويا شافها معايا وعملنا رجلاش للموتور علشان الخبطة كانت جامدة علية

والعربية على كدة بقالها اكتر من 3 اسابيع وبتمشى عادى والموتور مفهوش اى مشاكل وشديت بيها كمان لحد 140

على السرعات والطريق حلوة بس على الهادى المكسر فى صوت حاجة كانها مقطومة او مفكوكة بتخبط جامد ناحية الدبرياج

بجد تعبنا اووى منها وملش لاقيين حل ابويا قالى نوديها السويس عند قرايبنا ونعملها هناك وخايف اسافر بيها
..... اية الى ممكن يعمل الصوت دة من قدام المقصات والقواعد والسست والمساعدين مظبوطة

اية يا جماعة محدش يعرف اى حد طيب اوديلوا العربية :(:(

انا بصراحة كان بودي اسعدك بس معنديش رد فني للاسف فقلت اشاركك معنويا عموما ان شاء الله خير و استني بس المستشار لما يقوم من النوم او الباشمهندس سمير حبايبنا الكبار و ان شاء الله يكون عندهم رد ليك و متقلقش و بالش استعجال علشان محدش يقعد يخربلك و يغرمك فلوس علي الفاضي استنه لما تسمع اراء الاخوة

عليك وعلى محمد عبده
ناس كتير بتتعامل معه ومنهم انا
راجل عشرة عشرة وفاهم
هتلاقي العوان موجود في الرابط ده
http://www.nilemotors.net/Nile/showthread.php?t=29619

طيب جرب ترفع العربية فى بنزينة وبص عليها من تحت اكيد هيبان تاثير الخبطة

انا كنت هقول لك قواعد الموتور

اعتقد انك رحت لناس كفتجية لسبب... ناس منهم قالوا مفيش حاجة فى العربية و ناس تانية بتجرب تغير حاجة و بعدين تغير حاجة تانية وهكذا

انت محتاج ميكانيكى يكون فاهم يحللك المشكلة

MMamdouh

الله يخليكوا يا جماعة على مشاركتكوا بجد وعارف انى تاعبكوا معايا ...........بس بجد محتار وخايف اروح التوكيل يظبطونى هناك وانا معنديش حد اعرفة هناك

ahmedsrs
طيب جرب ترفع العربية فى بنزينة وبص عليها من تحت اكيد هيبان تاثير الخبطة

رفعتها فعلا عند وطنية بتاعت ذاكر حسين وجالى الشاب بتاع الزوايا وقالى ان الكاوتش متاخر حوالى نصف سم من اليمين وسم الا ربع من الشمال ودة مخلى الحمل على الكبالن!!!!!!!!! ولازم تعمل زرجينة وتظبت زوايا ب 80 ج
مرضتش اعمل حاجة لان الصوت كان من ناحية واحدة وابويا اقنعنى انو بيشتغلنى وعمرها ما تكون كبالن؟؟

هههههه تخيلوا يا جماعة ان الاسطى بتاع ورشة الاستروين والبيجو خرة ما غلب مع العربية قالى على محمد عبدة دة.....

وشكرا تانى مرة يا جماعة وفعلا دة العشم من مالكى الدايو

اقتباس:

---

المشاركة الأصلية كتبت بواسطة ahmedtefagad

الله يخليكوا يا جماعة على مشاركتكوا بجد وعارف انى تاعبكوا معايا ...........بس بجد محتار وخايف اروح التوكيل يظبطونى هناك وانا معنديش حد اعرفة هناك

ahmedsrs
طيب جرب ترفع العربية فى بنزينة وبص عليها من تحت اكيد هيبان تاثير الخبطة

رفعتها فعلا عند وطنية بتاعت ذاكر حسين وجالى الشاب بتاع الزوايا وقالى ان الكاوتش متاخر حوالى نصف سم من اليمين وسم الا ربع من الشمال ودة مخلى الحمل على الكبالن!!!!!!!!! ولازم تعمل زرجينة وتظبت زوايا ب 80 ج
مرضتش اعمل حاجة لان الصوت كان من ناحية واحدة وابويا اقنعنى انو بيشتغلنى وعمرها ما تكون كبالن؟؟

---

السلام عليكم ورحمة الله وبركاته
طب ما تجرب تاخد كلامه على محمل الجد لكن شوف بنزينة تانية أو مركز ظبط زوايا واتزان وشوفه هايقولك نفس الكلام ولا ايه
وعلى فكرة ممكن يكون مش ده اللى بيعمل الصوت عندك لكن برده في عيب فعلا تأخير العجل وربنا قدر كده علشان تظبطه
الحاجة التانية أنا مش عارف انا فاهم صح ولا غلط بس اللى فهمته انك روحت لبتوع عفشة بس
جرب تروح لميكانيكي ويبصلك تحت العربية مكان الخبطة ممكن يكون في صاجة مفكوكة أو حاجة بسيطة هي اللى عاملة المشكلة دي
سبحان الله
لسة زميلي بيحكيلي من حوالي ساعة انه كان عنده مشكلة في عربيته وما بتسحبش وافتكر الماتور ضاع و....
ادى العربية لقريبة راح للميكانيكي طلع في صاجة تحت العربية (مش عارف بتاعة ايه بالظبط) لكن لاقها مربوطة من ناحية واحدة وسايبة من التلات نواحي الاخرى ربطها وماشاء الله العربية زي الفل :)
ربنا ييسر لنا ولك الأمور كلها ويوفقنا واياك للخير