(هي دي مصر يا عبلة) الله يسامح المؤلف اللي كتبها
في بداية الموضوع الذي اتشرف بزيارتك ليه، احب اني اقول انه لا احد على وجه التحديد معني بهذا الموضوع، علي رأي الجماعة بتوع السينما الموضوع لا يمت بصلة لا من قريب او بعيد بشخصيات واقعية، وأي تشابه هو محض صدفة
السؤال الأول:
تفتكروا جملة (هي دي مصر يا عبلة) تم ذكرها كام مرة في المنتدى؟
الإجابة اتوقع ان ممكن عدد مرات ذكرها هايكون قريب ون عدد مواضيع المنتدي او اي مندى آخر مش شرط نايل موتورز.
اللي بيحصل كالآتي:
تلاقي موضوع مثلا في المنتدى العام وعضو فاضل طرحة عن اي ظاهرة سلبية خاصة بالسيارات من مركز صيانة سيئ، صعوبات مع المرور، جمارك ...... إلخ لازم وبنسبة 1000% حد يعلق بـ (هي دي مصر يا عبلة)
موضوع في الإجتماعي عن ظواهر سلبية عن اي حاجة، طوابير عيش، انفلوانزا الخنازير، مبارايات المنتخب ............ إلخ لازم برضه نجيب سيرة الست عبلة في الموضوع وعلى طول تلاقي (هي دي مصر يا عبلة ) ظهرت
وكذلك في باقي اقسام المنتدى اي سلبيات لازم عبلة تخش في الموضوع
والله العظيم بدأت اشك ان في زرار بيكتب الجملة دي على بعضها في الكومبيوتر وقلت يمكن يكون الكومبيوتر بتاعي ناقص الزرار ده ولا الويندوز عاوز يتصلح
بس بعض الأعضاء اكدولي انه مش زرار اللي بيكتب الجمله على بعضها
بدليل هي دي مصر يا عبلة قرأتها في المنتدى وخارج المنتدى بالنصوص التالية:-
(هي دي مصر يعبلة)
(هي دي مصر يا عابلة)
(هى دى مصر يا عبلة) بإستخدام ال (ى) بدل ال (ي)
السؤال الثاني: ليه الناس بتحب تكرر التعليقات اللي مش هاتضيف حاجة؟
ممكن تساند بالدعاء للشخص المكروب، او حتي بإعلان شجبك وإعتراضك على التصرف بس سيبوا عبلة في حالها ومتكررش تعليق مستهلك جدا.
انا والله العظيم بقيت اتوقف تلقائيا عن تكملة قراءة اي موضوع بتعليقاته بمجرد الوصول لإسم الست عبلة من كتر الجملة مابقت مستهلكة لدرجة لا تصدق
الله يسامح المؤلف اللي كتبها ومنكرش ان في تعليقات كتييير من افلام متداولة بس لو تلاحظوا ده التعليق الأول في اي موضوع بيتكلم عن سلبيات
وعلى فكرة عبلة مش قريبتي ومش بدافع عنها ولا حاجة قبل ماحد يقول كده واسف جدا للإطالة
