مهازل التقفيل المصرى ومراكز الصيانه

**samcar** · 25-06-2009 01:56 PM

استلمت سياره نوبيرا - انتاج 2009 وهى الان فى فترة التلين
فوجئت اليوم بصوت عالى مع حركة الدريكسيون السياره لم تكمل 300 كم واقل من اسبوعين معى

فتحت الكبوت فوجئت بزيت البور كله نازل على الارض ؟؟؟
احد الجيران عنده سياره نوبيرا
بص وقال واضح ان الخرطوم ضرب - اقل من 300 كم ويضرب ؟؟؟

اتصلت بمركز الصيانه المتحرك - هههههههههههه

لان مافيش مركز صيانه هنا عندى - قال اتصل بمركز الصيانه فى المنصوره ؟؟؟؟؟- اتصلت قال هات العربيه وتعالى - يا سلام امال صيانه متحركه ايه ؟؟ظ- والالذ قلت له طيب انا بعيد عنك وفى مصالح باقضيها - قال احنا فاتحين للساعه 5 وبعد كده ممكن تيجى السبت - ؟؟؟؟؟؟
طيب اجى والعربيه كده قال مفيش مشكله !!!!1

انا اشتريت العربيه زيرو لان مفيش عندى وقت اضيعه فى قرف صيانه - دلوقت مش دى حاجه تضحك - وتبكى على حال البلد دى

صيانه متحركه تتحرك بامر من الصيانه الثابته - عربيه ما كملتش تلت الف التليين وخراطيم تضرب
وبعد كده ناس تقول لك التقفيل المصرى عيبه ايه - انا استاهل انى صدقت ان فى البلدى صناعه او ذمه

حانشر لكم صور العربيه والزيت مغرق الارض جنبها
ومستنى لما اروح واشوف قصة الصيانه دى حتطلع ابه كمان

**نور العمر** · 25-06-2009 02:04 PM

يا الله ... ربنا يعينك والله
ولا إللي معاه مستعمل مرتاح
ولا إللي اشترى زيرو عشان يرتاح ارتاح

حسبي الله ونعم الوكيل على انعدام الذمة والضمير

ولسة لما نشوف افتكاسات الصيانة .... والاسعار التحفة إللي حياخدوها

**evoo90** · 25-06-2009 02:06 PM

انا لو منك اعمل مصيبه فى التوكيل ولو انت فاضى ودماغك رايقه قولهم هاتوا عربيه جديده بدل ما اعملكم قضيه واطلب تعويض واخربلك ادنيا انتوا مش عارفين انا مين هههههههههههه
بجد هيخافوا قوى لو اعيب عيب تقفيل والعربيه خارجه من التوكيل كده

**نور العمر** · 25-06-2009 02:10 PM

عندك 100000000000000000 حق في كلامك يا ايفو
ادخل بحماية المستهلك
واشتغل في الألوان كلها ..... مش الازرق بس

ربنا معاك

**solycar** · 25-06-2009 02:51 PM

متسبقش بالسوء

مش ممكن يظبطوهالك و تتصلح ان شاء الله

و لو محصلش اعملهم بالو

منفعش عليك بحماية المستهلك

منفعش عليك بالبلطجة

بس ان شاء الله هتتحل من غير مشاكل

**nasroo** · 25-06-2009 02:55 PM

هو فيه نوبيرا 2009؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟

**ahmedhilmy** · 25-06-2009 03:18 PM

المشاركة الأصلية كتبت بواسطة evoo90

انا لو منك اعمل مصيبه فى التوكيل ولو انت فاضى ودماغك رايقه قولهم هاتوا عربيه جديده بدل ما اعملكم قضيه واطلب تعويض واخربلك ادنيا انتوا مش عارفين انا مين هههههههههههه
بجد هيخافوا قوى لو اعيب عيب تقفيل والعربيه خارجه من التوكيل كده

100/100 انا معاك و متسبش حق دي حاجة بقت ....... الواحد فعلا اتخنق لا جديد نافع و لا مستعمل نافع

**Samir Elshahawy** · 25-06-2009 03:21 PM

روح التوكيل الاول و أحتفظ بالصور و خد صورة من امر الشغل و لما يخلصوا خد صورة من أو أي مستند بالاصلاحات اللي أتعملت
اما لو بلطجوا بلطج و أتصل بجهاز حماية المستهلك و أفضحهم في كل حتة و هددهم بكده

انا عملت كده معاهم و هددتهم بأني هأعمل محضر ضدهم في القسم بالمستندات اللي معايا (كل اللي قولت لك عليه فوق + الفواتير) فخافوا و عملوا العربية من غير و لا مليم و بعد كده ماروحتش هناك تاني و لا ضمان و لا دياولوه

**Mzeid** · 25-06-2009 04:14 PM

هههههههههههههههه
أنتم على نياتكم أوي يا جماعة ..
المفروض العربية أصلا تتغير ..

واحد قريبي في ألمانيا كان شاري عربية أودي a4 من المصنع بنصف ثمنها ..
عارفين ليه .. ؟!
لأن واحد اشتراها قبله و لقى فيها عيب و رجعها للمصنع و أخد بدلها واحدة جديدة تماما و المصنع صلح العيب و باعها بالسعر دة ..

عارفين بقى كان إيه العيب ..... كان خرطوم مخروم ..

طبعا هتقولوا لي يا عم دة في المانيا ..
طيب و إيه يعني إحنا مواطنين زينا زيهم و نستحق معاملة محترمة زيهم ..

علشان كدة أنا بقول لحضرتك تتمسك بحقك في إبدالها بواحدة أخرى خصوصا أن العربية زيرو و هتدخل في مواويل صيانة ..
و صدقني ممكن تقرف منها بعد الصيانة اللي هتتعمل لأنها لسة زيرو و لسة فرحان بيها ..