الموضوع: كل اللي ممكن تقروه عن الجين 2

السلام عليكم
أولا :
احب اشكر كل الناس اللي في المنتدي و خصوصا قسم البروتون و خصوصا الاستاذ ايمن و توت و ............. اخرين كتير فعلا ادو صورة كاملة عن البروتون و خصوصا الجين 2 مش بس كده دول كمان ليهم مجهودات في حاجات ذات قيمة مادية لكل الاعضاء من خصم في الصيانة لعروض في الكماليات حتي الخصم الاخير بتاع الجين 2 .
ثانيا :
قبل ما ابدأ معاكو الموضوع احب اديكو خلفية صغيرة عني الغرض منها طريقة حكم الناس علي رأيي في الجين 2 انا مهندس ميكانيكا سقت سيارات بيتلز و برايد ايراني و بيجو 406 نيسان صني فيرنا تويوتا و حتي نيسان نص نقل حبي و شغفي في العربيات خلا عندي خلفية كويسة عن العربيات لدرجة اني انا بعمل الصيانة بنفسي في عربيتي القديمة و نخش في الموضوع .
من اخر 2006 و انا متابع الجين 2 و اخبارها من الناس و النت و كان قراري بشراء الجين 2 وخدوه من زمان كل بني ادم ليه نزوات و بصراحة دي كانت في الصالح بمعني اني كنت دايما بقارن بين اي عربية تعجبني من حيث الشكل و المضمون و الجين 2 و لكن دايما الجين 2 كانت بتكسب و امثلة علي كده
النيو اكسنت امكانيات قليلة جدا ستابليتي عادي
الريو كما سبق ضيف عليهم موتور اضعف
النترا بدون امكانيات سفتي و استابليتي وحش الي جانب فرق السعر
كيا سيراتو فرق السعر الكبير
FRV و العربية دي انا بكرها اولا عربية صيني و التوكيل بيبيع اسم اوبشن اقل و في الاخر بكرة زجاج ورا بصراحة انا اول ما حاعمل الالف حاجري ورا العربية دي في الشارع

اما عن الاستلام العربية اوتوماتيك فضي و بصراحة ايمن تعب معانا في الموضوع ده حتي جاب عرض كويس و ده كان سعر منافس جدا بالنسبة لعربية بالامكانيات دي مع الاخذ في الاعتبار تحفظي الشديد علي سياسة عز العرب في التسويق و الصيانة يوم الاستلام روحت انا و اخويا و طلبت من الاستاذ محسن انه يعمل التشيك بتاع البي دي اي و هو تشيك بيتعمل من قبل الوكيل علي العربية و كان كله تمام ما كنتش مستعجل و اخدت راحتي جدا في مراجعة كل شئ حتي اصغر التفاصيل




نيجي للعربية كعربية و نبدا من ناحية التصميم فعلا التصميم الخارجي لشكل العربية هو تصميم ثوري بكل المقاييس بيضع في حساباته كل المتطلبات الرياضية من ناحية الشكل و المضمون اللي المفروض تكون متوافرة في عربية بهذه المواصفات خصوصا 2009 من ناحية اللفت باك ( توزيع الوزن في خلف العربية بيكون جيد جدا مع اللفت باك لسبيبن اولا ان وزن باب الشنطة بيكون كبير مما يعادل زيادة الوزن في الجزء الامامي نتيجة وزن الموتور و الفتيس و ده بيدي الاحساس مع العفشة بالاتزان في الملفات مش معني كده ان الشنطة نفس وزن الموتور و لكن هي بتقارب الوزن مع الاخذ في الاعتبار الوزن الكلي للسيارة ) طول و عرض العربية و ارتفاعها الشكل الانسيابي و مقاومته للهوا حتي شكل المرايات و لغاية ادق التفاصيل في حلية الشكمان

نيجي للتصميم من الداخل و هو تكملة للتميز في التصميم من الخارج حيث ان شكل العدادات و القنصل و الكراسي بيميز قوي العربية من الداخل مع الاخذ في الاعتبار ان الناحية السلبية لعدم استغلال الامثل للمساحات الداخلية من حيث التخزين او رحابة المقصورة للركاب الخامات في حد ذاتها تعتبر فوق المقبولة ان ما كانتش في واجهة نظري مناسبة جدا من حيث النوعية و الكفاءة التنفيخ في البابان من الداخل بصراحة مدي شياكة للعربية و راحة في السواقة للناس اللى بتحب تسند كوعها علي الباب خصوصا و الشباك مقفول الشماسة مع حجم الزجاج لما تستخدمها فعلا بتكون فعالة خصوصا مع الباب

نيجي لسر العربية الحقيقي و هو الموتور و العفشة الموتور و هو للايضاح مصمم من قبل شركة لوتس و لكن تم التصنيع كاملا في مصانع بروتون لوتس هي شركة متميزة في تصميم المواتير الرياضية من الفئة الصغيرة من 1800 لغاية 2400 تقريبا و ده معناه الاداء الجيد جدا للموتور من حيث التسارع و السرعة القصوي الي جانب ان الموتور الكمبرو مصمم للاستخدام علي RPM عالية و ده معناه اداء رياضي و في نفس الوقت موتور من النوع ده معناه انه بيعيش اكتر من المواتير العادية ببساطة لان اللي بيبوظ الموتور (بيفوت) الاحتكاك و الحرارة
الحرارة سهل معالجتها اما الاحتكاك فهو ده السر انا ماجرتش قوي بالعربية و خصوصا وهي اوتوماتيك و لكن تجربتي الصغيرة معاها بتاكد ان الموتور في مارد لو طلع صعب انك تسيطر عليه انا بصراحة مش متخيل المانيوال بتاع العربية ده عامل ازاي ( انا لو معايا المانيوال كنت قفلت كل سباقات الاوتو كروس و اللي مش اوتو كروس ) بالنسبة لصوت الموتور و استهلاكه للبنزين خالينا نتفق علي حاجة ان اي شئ بيزيد عن حده الطبيعي بيكون غلط بمعني ان صوت الموتور كويس جدا و واطي في السواقة العادية و لكن ليه صوت قوة في حالات القرص مع الاخذ في الاعتبار ان استهلاكه في البنزين متوسط

اداء الموتور بصفة عامة جيد جدا بالنسبة لموتور 1600 علي RPM قليلة و لكن لو ال RPM عليت موتورك بيتقلب بقدرة قادر موتور عربية 6 سليندر في كل حاجة القوة و العزم و الصوت و استهلاك البنزين و لك كامل الاختيار و الحرية


الفتيس بالنسبة للفتيس الاوتوماتيك بتاعها انا بديله من 8 الي 9 من 10 و ده لانه مصمم فعلا انه يتعامل مع الموتور بادائه انا جديد في استخدام الاوتوماتيك لكن الفتيس ده من السهل انك تتعامل معاه خصوصا لو انك بتحب تجري بالعربية فمثلا لو انت علي سرعة 90 100 و عايز ترفع السرعة او تزود التسارع بطريقة متزنة بدون الكيك دون فبكل سهولة بترجع العصاية علي النقلة 3 و ده بيديك المطلوب بالظبط بدون صوت الكيك دون و استهلاك البنزين عالي اما لو حتتحرك من D الي 2 فلازم تدوس علي زرار الفتيس و ده لان النقلة دي بتتدي عزم عالي و الاستخدام الخطا ليها ممكن يبوظ الفتيس و شرحه في ال L


العفشة و هي تاني اقوي حاجة متميزة في العربية . العفشة برضه تصميم لوتس و ده بيخدم الاداء الرياضي المتميز للعربية بيحقق تكامل الاداء للسيارة بمعني تاني الي جانب التوزيع الجيد للاوزان داخل و خارج السيارة بيجي دور العفشة في تكملة المسيرة في الاستابليتي علي السرعات العالية و الواطية من غرز و ملفات و اداء للفرامل في المنحنيات


عوامل الامان و السلامة في العربية و ده من احد الدوافع اللي خلتني اشتري العربية و عوامل السلامة هنا بتنقسم لجزئين السلامة الايجابية و السلامة السلبية
السلامة الايجابية و هي الحاجات اللي بتقلل من فرص حدوث حادث و بتبدا من نظام فرامل جيد و ده متوافر في العربية في اربع ديسكات كبيرة للفرامل مقاس كاوتش 15 بعرض 195 فرامل ABS وebd مساحة جيدة للرؤية اما عن السلامة السلبية و هي اللي بتقلل من عواقب الحادث في عندك خمس احزمة امان اربع مساند راس امكانية لتثبيت كرسي الاطفال اتنين وسادة هوائية نيجي لاهم نقطة و هي اختبار التصادم العربية دي خدت موافقة اوروبية و انجليزية و استرالية ان هي تنزل الاسواق دي و مرت بالاختبارات دي و ممكن نرجع للويب سيت بتاع بروتون انجلترا اواستراليا

الامكانيات و الكماليات اي واحد بيشتري عربية بيكون حاطط في باله انه يعمل شوية تغييرات في الامكانيات او في الكماليات اللي هو شايف ان هي ضرورية له او ان هي حتميز العربية بتاعته عن غيرها لكن في الجين 2 الوضع مختلف مفيش حاجة ممكن تعملها خلينا نبدا بنظام الصوت الهايل اللي انا متاكد ان من قوته ان هو السبب الرئيسي في صوت التزييق في التابلوه و الشنطة من قوته و برهان علي ذلك رعشة مرايا الصالون و انت مشغل سي دي علي فوليم 15 العربية ينقصها حاجة فعلا و هي المثبت ولكن بصراحة العربية علي الطريق السريع سهلة جدا في السواقة هو ميزته الوحيدة هي انك تجمح رغبتك في الجري و زيادة السرعة و حنحاول فيه كلنا ان شاء الله انه لازم يركب في العربية في التوكيل و مع الضمان حاجة تانية كان نفسي فيها و هي وحدات رفع للزجاج و دي اعتقد ان هي سهله و مفيهاش مشاكل كتير

الاضاءة الخارجية نبدا بالفعالية للاضاءة الخلفية و دي فعلا من اقوي مميزات العربية للاسباب التالية اولا اضاءة الفرامل و الكشاف الخلفي مدوارة و عالية فده بيدي وضوح للاضاءة ثانيا و دي من اهم المميزات بالنسبة لي الشبورة الخلفي و ده فعلا له دور كبير وقت الشبورة اهم من الامامي بكتير اوي بجانب الي الشكل الشيك للفانوس الخلفي الستوب التالت موجود في اعلي الشنطة و ده كمان بيزود وضوح الاضاءة
نيجي للاضاءة الامامية ليها شكل رائع و مميز من حيث الفانوس الامامي او الشبورة و لكن تعليقي علي كفاءة الاضاءة انا حاسس ان حكم العاكس في الفانوس خصوصا في الواطي مش كفاية او محتاج لمبة اقوي من 55\60 حتي ارتفاع الفانوس مبيديش المساحة الكافية خصوصا في الناحية اليمين عشان ميعاكس اللي قدامك و لكن في العام مقبول انا غيرت اللمض و جبت فيليبس نفس المقاس اللبني ب 100 جنيه من عند محل المدينة الاضاءة احسن حاجة بسيطة و لكن الشكل هايل

الشنطة حجمها معقول و مناسبة لاستخدام اسرة متوسطة المرايات صغيرة نسبيا و لكن ادائها مقبول

و ان شاء الله بعد ما اعمل الالف حاعمل لكو تقرير عن السواقة براحتي للعربية

صحيح يا باشمهندس كنا فاتحين موضوع عن التوحيد القياسى للسيارات وكان الموضوع ناقص راى فنى من مهندس ميكانيكا او متخصص بالمجال فياريت لو حضرتك تشرفنا فى الموضوع وتفيدنا برايك وشكرا http://www.nilemotors.net/Nile/showthread.php?t=81084

سلامى للجميع