جين2 او سكودا رومستر ؟

**Said Elmasry** · 26-06-2009 03:35 PM

المقارنة بين بروتون جين 2 مانيوال و سكودا رومستر مانيوال استايل اللى ب 87 ألف
يهمنى فى المقارنة بشكل كبير
الثبات على السرعات العالية
الارتفاع عن الأرض (عشان مطبات المحروسة اللى عايزة الواحد يكون سايق لودر )
سحب جامد وسرعة جيدة
نظم الأمان العالية
المقارنة فى الكماليات
الاتساع بالنسبة ل 5 أفراد
إتساع الشنطة
سعر اعادة البيع
التوكيل
توافر قطع الغيار
الصيانة والتصليح خارج التوكيل ( يعنى لو عطلت منى اى حد بيفهم فى ميكانيكيتها ولا لأ عشان الفورد كا معايا مش اى حد بيفهم فيها )
تكون معمرة وتستحمل الخدمة الشاقة
كفاءة التكييف مع التحميل فى الحر
كفاية كده عشان طولت قوى
مستنى رأيكم
م/ سعيد المصرى

**Ayman_52** · 26-06-2009 03:53 PM

اهلا بحضرتك م/سعيد المصــرى

سكودا رومستر ... عربيه جميله وانا عن نفسى بحب شكلها ... وسعرها منافس جدا

بس ماعنديش معلومات كافيه عنها

--------
هقدر افيدك اكتر فى الجين2 :-
--------

الثبات على السرعات العالية : اول ميزه تاخدها من الجين .. سواء محمل العربيه او فاضيه ماشى مستقيم او مقضيها غرز

الارتفاع عن الأرض (عشان مطبات المحروسة اللى عايزة الواحد يكون سايق لودر ) : بعدى اكبر المطبات وانا عدل وعمرها ماحكت (الحمد لله)

سحب جامد وسرعة جيدة : سحب جيد ... وسرعه زى مانت عاوز ...

نظم الأمان العالية :2air bags , abs , ebd , , دعمات صلب فى جوانب السياره, مزوده بشداد مع الموتور, واخرى...

المقارنة فى الكماليات : كل الكماليات اللى تحتاجها فى اى سياره ... من الازاز الكهربا لحد المالتى فانكشن .

الاتساع بالنسبة ل 5 أفراد : تاخد 5 مستريح ... بس ممكن لو حد قعد ورا طويل (اكتر من 185) دماغه تكون لمسه السقف.

إتساع الشنطة : اوسع شنطه فى فئتها

سعر اعادة البيع : لو هتبعها خلال سنه او اتنين يبقى هتخسر اكتر مقارنه لو بعت لانسر مثلا ... بس لو بعد 4 او 5 سنين كله زى بعض

التوكيل : يعنى متوسط .... ليه مميزات وعيوبه

توافر قطع الغيار : القطع الاساسيه متوفره بشكل دائم فى التوكيل ... وبعض القطع بتستنى لحد مالتوكيل يطلبها من برا...(بس لو مزنوق بيتصرفولك)

الصيانة والتصليح خارج التوكيل ( يعنى لو عطلت منى اى حد بيفهم فى ميكانيكيتها ولا لأ عشان الفورد كا معايا مش اى حد بيفهم فيها ) : انا بقيت اشوف محلات ميكانيكيه كتير حاطين لوجو بروتون .... وبصفه عامه بروتون مش صعبه.

تكون معمرة وتستحمل الخدمة الشاقة : ناس كتير معديه الــ10,000 ومبسوطين .. وناس بتكون معاه جين2 بتبعها وتجيب جين2 باردوا.

كفاءة التكييف مع التحميل فى الحر : جيد

----------------

سعر الجين2 ... اوتو 90900 ----- مانيوال 84900

وفى دلوقتى تخفيض جايبه باكتر من 3000 ... على اى سياره بروتون سواء قسط او كاش.

----------------

وانا تحت امرك فى اى استفســـــــــار

تحيــــــــــــــــاتــى