محتار اعمل ايه مع الكارينز !!!!

طبعا انتوا عارفين الحوارات بتاعة الحجز

انا حاجز كارينز اوتوماتيك مع التوكيل من يوم 3 يونيو و ده تقريبا يوم ما فتحوا الحجز للاوتوماتيك


و قالوا لي الاستلام بين منتصف و اخر يوليو

و كمان انا دافع المبلغ بالكامل عشان زي ما قالوا لي اضمن اقل السعرين

يعني لو رخصت على ما جم يسلموا هيردوا لي الفرق

و لو غليت مش هادفع حاجة زيادة

و ده حاجة تحترم في التوكيل .....

جدير بالذكر ان انا مش مستعجل عالاستلام لان انا مشتري العربية دي عشان تبقى عربية عائلية

و عربيتي هاديها لمراتي و هي دلوقتي بتتعلم واحدة واحدة و في الاعادة افادة و مش مستعجل عالاستلام تيجي في يوليو و لا اغسطس و لا حتى سبتمبر مش فارقة .....


النقاط الاتية هي اللي قالقاني او بمعنى ادق شاغلة تفكيري شويتين:



1- الحركات اللي مش تمام اللي التوكيل و الموزعين عاملينها في الحجوزات و الاستلام و اللذي منه
يعني ممكن عربيتي المحجوزة تتسرب لواحد دافع اوفربرايس او عمولة او واسطة

و مش عارف اعمل ايه صراحة غير اني انتظر و اشوف ايه اللي هيحصل


2- استلم اول ما الاستلام يفتح .... و لا انتظر موديل 2010؟؟؟؟

و اساسا التوكيل قالوا لي ان ال 2010 هتيجي على اغسطس يعني مش فارقة كتير ....


طبعا التفكير المنطقي اني استنى 2010 بما اني مش مستعجل ..... المشكلة الكبيرة تتلخص في اني

أ- مع الحركات اللي مش تمام ..... عصفور في الايد (ال 2009 لو جت) خير من ال 2010 اللي الله اعلم هيعملوا فيا ايه لحد ما يسلموهالي

ب- طب و لو ال 2010 نزلت أغلى ؟؟؟؟؟؟؟ حلاوتها زايدة حتة ساعتها انا هالبس اسود .......



3- و دي نقطة متعلقة بالنقطة رقم 2 لحد كبير


دلوقتي انا العيب الوحيد اللي مش عاجبني في العربية انها فاضية ...... و لا ABS و لا EBD و لا SRS و لا الدموع


طيب لو هما جم على اول 2010 نزلوا Category أعلى و بفرق بسيط عن الفاضية

ساعتها هالبس اسود بجد :stink[1]:

لاني اولا هاتنقط و هاتفقع

و ثانيا سعر اعادة بيع عربيتي هينزل الارض و يمكن تحت الارض بدورين





و في نفس الوقت ........ لو نزلت بفرق كبير في السعر مش هتضر سعر العربية الفاضية و ساعتها اختياري هيكون الفاضية .......

طب افرض وقفوا ساعتها الفاضية ؟؟؟؟ و المليانة كانت غالية عليا



الموضوع بصراحة بقى معقد جدا


انا هاستخير ربنا ان شاء الله


و عاوز رأيكم ...... و لو أي حد ليه معرفة في التوكيل و يقدر يفيدني يبقى جزاه الله كل الخير

دة انت شكلك محتار على الاخر ,,
اولا انا لو مكان حضرتك استنى موديل 2010 دة اولا ,, و لو 2010 نزلت اغلى بفرق كبير و حضرتك مقدرتش عليها يبقى جات من عند ربنا و هو دة المكتوب ,,

و كمان لو 2010 ممكن تلاقى الفئة الاعلى الهيكون فيها شويت حاجات زيادة نزلت كموديل 2010 ,, لان برة ال1.6 بتنزل بكل عوامل الامان

و فى الاخر هرجع و اقولك " قدر الله و ما شاء فعل " ,,

طيب ماشي

خلينا في السيناريو ده

هاستنى ال 2010

الاحتمالات

1- تنزل زي ما هي .... و ساعتها انا زي ما قلتلك انا مثبت السعر مع الوكيل
2- تنزل اعلى في الاوبشنز مع فرق سعر بسيط ...... ساعتها هادفعه و اخد العالية
3- تنزل اعلى كتير بجانب الموجودة حاليا .... هاخد الموجودة حاليا
4- تنزل اعلى كتير و هي دي بس ...... و ساعتها هاسحب الفلوس



المشكلة في رقم 4 هي

اني محتاج عربية عائلية و واسعة .... و للاسف لا الافانزا و لا الليفينا و لا اللوجان mcv داخلين دماغي ..... ساعتها هاجيب ايه ؟؟؟؟؟

فى عربيات كتير تفى بالغرض و زيادة و اللانسر المع حضرتك كويسة ,,يعنى عندك السيتى و الsx4 مشاء الله شنطهم 500 ليتر و انت طالع

اقتباس:

---

المشاركة الأصلية كتبت بواسطة kareemhisham

فى عربيات كتير تفى بالغرض و زيادة و اللانسر المع حضرتك كويسة ,,يعنى عندك السيتى و الsx4 مشاء الله شنطهم 500 ليتر و انت طالع

---

المشكلة اني محتاج MPV

بعد ما خلفت العملية بقت صغبة شويتين


يعني ال Stroller واكلة تلات ارباع الشنطة

و ال Car Seat بتاع البيبي واكل نص الكنبة و الكرسي اللي قدامها لازم يبقى طالع قدام عالاخر


و لو مسافرين و لا بنشتري بقالة الشهر مفيش مكان بنرص الحاجة عالكنبة (النص الفاضي منها ..... ده لو ماحدش معانا !!!!!!)

يعني من الاخر الكارينز متفصلة على طلبي

حد عنده رأي تاني

شوف بما ان الموضوع مش فارق ميعاد الاستلام .....خليك علي 2010
عموما هي حيبان خلال شهر 7 ايه الوضع ..........يعني حتنزل امتي ...فيها ايه ....سعرها اغلي ولا لا
وان كنت اعتقد انه الوكيل حتي الان لو يسلم 2009
ف 2010 حتتاخر جامد
شوف السيراتو 2009 لغايه دلوقتي ما اتسلمتش لنص اللي حاجزين
وبرضه ما اعتقدش حينزل فيها اوبشن مختلفه

اقولك ابعت ميل لكوريا واعرف موديل 2010 اللي نازل مصر .......حيختلف ولا هو هو
ان ماكنش فيه اختلاف اتوكل علي الله وجيب2009
وبرضه خليك علي الاستخاره

الأخ العزيز / ak 1981

أرق التحية

المشكلة اللى أنت فيها أنا برضة فيها مع الفارق أننى لم احجز حتى

الأن ولكن أنا اتخذت قرارى بالانتظار للعام القادم بالرغم من مدى

احتياجى لسيارة عائلية لأن أسرتى كبيرة نسبيا لوجود 3 أطفال ولكن

قرارى كان للأسباب الاتية:-

1 / لحين وصول موعد التسليم المتوقع فى شهر يوليو يكونميعاد نزول

موديل 2010 لأغلب السيارات يكون قد أقترب وبالتالى مش عايز أضيع

على نفسى موديل سنة بأكملها.

2 / بصراحة انا بعد ما تفرجت على السيارة وعجبتنى ولكن تضايقت

لعدم وجود عوامل الأمان اللى هى المفروض تكون أساسية خصوصا

من ناحية ال abs و air bag وذلك لأننى بأشترى سيارة عائلية

حجمها كبير ومعى أسرتى وعلى ذلك فلابد أن يكون معدل الأمان

عالى ومن خلال التجارب السابقة مع شركة كيا وخصوصا فى موديل

السيراتو الشكل القديم نزلت فى البداية بدون عوامل الامان ثم بعد

ذلك نزل منها فئة إضافية فيها عوامل الأمان بسعر أعلى وبالتالى

فهى مسألة وقت وأتقل شوية حتى لا تندم وعموما القرار لك وأرجو

أن أكون قد أفدتك.

وأرق تحياتى

محاسب / هانى سعيد

بص يا سيدي
1- حكايةتسريب سيارتك للاوفر برايس دا ممكن ومحدش يقدر يساعدك فيه غير زنك علي التوكيل

2- بالنسبة للموديل طبعا تستني 2010
3- بالنسبة للسعر وفاضية ولا مليانة ... اللي اقدر ااكدهولك ان حتي بعد نزول موديل 2010 حتلاقي كارينز ب 100 الف و108 اوتوماتيك اكيد لانها نازلة اساسا تنافس الماتريكس وتوقف حالها .. ولو السعر زاد حيفقدوا ميزتهم الاساسية
4- لو الفرق بسيط بين الموديلات وحبيت تعمل اب جريد لموديل اعلي قبل ما تستلم اكيد التوكيل مش حيمانع وحيكونلك الاولوية لكونك دافع فلوس من بدري

5- قبل ما تفكر في المشكلة فكر في شعور حد اشتري ماتريكس في مايو اللي فات وشوف بقي اد ايه هو دلوقتي متحسر وزعلان

6- لا انصحك انك تفكر في سعر اعادة البيع ابدا لانه امر غير منطقي وانت بتشتري عربية جديدة ولا كنت اشتري مستعمل بقي
لاني معتقدش انك حتبيعها قريب


تقبل تحياتي
والف مبروك مقدما واختيار موفق ان شاء الله

أنا اتصت بالتوكيل أسأل عى الأوتوماتيك وقالولى لسه قدامها شعر ولا شهر ونص على ما تيجى
حد عنده أىمعلومات عن الموضوع ده
بيتهيألى إن 19kia مش عارفين حاجة

اقتباس:

---

المشاركة الأصلية كتبت بواسطة cocojumbo3000

أنا اتصت بالتوكيل أسأل عى الأوتوماتيك وقالولى لسه قدامها شعر ولا شهر ونص على ما تيجى
حد عنده أىمعلومات عن الموضوع ده
بيتهيألى إن 19kia مش عارفين حاجة

---

هي فعلا قدامها مش اقل من شهر ...... و ده للي حجز اول يونيو كمان