استفسار عن اركاليون 200

**نور القمر** · 27-06-2009 05:33 PM

ممكن استفسار من اطباء المنتدى المحترمين
انابطبيعتي طول عمري اكلي قليل ومش بنوع في الاغذية فديما حاسة بضعف ومن فضلكم محدش يطلب مني اكل او اخد فاتح شهية لانه مفيش فايدة
وكل مرة بروح لدكتور من احسن الدكاترة ويطلبوا مني تحاليل كتيرة زي الغدة الدرقية وسكر ووظائف ......... ويطلع كله تمام وبرضو كل واحد بيصمم اعملها من الاول
المرة دي قررت اكرر اللي فاكراه من ادويتهم من غير كشف لاني بقيت خبرة اشتريت هيموتون لان الهيموجلوبين عندي 10 وحقن ب 12 لان بيتكرر عندي التهابات الاعصاب في ايدي ورجلي
بس بالصدفة شوفت اقراص اسمها اركاليون 200 ولقيتها لضعف الذاكرة وتنشيط الدورة المخية وتنشيط الذاكرة وطبيعي الضعفان زيي عنده الاعراض دي
عايزة اعرف هل الاقراص دي ليها اعراض جانبية او تتعارض مع الهيموتون او الحقن ب12
كمان اخد الحقن كل 3 أيام ولا كل اسبوع

وشكرا لكم مقدما

**أحمد كمال** · 27-06-2009 08:22 PM

انا مش طبيب بس اسمحي لي احاول اقول لك من واقع معلوماتي المستقاة من الاطباء و من القراءة و الثقافة العامة

اول حاجة اركاليون 200 ده منشط ذهني و يستخدم زي ما قلتي لتنشيط الاعصاب و المخ و الذاكرة و مفيش له اي اعراض جانبية و مش addictive يعني ممكن تستعمليه سنة و توقفيه في يوم مش هيجرالك حاجة

و على فكرة المادة الفعالة فيه هي احدى مشتقات فيتامين B1 يعني هو من الاخر فيتامين

و على حد علمي مفيش تداخل بينه و بين الادوية التانية و هو بيتاخد قرصين بعد الفطار لانه زي ما قلنا منشط ذهني فبيفوق البني ادم

بالنسبة بقى للانيميا انا مراتي عندها انيميا حادة مزمنة و الحمل و الولادة زودوا الطين بلة و اثناء الحمل كنا بنتابع مع استاذ دكتور متخصص في امراض الدم بجانب طبيبة النساء عشان نشوف الانيميا

مبدئيا لازم تروحي لدكتور امراض دم عشان يطلب منك شوية فحوصات حلوين كده (Ferritin, Hemoglobin Electrophresis ...etc) و دي شوية فحوصات تعرفه السبب الاساسي للانيميا لان على حد قوله مش دايما سبب الانيميا نقص في الحديد في الاكل .... ممكن تكوني بتاكلي حديد كويس جدا و برضه تبقى عندك انيميا لسبب اخر

و لو طلع ان سبب الانيميا سوء امتصاص حديد أو نقص حديد انا شخصيا مانصحكيش بالحقن (اقصد حقن الحديد) لانها مقرفة و بتوجع و بتعلم في الجسم جامد ..... نصيحتي ليكي و دي من دكتورنا برضه و هي اللي قدرت بعد فضل الله ترفع مستوى الهيموجلوبين عند مراتي كالاتي

1- الابتعاد عن كل ما يكسر الحديد : الشاي و القهوة و النسكافيه و الكابوتشينو و الشيكولاتة و الكولا ..... معلش انا عارف انها صعبة شوية بس عشان صحتك

2- زيادة الماكولات المحتوية على حديد طبيعي .... مثل الباذنجان و العسل الأسود و التفاح (التفاح بالذات جامد جدا) و عصير التفاح الطبيعي و الكبدة و اللحوم الحمراء و الجوافة و الرمان و البقدونس و الخرشوف ...

3- مساعدة الجسم على امتصاص الحديد بتناول اقراص فيتامين سي و يفضل اقراص طويلة المفعول مثل سي ريتارد 500 مجم و كذلك شرب عصير الليمون و البرتقال الطازج ..... فيتامين سي لا يحتوي على الحديد و لكنه يسهل و يزيد من امتصاص الجسم للحديد في الماكولات

4- اخيرا و ليس اخرا فيه دواء مستورد اسمه Ferroglobin بلاش المصري منه خليكي في المستورد .... ده كبسولة واحدة يوميا بعد وجبة تقيلة (الحديد بيقلب المعدة و لو خدتيه على بطن فاضية هترجعي) و ده كويس جداااااااااااا

و ادعو لك بالشفاء و العافية ان شاء الله

**Dr_Smart** · 14-07-2009 07:33 PM

ما انصحكيش بالاركاليون خالص

هتتعودي عليه وهتبقي حاسه بالكسل لو مش خدتيه

انصحك تاكلي تفاح يوميا one apple aday keeps doctor away وطبعا مهضم ومغذي

ولو عايزه وزنك يزيد شويه عليكي بعسل النحل والعسل الاسود ... و growth formula اللي بييجي في الاعلانات ده بودره كده بتتحط على كباية لبن زي الكاكاو والتانج

لو محتاجه multi vitamins يعتبر مكمل غذائي وفاتح للشهيه ايضا ومنشط ... انصحك ب vitamax كبسوله يوميا او يوم بعد يوم

معلش الرد متاخر

**mohd_k7** · 14-07-2009 08:19 PM

آآآآآآآآه ، جيتي على الوجيعة
أركاليون ........أنا هحكي لك عمل معايا إيه
أنا في طب عين شمس وطبعا سمعتي الدكاترة في الكلية ده بيحاولوا أد إيه يعصروا آخر نقطة دم فيكي المهم أنا كان عندي امتحان رمد من حوالي شهر كده وكنت قعدت حوالي اسبوع بنام 3 ساعات بس وليلة الامتحان كنت مطبق وجيت الصبح قبل الامتحان لقيت نفسي مهبط وناسي كل حاجة ومش عارف أركز في حاجة خالص فواحد نصحني بالأركاليون وأنا برضه قلت ده منشط للمخ و أكيد على الأقل مش هيضر وهما حبايتين وفين يوجعك ، دوخة، مغص ، قيء والذي منه وطبعا خلاني عكيت كويس
الخلاصة إن ربنا خالق حوالين المخ حاجة اسمها Blood Brain Barrier وده عشان كل الأدوية اللي تاخديها ما تعديش من الدم على المخ إلا الأدوية اللي مصممة عشان تعدي الحاجز ده والمخ عضو حساس جدا وهو control unit بتاع كل حاجة في الجسم وربنا ليه حكمة في كده فبلاش أي أدوية توصل للمخ إلا إذا كان ليها حاجة ضرورية فعلا وموصوفة من دكتور مخ وأعصاب وألف سلامة عليكي

**Ahmed Selim** · 14-07-2009 08:30 PM

أستاذة نور

أولاً شافاكى الله و عافاكى

ثاتياً المقويات الطبيعية الغنية بالفيتامينات كتيرة قوى و متعددة و معظمها بيبقى فيه تركيز عالى من نوع معين من الفيتامينات
يعنى عندك مثلاً مشتقات الجينسنج ( نبات طبيعى ) زى الشاى و كبسولات تحتوى على خلاصة الجينسينج
و كمان عسل النحل الجبلى....مش العادى

المهم أنتى تعرفى أيه أكتر الفيتامينات أفادة لحالتك و تحاولى تشوفى أيه من المنتجات الطبيعية فيه الفيتامينات دى بنسب عالية و تواظبى عليه..........أعتقد كده أحسن من الأدوية.....و الله أعلم.

**Ahmed Selim** · 14-07-2009 09:34 PM

منتجات الجينسينج كتيرة

أتصلى بصيدلية من الكبار ( العزبى و أعوانه ) و أسألى عندهم.....أعتقد هتلاقى كذا منتج

**Dr.SherifMansy** · 16-07-2009 01:14 PM

الف سلامة عليكى يا استاذة نور

طبعا انا قريت اللى اتكتب كله و كله كلام كويس و لكن لى تحفظ قوى على تنفيذه ...

أولا مين قرر ان الأنيميا اللى عند حضرتك نقص حديد و لا نقص فيتامين ب 12 ؟؟؟
دول نوعين مختلفين من الأنيميا ..

ما ينفعش امسك العصاية من النص و اخد من كل بستان وردة علشان اغطى كل الأحتمالات..

حضرتك عارفة ان الأنسان لما يأكل قطعة كبدة بحجم علبة الكبريت بياخد مخزون ب 12 يتخزن فى الكبد و يكفى 5 سنين ؟؟؟

شوفى حضرتك مصير الحقن اللى بتاخديها يعمل حمل على الكبد للتخلص من الزيادة لو حضرتك ماعندكيش نقص حاد فى فيتامين ب 12

اما الحديد فبيعمل امساك و مشاكل فى الجهاز الهضمى ...

المريض بيضطر ياخد الدواء و يتحمل مشاكله لأن الفايدة اللى هاتعود هاتكون اكبر و لكن فى حالة حضرتك انا شايف ان ممكن نأذى اكتر ما نفيد بالأدوية بالطريقة دى..

المفروض نتابع مع حد باطنى كويس و نعمل تحاليل و فحوصات لغاية ما نحط ايدنا على المشكلة و نعالجها و نستأصلها من جذورها

و صدقينى ساعات بيبقى الحل بسيط جدا و مش محتاج وجع القلب ده كله..

لازم نمشى فى الطريق الصح

طبعا انا مقدر ان الواحد بعد فترة بيزهق و لكن معلش .. لازم نصبر .. و على فكرة ... لازم ابلاغ الطبيب بكل شئ ، احيانا حاجة تبدو للمريض مش مهمة و لكن لها اهمية كبيرة عند الطبيب (مثلا عادة الشعب المصرى شرب الشاى بعد الأكل و هى أحد اهمام اسباب انيميا نقص الحديد ، لأن الشاى بيمسك فى الحديد اللى فى الأكل و ينزله فى البراز)

و الف سلامة عليكى مرة تانية

الموضوع: استفسار عن اركاليون 200

LinkBack

أدوات الموضوع

عرض

-

-

-

-

المواضيع المتشابهه

استفسار

استفسار

استفسار

استفسار هام جدا

استفسار 307

الكلمات الدلالية لهذا الموضوع

المفضلات

المفضلات

ضوابط المشاركة