بص هقولك على حاجةإحنا قدام بيتنا جراج كنا بنركن فيه و بعدين واحد إشتراه و خلاه جراج تاكسي بس .
و من خلال الملاحظة قدرت أجمع عيوب مشروع التاكسي و لقيت إنه مليان عيوب و مش بالسهولة الي متخيلنها لأنه بيحقق ربح كويس بس برضه بيحقق كمية مشاكل غريبة !
1) فئة سواقين التاكسي (اللي هم دي شغلتهم) مع إحترامي معظمهم بلطجية .. و من ساعة ما الجراج ده بقي تاكسي بقي عادي جداَ إننا نشوف خناقة بالسلاح في الشارع ما بين سواق و مالك تاكسي و طبعاَ اللي مرفوع عليه السلاح هو مالك التاكسي!
2) حصل مشكلة كبيرة قبل كدة لأحد ملاك التاكسي لأنه كان مشغل سواق طلع كان بيوزع مخدرات و مداري علي نفسه بالتاكسي و إتمسك و العربية إتحرزت .
3) سواقين بتسرق حاجات من العربية و تفكها و تركب مكانها حاجة بايظة أو أقل منها لذلك يجب تبقي مصحصح أوي في إستلام العربية من السواق لأن الحاجة دي ممكن تكون أي حاجة تتخيلها !
4) الحوادث .. بشوف عربيات داخلة الجراج باين أوي إنها مقلوبة .. و عربيات واخدة خبطات خفيفة و خبطات كبيرة ... إنت و نصيبك .. و المفروض إن الواحد و هو سايق عربية مش بتاعته بيخاف عليها إنما مع سواقين التاكسي بتيجي بالعكس !
5) المخالفات ! السواق يشتغل معاك شهرين و يخلع و تروح إنت تجدد تلاقي رقم هلامي !
6) العربية بتتهلك بسرعة و بتبقي محتاجة نظافة كتير و تجديد في الداخل لأن الفرش اللي بيتحط مبيكملش .
7) معظم السواقين بيشتروا بنزين 80 في جراكن و يخزنوه و يفولوا الخزان بنفسهم قبل ما يطلعوا و يبقي بيحطوا و السيجارة في إيده .. دي حاجة هايفة طبعاَ بس انا شايف إنها ممكن تخلي المنطقة كلها تولع بكل بساطة !
أباطرة التاكسي في القاهرة كل واحد بياخدله أرض فضاء يعملها موقف و يجيب فيها ميكانيكي و سمكري و محل يعمله مخزن قطع غيار علي كام شاب صغير من الأرياف بيمسحوا العربيات و يغسلوها في تسليم الورديات و بكدة بقي عنده مؤسسة كاملة و إكتفاء ذاتي .
انا حطيت الموضوع تحت عيني و بقيت متابعه بسبب الفضول عالجراج اللي بقي قدام البيت ده .. بس هو الحقيقة مشاكله كتير فعلاَ .
مش كله بلطجي بالذات سواقين التاكسي دول
والله فيهم نسبة كبيرة متعلمين ومتحضرين
المفضلات