التمبرا بتضرب مدافع

**ZALABANY** · 28-06-2009 11:55 AM

ياشباب العربيه بتاعتي تمبرا كاربيراتير مش انجيكشن بتضرب مدافع بس على فترات متباعده
ولاحظتها لما ابقى على سرعه 100 مثلا واشيل رجلي من على البنزين وبعدين أحطها تاني تروح ضاربه مدفع غير كده ما بتضربش
مع العلم اني غيرتلها البوجيهات وبحط بنزين من امارات مصر اللي قبل كارفور ياتري المشكله ممكن تكون فين

**galilio_mad** · 28-06-2009 02:12 PM

اضبط كهربا الاول و بنزين 90 ( ال 90 فى المكن ده احسن من 92 )
و الكهربا تتضبط بالمللى و لا تقديم ولا تأخير
جرب و شوف الدنيا فيها ايه

و بعدين اللى بتسمعه و بتحس بيه مدفع كهربا و لا كتمه جامده و بتروح بعد ثانيه او اتنين ؟؟؟

**ZALABANY** · 28-06-2009 02:23 PM

شكرا على سرعة ردك جاليليو باشا
لا هي مدافع مش كتمه وبعدين هو مش المفروض الاسبراتير ده الكتروني بيظبط نفسه انا اعرف ان اللي بيتظبط الاسبراتير العادي لكن تقصد ايه بأظبط الكهربا

**cheetos_892005** · 28-06-2009 02:58 PM

انا حصلي كده مرتين بس في
131
مره كان السلك اللي خارج من الموبينه للسبلاتير العازل بتاعه وقع و كان ملمس في الصاج
تاني مره كان الشاكوش عايز يتمسح بس
شوف وجرب

**Ashraf_Ashraf** · 28-06-2009 03:13 PM

اعتقد دى تقسيمه سير الكاتينه محتاجه مراجعه علشان تظبط توقيت الشراره

**ZALABANY** · 28-06-2009 03:18 PM

المشاركة الأصلية كتبت بواسطة ash_rsi

اعتقد دى تقسيمه سير الكاتينه محتاجه مراجعه علشان تظبط توقيت الشراره

يعني يفك سير الكاتينه ويراجع على تركيبه ولا ايه بالظبط يا باشا

**Ashraf_Ashraf** · 28-06-2009 03:31 PM

ايوه ياباشا بتروح للميكانيكى بيفك اول بوجيه ويشوف منه حركه البستم مع ذنب التقسيمه لو مش مظبوطه هيفك السير ويعدله على التقسيم الصح
بالتوفيق وابقى عرفنا وطمنا عليك

**ahmed_su** · 28-06-2009 03:43 PM

الاشعال الكترونى يا باشا بس الاسبراتير فيه تقديم وتاخير

بواسطة مسمارين تهويهم شوية وبيتحرك كام درجة فى اتجاه عقارب الساعة

وعكس اتجاه عقارب الساعة - وافضل بنزين مع المحركات دى هو الـ 90 فعلا زى ماقلك جاليليو باشا

**ZALABANY** · 28-06-2009 06:56 PM

المشاركة الأصلية كتبت بواسطة mezo73

بص ياباشا في 3 اسباب للمدافع
الاول زي ما الاخوة تفضلوا وذكروا ان الكهرباء ذيادة وعايزة تتقلل شوية مع ظبط الهوا بتاع الكاربرتير لتظبيط الخليط الهوا والبنزين
الثاني وهو عدم ضبط التاكيهات واللي بيحصل في الحالة دي ان التاكيهات بتبقي محملة فالصباب ميبقاش مقفول تماما ويعدي شوية بنزين في غير الشوط المناسب ويسبب المدافع
السبب الثالث هو ان يكون في شربون علي وش البستم ولما الموتور بيسخن الشربون دة بيبقي عامل زي نار الفحم بمجرد البنزين مابينزل علية بيشتعل ويسبب الاشتعال المفاجئ في غير الشوط المناسب

mezo73 تسلملي على الرد والتحليل انا اظن ان السبب هايبقى الاول او التاني لأن العربيه مش بتبقى سخنه وه ي بتضرب مدافع
ahmed_su شكرا على المعلومه يا باشا
ash_rsi أفادكم الله يا باشا