الموضوع: أنا واسبرانزا !!!!!!

النهاردة كنت مروح ووقفت مستنى تاكسي الأسبرانزا {مقيم بالسويس} يمكن يجى فاضى وفضلت مستنى وآخر ما زهقت قلت اركب الميكروباص {التاكسيات غالية اوى بالسويس} ويدوب الميكروباص طالع لقيت التاكسي ماشى جانبي فوريرة {أول حسرة} المهم طلع الميكروباص وبعد 100 متر لقيت التاكسى وبيرجع بضهره قلت أكيد هيركب زباين واحنا بنقرب عليه مفيش حد ركب معاه فبدأنا نقترب أكثر من التاكسي فقلت لسائق الميكروباص أن يقف ولسة هنزل من الميكروباص لقيت التاكسي فص ملح وداب {تانى حسرة} طبعاً اعتذرت لسائق الميكروباص وحكيت له انى عايز اشترى سيارة مثل هذا التاكسي وكنت عايز اسئله على العربية ...
المهم وانا مروح لقيت سواق الميكروباص بيشورلي على سيارة اسبرانزا آخرى لكن ملاكي وبالصدفة وقفت قريبة من بيتى مكدبتش خبر ورحت رايح عليه وعرفت منه انها موديل 2006 وسألته عن مشاكله مع السيارة فأكد لى أنها سيارة ممتازة جداً وحكى لى عن مشكلة العفشة وأن التوكيل معاملته ممتازة وأنهم سيزيلون هذا العيب عما قريب ...

وطبعاً لم أنسى ابلاغه عن المنتدى وعن الرابطة وللأسف أبلغته اننى من الرابطة {وانا لست كذلك } وهو لم يبدى اى اهتمام بالمرة ... وكأنه يقول لنفسه من هذا وماذا يريد وطبعاً انا لحقته على طول حتى لا يضع فى نفسه أي شك تجاهى وبدأت اوضح له أهداف المنتدى والرابطة وأنها لمصلحته وان كل الخدمات الذى يقدمها مجانية وهنا فقط عندما سمع كلمة مجانية بدا عليه الأهتمام وسئل عن أسم الموقع مرة آخرى وقال أنه سيزوره عما قريب ...
وبعد ما تركته حسيت بإحراج بالغ لكن كله يهون علشان منتدانا الغالى وحتى تكبر الرابطة أكثر فأكثر {لغاية مأدخل فيها رسمياً}....

شكراً جزيلاً ...
وآسف على الأطالة ...