اول امبارح كنت واخد المدام وجري على معمل التحاليل من اخر عين شمس ( بيتنا ) للزيتون حيث معمل التحاليل
وكانت الساعة لسه داخلة علي سبعة فتوقعت ان الدنيا هتبقي هنا وهمشي في الشارع واعمل خمسات وتمنيات من كتر ما الطرق هتبقي فاضية :lol:
وانا عادة باخد الطريق الموازي لمترو الانفاق مرورا بترعة الجبل لحاااااااااد الحلمية
ولسه بقول يا هادي ومع اول محطة مترو فوجئت بكم غير عادي من التكاتك اللعينة حوالين المحطة وده خارج وده داخل وده بيحمل وده بيفرغ وصادف انة كان الوقت اللي المترو بيفضي فيه حمولتة العجيبة الحجم من خلق الله الشارع بقي يضرب يقلب والمرور وقف تماما الا من زحزحات مشوبة بالخطر تفاديا لتوكتك يحك فيك او اكصدام يريح عليك :shock:
بداءت اتعصب خاصة وانا ملحقتش افطر ولا استريح بعد الاكل لاكن شوية وبدائت الازمة تنفرج شيئا فشيئا وما لبث ان انفرج حتي عاد ليزدحم مع الاقتراب من محطة المترو اللي بعدها :cry: والموضوع ده اتكرر علي مدي محطات عزبة النخل عين شمس المطرية لدرجة اني بقيت خلاص هنفجر من العطلة وازيز التكاتك الملعونة :evil:
واثناء الخنقة اللي كنت فيها دار حديث بيني وبين حرمنا المصون عن التوك توك
المدام رايها ان التوك توك حلو وشكلة لطيف وان الشباب بتاكل عليه عيش في ظل البطالة اللي بنعاني منها وان التوك توك وسيلة مواصلات بتحل ازمة في الطرق الضيقة اللي متستحملش دخول عربيات وانها ارحم من رعونة الميكروباصات وفزلكة التاكسيات ومش بس كده ده افضل بيئيا لانه ملوش انبعاثات كبيرة ولا مش عارف ايه
ربك والحق انا دمي فار وانفجرت في وشها انبعاثات ايه ونيلة ايه ما انتش شايفة اهو عيال صغيرة اللي راكباه وشاطحة يمين وشمال والواحد خايف يخبط واحد يقوم البتاع ده يتقلب والناس تتمرمغ في الارض وهما مش خايفين علي نفسهم وملهومش رخص ولا نيلة
وبعدين علي ايه سعرة يعدي 20 الف ولما هو حل ليه ميتصنعش في مصر وبكده نساعد علي تقليل البطالة ومنضيعش فلوس الناس في تكاتك وهبل
وبعدين مين قالك اصلا انهم اللي بيستفيدوا منة شباب دول كلهم مقاطيع الميكروباص والعربيات المهكعة الاجرة باعوا عربياتهم وجابو بيها تكاتك ومشغلين عليها شباب صغيرين واحيانا اطفال ويييييييك وييييييييييك ويييييييييك ومخلصناش طول السكة
وبليل لما روحت التففنا حول الشاشة الفضية الصغيرة لمشاهدة مسلسل تامر وشوقية واذا بمشكلة التوك توك موضوع الحلقة اتاري الموضوع كبير اوي وانا مش واخد بالي
المهم اني من ساعتها وانا بدات احط التكاتك في دماغي مع محور الشر القديم ( الميكروباص الصغير وال 24 راكب - وعربيات النص نقل - والمقطورة )
بس وبعدين الطرق الستراتيجيه لبيتنا كلها بقت محاصرة بكيانات ارهابية معادية من ناحية التوك توك ومن ناحية تانية الميكروباص ومعتقدش ابدا اني هقدر اتأقلم مع التكاتك والا كنت تاقلمت مع الميكروباصات
كده مفيش حل غير اني اقفل الشقة وارجع اقعد في الشروق جمب الحاجة بس مشوار الشروق رايح كاي هيضيع فيه علي الاقل 60كم يوميا ومشوار الشغل من البيت رايح جاي لا يتعدي ال 15 كم
بس انا مش هسكت وهنتجم بس تفتكروا مين صح انا ولا التوك توك