الموضوع: TE Data طلعت روحي وكرهتني في النت

تى اى داتا .. شركة انا مشفتش معاها يوم عدل بالرغم من انى اشتركت معاهم من 2004 .. قعدت 3 سنين فى خلاف معاهم بسبب نظام الحسابات بتاعهم اللى مفيش فيه اى مرونة و خسرونى ايام كثيرة فى اشتراكى بسبب النظام الهباب ده و بعد كدة طلبت منهم توقيف الحساب عشان هانقل سكنى من مدينة نصر ل 6اكتوبر و اكدت معاهم بالتليفون و بعدما نقلت قالولى كان لازم تاكد بايميل او فاكس او اخطار فى السنترال و لم يعترفوا بمكالمة التليفون و ضاع عليا الاشتراك الشهرى

عملت الغاء للتعاقد و رجعت الراوترو جبت المودم بتاع موبينيل رغم ان اشتراكه غالى و قعدت 4 شهور منتظر رقم الالغاء عشان اقدم بيه فى لينك و هما مش عايزين يدونى الرقم و بعد ما ادهولى بالعافية فضلوا حاطين اجهزتهم على الخط بتاعى فى السنترال و موظف لينك معرفش يعمل حاجة لانها جريمة انه يشيل اجهزة شركة تانية .. اشتكيت ل155 و اتضح انهم تبعهم و حاولوا يحلوا المشكلة ودى و بمياعة و لم يقدموا جديد الى ان اشار عليا احد موظفى لينك بتهديدهم بعمل محضر فى القسم ان لم يسحبوا اجهزتهم و نفذت النصيحة فعلا و تانى يوم كان واصلنى الخدمة من لينك

الخلاصة لو تسمع كلامى دى شركة مغرورة و متعجرفة و على فكرة هى مملوكة للمصرية للاتصالات يعنى السنترالات كلها تحت امرها و حتى الجهاز القومى للاتصالات مقدرش يعمل لهم حاجة بالرغم من انى اشتكيت مرة موبينيل بعد مشكلة استمرت شهرين و هما مش عايزين يرجعولى 150 جنيه مستحقات و لما كلمت 155 لقيت بعد 3 ايام موظف موبينيل بيتصل بيا و هو منكسر و بيقولى تعالى استلم شيك بالمبلغ

اتاكد الاول من الوصلات بتاعتك و من الاسبليتر و الفلتر و اتاكد برضو ان الوصلات بتاعتك مش جنب خطوط كهرباء او اى حاجة ممكن تشوش عليها و لو اتاكدت ان كل ده فى السليم و ان العيب من تى اى داتا متنتظرش منهم اى مساعدة لانهم بيتعاملوا بمنتهى العجرفة و التعالى على الناس و اعمل الغاء و انقل على اى شركة تانية و ريح دماغك من القرف ده

انا حاليا بقالى مع لينك 7 شهور و اكثر و الناس ناقص بيوسوا اديا و كل شوية يتصلوا يطمنوا على الخدمة و جودتها و النظام المحاسبة عندهم مرن جدا و ممكن تقدر تغير نظامك و توقفه و تشغله و تغير السعرة و انت قاعد على النت من غير ما تتصل بحد

بس المشكلة انى سمعت ان المصرية للاتصالات عايزة تشترى لينك كمان عشان تحتكر السوق كله و ساعتها هابطل نت خالص