سؤال لو سمحتم عن المصنفات والسيبر !......

**eng.octooo** · 30-06-2009 04:23 PM

بسم الله الرحمن الرحيم

انا كنت نازل رايح سايبر امبارح وفجاة لقيت كل السيبرات (جمع سيبر)
مقفولة ولما سالت قالولى المصنفات جاية وهاتاخد الحاجات الى عندنا لو فتحنا المحلات

وانا كنت حاطط فى دماغى انى اعمل مشروع سيبر بس لما شفت المنظر الموضوع تراجع شوية

بس انا عاوز اسال هما بتوع المصنفات دول بيجوا يدوروا على اية بالظبط واية المخالف ؟

**fox3d** · 30-06-2009 04:35 PM

هم بدور على البرامج المنسوخة و خصوصاً الوندوز و الحل بسيط ان شاء الله
تصريح مصنفات من وزارة الثقافة تقريباً بيكلف 300 جنية كل سنة و كل سنة وانت طيب

**eng.octooo** · 30-06-2009 04:40 PM

تصريح مصنفات من وزارة الثقافة تقريباً بيكلف 300 جنية كل سنة و كل سنة وانت طيب

وانت طيب وشكرا على الرد السريع

والتصريح دة علشان اخدة لازم يكون عندى وندوز وبرامج اصلية ولا ممكن برامج منسوخة ويطلعولى التصريح عليها ؟

يعنى التصريح دة لو انا جبتة اول ما المصنفات تيجى اوريهم التصريح دة ويمشوا ولا اية ؟ وشكرااااا

**Abdo_Eldesokey** · 30-06-2009 04:45 PM

بص بتوع المصنفات بييجوا بعربية نص نقل ويشيلوا الي يقدروا عليه

ومهما مشيت عدل ورخصت كل حاجة عندك في السيبر ... بردوا هيطلعولك القطط الفطسانة

كنت من كام أسبوع في شركة الكومبيوتر الي بتعامل معاها لقيتهم قافلين باب الشركة والأنوار ، فسألتهم فيه إيه ؟؟

قالوا المصنفات نازلين ، قلتله طب وانت عندك إيه مخالف ، حاجة الكومبيوتر كلها Trademarks

قالى هما بيخشوا الشركة يقلك انت مشغل الجهاز ده ليه على الفاضى ويدفعك غرامة ، الشاشة دي جايبها منين وياخدها

من الآخر بلطجة وقلة أدب

**kamatchodj** · 30-06-2009 04:50 PM

التصريح ده اول خطوه

وده شئ لابد منه

من غيره ها يتعمل لك محضر اداره محل بدون ترخيص وده حكمه سجن وغرامه تصل الى 5000 جنيه ويتم مصادره الاجهزه

وكمان خللى بالك من توافر تراخيص الويندوز للاجهزه لان لو معاك ترخيص اداره ومافيش رخصه ويندوز برده مصادره وغرامه

والجديد ان امن الدوله احيانا بتلزم السايبرات بعمل سجل للرواد وفيه بياناتهم وده صداغ

نصيحه لوجه الله المشروع ده فاشل وكله مشاكل وعائده بقى ضعيف ياريت تشوف غيره

وكمان محلات البلاى ستايشن بينطبق عليها نفس الشروط

**eng.octooo** · 30-06-2009 05:00 PM

شكرا على الردووووووووووود وانا شيلت الموضوع دة خالص لانة كلة مشاكل بجد يعنى ييجى واحد اخلية يكتب اسمة وحضور وغياب دة الكلية ارحم شكرا ليكم على سرعة الرد

**أحمد كمال** · 30-06-2009 05:02 PM

المشاركة الأصلية كتبت بواسطة abdo_eldesokey

قالى هما بيخشوا الشركة يقلك انت مشغل الجهاز ده ليه على الفاضى ويدفعك غرامة ، الشاشة دي جايبها منين وياخدها

من الآخر بلطجة وقلة أدب

هي وصلت لكده؟؟؟؟؟

يعني ايه مشغل الجهاز عالفاضي ؟؟؟؟؟؟؟؟؟؟؟

**MoOoD** · 30-06-2009 07:05 PM

لا ياباشا الحكومة مش نايمة على ودانها

يبقى أكيد نايمه على جانبها اليمين هههههه
لازم تراخيص وندوز وسجل زوار وعداد كهربا تجارى وتليفون تجارى وبرامج أصليه أو تراخيص البرامج دى وممنوع الرايتر وممنوع طباعه الورق ....وحاجات كلها قرف فى قرف.
ولو عندك ده كله أكيد هيطلعلك حاجه جديده

**mobitic** · 30-06-2009 09:39 PM

الحكومة عامله لكل مواطن عفريت علشان يخاف منه وما يلعبش بديله
يعنى لو عديت من المصنفات
مش هتعدى من التموين ( يعنى فواتير وسلع مجهولة المصدر ولو معلومة المصدر تبقى مش مختومة ولو مختومة تبقى بلد المنشأ مش متكوبة على السلعة من بره او جوه وحوارات كتييييييييير )
لو عديت من التموين يبقى مش هتعدى من المرافق ( ابسط حاجه يقولك اشغال طريق عام )
لو عديت من المرافق مش هتعدى من الضرايب ولا أمن الدولة ولا الصحة
وووووووووووووووووووو
حضرتك فاضى ولا نكمل هههههههههههه

الموضوع: سؤال لو سمحتم عن المصنفات والسيبر !......

LinkBack

أدوات الموضوع

عرض

سؤال لو سمحتم عن المصنفات والسيبر !...... - انشر الموضوع فى :

-

-

-

-

-

-

-

المواضيع المتشابهه

سؤال لو سمحتم

سؤال لو سمحتم

سؤال لو سمحتم ؟؟

سؤال لو سمحتم

الكلمات الدلالية لهذا الموضوع

المفضلات

المفضلات

ضوابط المشاركة