الموضوع: بروتون بين الحاضر والمستقبل ( عربيتى بتصيف فى التوكيل )

المشاركة الأصلية كتبت بواسطة MuhammedSoliman

يا جماعه قبل ما أبدا الموضوع تردد كثير قبل نشره ولكن سأنقل لكم تجربه ووجهة نظر

أول امبارح كنت نازل من دكتور الاسنان بتاعى بعد ما عمل ليه سمكره تمام فى الرفارف أقصد ضروسي وكنت خلاص مستوي على الأخر المهم نزلت دورت العربية لاقيت صوت كده معجبنيش خشونه كده حبت أصوات خافته ... المهم قلت فى عقل بالى أنا هوديها الصيانه بتاعت الماليزين ديه واشوف وانا ماشي الصوت بدأ يعلى وانا جنب البيت تقريبا فادخلت فركنت وفتحت الكابوت وهيه دايره لقيت التاره المتوصله بطرمبة المسه بتلعب شويه ومع أصوات غير طبعيه تسمعها تقول الموتور بتكسد وراحت العربية هب واقف فاستنتجت ان الطرمبه ضربت قلت كويس انها عاملتها تحت البيت وكمان جالى شك فى السير والبلية قلت مافيش داعى للمخاطره ورحت مكلم واحد صحبي جاب كساحه وجالى فى سموحه ورفعت العربية عليها ( طبعا مألكوش على شعوري والعربية بتترفع كنت بخبى نفسى ما الناس اللى انا هريهم بروتون بروتون بروتون ... وطبعا ده معرض ليه اي عربية حتى الميرسيدس ) المهم رحت شاحنها على التوكيل بتعنا فى اسكندريه وسبتها بالليل على الساعه 9 بعد ما كنت اتسويت وكل الأفكار الشريره جت فى دماغى سواء بقا قلة قطع الغيار ولازم على القل بقا احضر بتاع 30 ألف جنيه مصنعيات وأربعين ألف قطع غيار والكلام اللى انتو عارفينه ده .... المهم سبت العربية ورحت تانى يوم قابلنى المهندس محمد صلاح بابتسامته الحلوه وقالى خير شرحت ليه الموقف وقالى هشوف واقول لك وهتاخد تقريبا يومين وبعدين يا اسيادنا عرفت انها طرمبة مياه و ديه ب550 جنيه غير المصنعيه واللذى منه ..... قلت والله خير والغريبه انى لقتها فى التوكيل عادى كده من غير حاجه قلت بقا بالمره أغير سير الكاتينه والبليه بالمره ( واخد بالك يا ايمن ) عشان زى ما انتو عارفين طالع الاسماعليه مع الجروب اللى طالع يوم الجمعه وكان معايا كما فيبر الراجل بصراحه هريته تليفونات لما تعبته .... المهم ما كنش فيه لا سير ولا كاتينه والعربية اتفتحت ووجدوا البليه لازم تتغير فقالوا لى انها جايه النهارده والمفاجئة مافيش اللى سير فقط والبليه ماجتش واتكلمت مع المهندس محمد صلاح والمهند عبد الحكيم الناس بصراحه كانوا مقدرين الموقف وفعلا همه مالهومش ذنب فى حاجه وطبعا كل الناس بتحط عليهم مع إن مالهومش ذنب فعلا وعايزين يخدموا ويخلصوا شغلهم ....... المهم دخلت للمدير الباشمهندس رشدى اللى بدوره قام اما بالاتصال بالقاهره عشان البليه مش موجوده خالص طب ايه اتضح ان همه فلعلا طالبين طلبيات من ماليزا وبتجيلهم ناقصه وان الدفعه اللى جايه هتوصل الخميس وعبال ما اتيجى اسكندريه هتبقى الاحد وانا عايز اطلع اصيف .............. طبعا الباشمهندس رشدى كتر خيره فعلا هو راجل محترم وطبعا عنده خبره كبير فى امتصاص غضب العميل وقال لى هيحاول يتصرف على بكره هيرد عليه وكتر خيره هوه الاخوه المهندسين اللى معاه


قبل كده كنت باغضب من الوكيل ده اوى بس بدأ يتغير مافهومى للموضوع طب ما هوه برضوا هيعمل ايه بيطلب الطلبيات وبتجيله ناقصه ( مش معنى كده برضوا ان التوكيل ما فوهوش عيوب بس أهوه الحال ماشي حتى بالكلمه الحلوه هنضطر نمشيها كلام وخلاص ) ومش ملاحقين على قطع الغير ..... طب العيب فين هل الوكيل يعجبه ان العربيات مرميه عنده فى المخزن وهيه مدمره مش لاقيه قطع الغيار .. ولا بقا العيب من المورد الأساسى فبينى وبين نفس ي قلت مع الاحترام الكامل للماليزين بس الظاهر ... مش عارف من حبيى للعربية والتجربه الماليزيه مش قادر أقول اللى وصلكم ........ طب ياتري ايه المستقبل ؟؟؟؟؟؟؟؟؟؟؟؟ بعد تجربة 3 سنوات من إنتاج الجين تو .... واحنا عارفين ان المستقبل أساسه الحاضر طللما الحاضر كده طب ايه المستقبل للعربيات بتاعتنا ........ او ما الذي فى جعبة ماليزا والشركه الأم وماذا ايضا فى جراب التوكيل هل سنظل نعانى أم ماذا

هل يعقل ان الخدمات الأساسيه للسياره غير متوفره على مستوى الجمهوريه ؟؟؟؟؟؟؟؟؟ سواء بسبب الشركه أو التوكيل مع إنى المره ديه فى صف الوكيل شويه ..... على كل الأحوال سيارتى فى التوكيل من يومين ومنتظر اسلمها على اسوء التقدر الاحد القادم إن لم يكن هناك حل

ودمتم

الى اقدر اقوله ..... ربنا يستر .

لازم فعلا يكون فى اهتمام بتوفير قطع الغيار و بسعر معقول ... و كمان يبقى فى اختبار جوده حقيقى ...مش العربيه تنزل بعيوب تصنيع او تقفيل علاشان تتصلح بعد كده .... حاجات بسيطه زى التزييق و الجلده الى بتقع , بس ليه ماتتعملش صح من المصنع ؟؟ طلاما ان العيب معروف .. يعنى العلاج معروف ؟؟

المشاركة الأصلية كتبت بواسطة A. Ibrahim

بصرحه معاك حق لزم الاساسيات ده تكون موجود انا شاىف ان موضوع الصىانه و قطع الغيار لزم و يكونوا على رئس موضوعتنا المقبله الجىه

فعلا ياباشا لازم يكون على رأس مواضعنا واشكرك على المشاركة ديه وخالص تحياتى ليك

المشاركة الأصلية كتبت بواسطة مصطفى_صديق

حضرتك معالك حق طبعا ..حاجة تضايق جدا ان قطع الغيار الاساسية مش موجوده
بس انا ليا رأى
موضوع قطع الغيار المعمرة اللى بتتغير عند كيلومتر عالى او بعد فترة طويلة بتعتمد على العرض والطلب ..يعنى عمر العربية فى السوق بيحدد قطع الغيار اللى عليها سحب...
فابالتدريج ومع الوقت...وانتشار العربية..طبيعى ان هايبقى فى طلب ويبقى فيه مخزون من معظم قطع غيار العربية
ولكن..ده لا يعفى التوكيل طبعا من ضرورة تجهيز قطع غيار بصفة دائمة للحالات الطارئة ...والا يبقى ايه لازمته بالاساس
وتقبل تحياتى

يا درش أخبارك ايه ؟؟؟ بص طبعا هيه عرض وطلب وبس فى حجات ماينفعش فيها العرض والطلب انا شاري سلعه لازم أوفر قطع غيارها وإلا هفقد المصداقيه عند الزبون حتى لو فى عربية واحده فى الجمهورية طب يا باشا ده غى عربيات بالهبل بقت بروتون يعنى الشركه مش عارفه انها لازم تغيرلهم الحجات الدوريه ديه ؟؟؟ ده كمان طلعت المشكله من الشركه الأم حسب ماعرفت على العموم قدر الله وما شاء فعل ... فى كلام كتير ممكن يتقال بس حبي للسياره مانعنى عن الكلام على أساس إن ده وارد فى عربيات دنيه يعنى واشكرك على اهتمامك يا جميل وتحياتى

المشاركة الأصلية كتبت بواسطة Ayman_52

لا بس فى بصيص من الامل فى الموضوع

ان د/محمد لقى (طرمبه الميه و السير)من غير ما يستنى

---------
بجــد بقـــى

هى الصراحه حاجه تخنق

بس اللى بيصبر شويــه ان فى تحسن فى التوكيل بيحصل (حتى لو بطىء)

ربنا معاك يا د/محمد .... وان شاء الله -البليه- تيجى على طول

تحيــــــــــــاتـــى

باشا والله باشكرك على المكالمه الجميله اللى اتكلمناها اهى خففت شويه وفعلا زى ما بتقول " بس اللى بيصبر شويــه ان فى تحسن فى التوكيل بيحصل (حتى لو بطىء) " وشكرا على ذوقك العالى ياباشا
خالص مودتى

المشاركة الأصلية كتبت بواسطة MohabSaeed

الى اقدر اقوله ..... ربنا يستر .

لازم فعلا يكون فى اهتمام بتوفير قطع الغيار و بسعر معقول ... و كمان يبقى فى اختبار جوده حقيقى ...مش العربيه تنزل بعيوب تصنيع او تقفيل علاشان تتصلح بعد كده .... حاجات بسيطه زى التزييق و الجلده الى بتقع , بس ليه ماتتعملش صح من المصنع ؟؟ طلاما ان العيب معروف .. يعنى العلاج معروف ؟؟

ده بقا اللى هيجننى يا أستاذ مهاب وخصوصا ان العربية بقالها ( الجين2) ثلاث سنوات فى مصر .... ومع إن بعض العيوب اختفت نسبيا فى المودلات الجديده بس برضوا لازال هناك من يعانى منها والسؤوال الأهم بقا هل عيوب التقفيل وقطع الغيار ديع برضوا بيعانى من اللى راكبين العربية فى اوروبا وماليزيا ؟؟؟؟؟؟؟؟؟؟؟؟؟

على العموم أشكرك يا باشا على المشاركه فى الموضوع وتقبل تحياتى

ترجعلك بالسلامه يادكتور والف سلامه على دروسك

تحياتي