السلام عليكم جميعا
من فضلكم يا إخوانى شاركونى الرأى سريعا فى الآتى :
أنا معروض عليا عربية 127 موديل 82 بس حالة جيدة جدا مرشوشة حلو من عند الكرتيرات ورقم الكرتيرة موجود والحالة الخارجية جيدة ومارشتش برة ولا جوة وتعتبر فابريكة دواخل و95% خوارج ، موتور جيد وفتيس ناعم وسعرها 13500 (كل المواصفات دى من رأى الفنى اللى بيساعدنى فى الشرا) .
أما أنا فمشكلتى تتلخص فى الآتى :
أنا مش باعرف أسوق يعنى لو اشتريتها حاتعلم عليها - أنا خايف جدا من مشاكل العربية فى الصيانة ومش فاهم أى حاجة لدرجة إنى باترعب لما بافتح الكبوت بتاع أى عربية لفحصها باحس إنى أبيض ومش فاهم ومش حافهم أى حاجة وده السبب الرئيسى للتخوف من السيارات عامة لأنى دايما باتخيل نفسى ماشى بالعربية وفجأة تعطلت فى وسط الشارع ومحتاج زقة ومش لاقى حتة أركن والعربيات اللى ورايا بتدى سيل كلاكسات وشتايم وتريقة هذا فضلا عن إنى حاكون فريسة سهلة للصنايعية سواء ميكانيكية أو كهربائية أو سمكرية وغيره .
كمان خايف من احتكاكات الشارع مع بتوع الميكروباص والتاكسى إللى لو لمست واحد فيهم حيتعمل فيك حاجتين ضرورى : تتشتم وتنضرب ثم تدفع ثمن الإصلاحات .
هذا فضلا عن عدم تمكنى لحد دلوقت من عمل متوسط تقديرى للمصروفات الشهرية بتاعت العربية ومدى توافقها مع ميزانيتى .
يا جماعة بصراحة أنا متردد جدا عينى على العربية ومن ناحية تانية خايف من مشاكلها ( مرور - مصاريف - صنايعية - خناقات شارع - فصول باردة منها -)
تعرفو يا جماعة إن حتى الركنة عملالى مشكلة لأن عند البيت دايما الجيران بيتخانقوا على مكان الركنة .
طيب إيه العمل .
أرجو من المتواجدين حاليا مشكورين مساعدتى بالرأى الموضوعى والنصيحة لأن من خلال كلامكم بإذن الله سوف أتخذ قرار الشراء أو إلغاء الموضوع برمته .
ولكم الشكر جميعا
المفضلات