آباء و امهات المنتدى .. هل بتتعاملوا مع الكتب للمساعدة فى تربية الاطفال ؟
لأن الجيل الحالى من الاطفال عاوز عقول خاصة للتعامل و كيفية التوجية غير الطريقة اللى اتربينا واتعاملنا بيها خالص .
لو حد قرا كتب ياريت يدلنا عليها من حيث العنوان و المؤلف و هل الكتب دى مترجمة ولا ايه للتعامل مع هذا الجيل من سن 3 سنوات ...افادكم الله .
كل طفل له شخصية مختلفة وله طريقة تعامل مختلفة والام هي اقدر انسان لمعرفة شخصية ابنها ويليها الاب وبالتالي هي اللي بتقدر تحدد طريقة تعاملها مع الشخصية
مفيش مانع ل اللجوء للكتب او الانترنت للاطلاع العام العام فقط لكن استحالة كتاب مهما كانت درجة ثقافة كاتبه يقدر يحدد الطريقة المُثلى للتعامل
اهم ما يمكن قراءته و الاستفادة منه هو الكتب التى تتحدث عن مراحل تطور و نمو الطفل عبر المراحل السنية المختلفة...... و الفائدة منها انها تلقى الضوء على خصائص كل فترة سنية و ملامحها و مشاكلها....... يعنى خد عندك مثلا مرحلة (لأ) الشهيرة التى يمر بها الطفل بدءا من سن سنتين..... كل حاجة لألألأ...... هذه المرحلة مثلا هى تعبيرعن تكوين الذات...... يعنى الباشا او الهانم الفسل او الفسلة :) بيكون شخصية يواجه بها العالم و يتم التعبير عن ذلك من خلال ال لأ لاى حاجة يقول عليها الكبار..... و هكذا
فعلا الجيل ده غيرنا خالص وعايز طريقه للتعامل معه على انه كبير وفاهم مش زينا خالص
فعلا الجيل ده صعب و مش بيضحك عليه خالص يعنى بنتى الحمد لله عندها سنه و شهر و مش بنعرف نضحك عليها فى اى حاجه
والدتى كانت بتفول ان احنا و احنا صغيرين انا و اخواتى كانت تربيتنا اسهل كتير
و كنت سمعت ان فى كتب اجنبيه كانت بتتكلم عن كده و بتشرح مواقف كتير و ازاى تتعامل مع اطفالك فىها
كان موقف من احدى الكتب كان واحد قالى عليه قرأه فى كتاب عن ان الطفل لو شبط فى حاجه مثلا مش لازم على طول تجيبهاله و لو صمم و رخم و عيط مثلا ممكن تعمل الآتى
تقولى ان مش معاك فلوس كفايه تكمل الاكل لغايه اخر الشهر و لو انت عاوز تجيب لعبتك كمثال يعنى يبقى هتبقى من فلوس الاكل بتاعك لغايه اخر الشهر و بالتالى مش هتتعشى لآخر الشهر و احتمال كبير ان الطفل يوافق و لما يروح و يجى معاد العشا هيقرصو الجوع و هيطلب يتعشى تقولوا احنا مش اتفقنا ان مفيش عشا هيتنرفز و يعيط ممكن و هيقول لازم اتعشى هتروح رايح قايلو مفيش مشاكل بس هنزل انا ارجع اللعبه لعمو فى المحل و اخد الفلوس و تتعشى عادى هيقولك حاضر طبعا
و عمره ما هيصمم على انه يجيب حاجه بدون ما انت تكون موافق و ممكن كمان يستأذن و يقولك هو حضرتك معاك فلوس يا بابا قبل ما يفكر يعوز حاجه
اللى حكالى عن الكتاب بصراحه دكتور كان بيدينى كورس فى communication skills و هو كان قالى على الكتاب ده و انه طبق الموضوع ده فعليا و نجح معاه جدا
فعلا هيه دى نوعية الكتب اللى بأسأل عنها .. و بتتكلم عن صفات و سلوك الطفل و كيفية معالجتها و تقويمها مثلا الطفل لو انانى لو انطوائى لو زنان.......... او اى صفة ازاى اتعامل معاه بطريقة صحيحة و ايجابية عشان ما أثرش عليه سلبيا او اجيب نتيجة عكسية معاه ...اقتباس:
المشاركة الأصلية كتبت بواسطة kliken
بص يا باشا انا عند كتاب اعتقد انه مفيد
انا حاولت ارفعه بس للاسف الكتاب كبير
عنوانه ( العلاج السلوكى للطفل )
من اصدارات ( عالم المعرفه )
تاليف ( د عبد الستار ابراهيم
د عبد العزيز بن عبدالله
د رضوان ابراهيم )
وبص بصه على اللينك ده ممكن يكو مفيد
http://www.arabpsynet.com/HomePage/Psy-books.Ar.htm
السلام عليكم و رحمة الله و بركاته
أنا عندى شوية كتب إلكترونية هارفعهالك قريب إن شاء الله.
و كمان عندى مجموعة محاضرات روعة للدكتور ياسر نصر كانت بتيجى على قناة الناس لو محتاجها ممكن نتقابل و أديهالك على CD
و ده موقع الدكتور ياسر نصر ... و إن شاء الله تلاقى كل اللى بتدور عليه
http://yassernasr.com/
و لا تنسانا بالدعاء
الكتاب الأشهر عالمياً كتاب د. سبوك لتربية الأطفال ويتحدث من المرحلة الجنينية حتى نهاية مرحلة المراهقة ..
وممكن تلاقوه في نهضة مصر .. أو الشروق ..
بس طبعاً الكتاب لوحده مش كفاية أبداً .. ممكن يرشدك لبعض الحيل ، ويفهمك طبيعة المرحلة السنية التي يمر بها ابنك أو ابنتك .. متطلباتها ومشاكلها ...الخ
ويظل الأساس هو شخصيتك في تربية أبناءك
تقبلوا جميعاً خالص مودتي
هناك مقولة لجان جاك روسو
"قبل الزواج كان لدى ست نظريات لتربية الابناء أما الأن فلدى ست أبناء وليس معي لهم أية نظريات"
وهذة المقولة صحيحة بنسبة كبيرة لان الواقع العملى مختلف كثيراً عن التصور النظرى وفعلا الكتب لن تستمد منها منهج ثابت للتعامل مع أطفالك ولكنها تمدك بالخبرات اللازمة فى التعامل معهم فى المواقف المختلفة وعن تجربة الكتب المتخصصة تعطى مرونة كبيرة فى التعامل مع الطفل لكن حذار ان تقرأ كتاب وتحاول تطبيقه على طفلك كما وردبه فكل طفل له شخصيته المستقلة التي تحتاج لأسلوب تعامل لا يفهمه سوى المقربين منه
وأنصحك بالذهاب مع أطفالك الى المكتبات العامة لأن كتب الاطفال التربوية تساعدهم فى تكوين الثقافات والأخلاقيات بدون أن توجه لهم النصائح
ومكتبة مبارك العامة أرى انها مكتبة رائعة لأنها توفر شتى أنواع الكتب بلغات مختلفة بالاضافة الى الأنشطة المختلفة التى تهذب سلوكيات الأطفال وهذا هو موقعها
وعن نفسى هناك كتاب أفادنى كثيرا يحمل عنوان " لا يمكنك ترويضى ولكن يمكنك اقناعى "
وده نفس رأيي يا استاذ ايمن
الكتب ممكن ناخد منها الخطوط العريضة للتعامل او المنهج العام لكن اللي يحدد الطريقة المُثلى للتعامل هي شخصية الطفل نفسه