الموضوع: العربية فتحت بقها

من شهر ابريل اللي فات والعربية فاتحالي بقها وهاتك يا طلبات
صحيح مش كلها بسبب الاستهلاك في حاجات كتير كانت اخطاء مني معرفش ايه اللي حصلي الكام شهر دول
اول حاجة طلمبة البور باظت غيرناها بقطعة استيراد
معداش اسبوع واتكلبشت ودفعت غرامة 50 جنيه
يدوب فكيت الكلبشة ومشيت كام متر الفرامل سابت وانا داخلة على اشارة ولحقت نفسي على اخر لحظة بفرامل اليد بس دخلت في كورلا وكسرت الفوانيس اليمين
اسبوع كمان والمارش باظ ومحدشيقولي تقلت عليه وانا بدور العربية لان اللي حصل بالظبط وقفت مني في مطلع وقطعت النفس مرضتش تدور خالص ومن حظي الجميل اني عطلت قدام كهربائي
وبعدها من اسبوعين تقريبا دخلت في التاكسي الي حكيت لكم عنه والفوانيس اليمين كلاكيت تاني مرة تغيير وسمركة في الرفرف اليمين وتغيير قطعة في الدينامو تقريبا اسمها فحمة دي لوحدها كلفت 90 جنية
بعد كام يوم العربيه خبطت من تحت في غطاء مجاري ونفس قطعت الدينامو باظت تاني وكلفت 100 جنيه
البطاريه محبكش عمرها الافتراضي ينتهي الا اليومين دول غيرناها آل يعني الحكاية كانت نقصاها
قلنا ما بدهاش بقه نرش العربية كلها عشان شكلها بقه يسد النفس وطلبت تكون ميتالك
للاسف طلع لونها اغمق من لونها الاصلي النبيتي شوية مع اني كنت اتمنى تكون افتح درجة
قلت مش مشكلة قدر الله وماشاء فعل ومهما كان شكل بقه افضل
زوجي كان مسافر بيها الصعيد من كام يوم عطلت بيه في الطريق في عز الضهر والحر الحارق في الطريق الصحراوي وكانت المشكلة ان العجلة الخلفية قفشت واللي فهمته ان البلي ساح تقريبا المهم كلفت حوالي 300 جنيه ده غير تعب زوجي لمدة 6 ساعات تقريبا في الحر غير ساعتين ونص سفر
تاني يوم رجع ولاحظ ان العجلة الامامية بتسخن طلعت تيل الفرامل قافش وتم تغييره
ده غير ان التكييف بايظ من الشتاء اللي فاتت وكل ما نفكر نصلحه بقه ونشوف مشكلته ايه مش ملاحقين ومش مديانا فرصة
الله اعلم لسه مخبيالنا ايه تاني معرفش ايه اللي صابها عمرها ماعملت معانا حركات النقص دي كل شهر تطلع لنا في مصيبتين تلاتة ربنا يهديها علينا يارب
انا بقيت خايفة اركبها وتعمل مشكلة تاني ومصاريف تاني واكون انا السبب ده غير الكلام الجميل اللي كل شوية اسمعه اني انا السبب انا السبب
الله يرحمك يا 127 عرفت قيمتك على الاقل مكنتيش حوجاني لعربية حد