اية احسن طريق؟ ثانيا الماتريكس اخدها الينها (لسة 200 كلم) و الا هازهق ؟ ( اول يوم العيد ان شاء الله) شكرا مقدما لمن يتكرم بالرد على , اخوكم : مدحت
عرض للطباعة
اية احسن طريق؟ ثانيا الماتريكس اخدها الينها (لسة 200 كلم) و الا هازهق ؟ ( اول يوم العيد ان شاء الله) شكرا مقدما لمن يتكرم بالرد على , اخوكم : مدحت
احسن طريق يا باشا او اللي انا اعرفه :) هو انك تاخد طريق اسكندريه الزراعي و عند طنطا ما تدخلش و حتلاقي كوبري كده اطلع من عليه و انزل خد الفتحه يمين تبقي انت كده اخدت طريق المحله و المنصوره.
لما تمشي فيه يا اما تدخل المحله يا اما من علي الدائري من بره يطلعك علي طريق المنصوره و في الحالتين حتمشي علي طول لا حتدخل يمين ولا شمال علي طول علي طول حتلاقي نفسك طلعت علي طريق المنصوره و تفضل ماي فيه برضه علي طول لخد ما توصل المنصوره برضه ما تدخلش و تفضل ماي طوالي حيقبلك بعدها شربين و بعد شربين ب 10 او 15 كيلوقبل دمياط الجديده تسأل علي فتحه راس البر حتلاقيها علي ايدك الشمال تمشي مسافه كام كيلو و تدخل يمين و تعدي مزلقان القطر و اسال هناك حيقولولك طريق راس البر منين تمشي في طوالي حتلاقي نفسك في راس البر حمد الله علي سلامتك :) .
طبعا حتعدي علي المحله لازم حتيجي تتغدي معايا مافيهاش كلام دي. :)
ممكن اعرف انت ساكن فين يعني في الجيزة وله مصر الجديدة علشان دي تفرق كتير ؟؟؟؟
بص يا زعيم فى طريق حلو بس طويل شويه و راح يزعل اخونا حازم علشان مش راح يعرف يعزمك على الغدا
تاخد طريق مصر الآسماعيليه الصحرواى ثم الى بورسعيد و بعد ما تمر من تحت كوبرى الفردان بحوالى 30 كيلو راح تلاقى تفريعه شمال الى الطريق الساحلى الدولى و دمياط سير فى الاتجاة الى دمياط انزل فى نزلة دمياط من المكان ده أسال على مدخل رأس البر أن شاء الله توصل بالسلامه
الطريق طويل أكتر من الزراعى بحوالى 100 كيلو لكن جميل جدا و لا يوجد به مطبات نهائى عكس الطريق الآخر و تقدر كمان تمشى فيه براحتك و انت بتلين علشان واسع عكس الطريق الزراعى
بس خد معاك ملابس اتقل شويه علشان الجو هناك دلوقتى حلو جدا و ممكن يبقى برد باليييل
ده حلو لو انت من سكان مصر الجديده هيوفر عليك وقت وبنزين حتى ان طالت المسافه لعدم وجود مطبات ووقفات فيه مثل الزراعياقتباس:
بص يا زعيم فى طريق حلو بس طويل شويه و راح يزعل اخونا حازم علشان مش راح يعرف يعزمك على الغدا
تاخد طريق مصر الآسماعيليه الصحرواى ثم الى بورسعيد و بعد ما تمر من تحت كوبرى الفردان بحوالى 30 كيلو راح تلاقى تفريعه شمال الى الطريق الساحلى الدولى و دمياط سير فى الاتجاة الى دمياط انزل فى نزلة دمياط من المكان ده أسال على مدخل رأس البر أن شاء الله توصل بالسلامه
لا مش كتير كده هما اقلاقتباس:
الطريق طويل أكتر من الزراعى بحوالى 100 كيلو
يا حازم باشا عاجز عن الشكر لكرمك واخلاقك العالية و ردك الدقيق و فعلا انا نفسى اتشرف برؤيتك و انشا الله عن قريب , اكون لوحدى احسن ما الولاد يقعدوا يقولوا ياللا ياللا و يكروتونا , و حضرتك كتاب رجولة دسم , عاوز يتقرى على روقان و مهل , و اوعدك اجيلك مخصوص زيارة شهر 11 , ربنا يجمعنا و ساير الاعضا على الحب فى الله و التعاون والخير امين , و انا ساكن فى اول المنيل يا استاذ ابو عبده فهل فيه سكه تانيه غير اللى تفضل بيها حازم بيه شايفها حضرتك احسن ؟ و هل اخد الماتريكس و افضل مخنوق على سرعة التليين البطياه (70-80 ) و الا الليجانزا الماضيه , وخللى التليين بظروفه ( علما ان الماتريكس انا جايبها للتؤم اللى ف الهندسه و مش ها ديهالهم الا لما الينها لهم عشان لسه متعلين سواقه طازه و عمالين يزنوا ليل نهار " بابا مش ها تلين بقه ؟ ما بتلينش ليه؟ الخ.. وانا قليل النزول م البيت و ف شهر عملت 200 كم بالعافيه) وانا مرتاح للسكه الطويلة اكتر,اشكركم من كل قلبى
يبقى عندك طريق اسماعيليه الصحراوي اروق بكتير من اسكندرية الزراعي وطنطا والكلام ده
وعالعموم انا رايي انك تاخذ الماتريكي لأنها فرصه حلوه جدا انك تليينها على السرعه دي وبطريقه هاديه على نقله واحده وبدون توقف وده احسن من داخل البلد
ممكن ترشح لنا احسن حاجات فى البلد عشان دى اول مرة نروحها لو سمحت ؟ و الف شكر يا ابو عبد الله ,"الحكومه الداخليه رايها من رايك بخصوص التليين بردو"اقتباس:
المشاركة الأصلية كتبت بواسطة aboalm
في عندك منطقة اللسان وهي نقطة التقاء النيل مع البحر الابيض والقاعده هناك بليل رائعة
وفي النيل ده عبارة عن محلات على كورنيش النيل وهتلاقي هناك كل اللي انت عاوزه وممكن تقعد على كازينوا من اللي على الكورنيش وده بيبقى احلى بليل
والسوق العمومي بتاع راس البر علشان تقعد تتعشى عشوايه حلوه كده كل الاكلات والفطير المشهور من عند ابو الفتوح هتلاقي كل دها هناك وبسعر رخيص وحلويات شرقيه من البدري ده اخطر حلويات هتأكولها في حياتك
وممكن تاخد فسحه في النيل بلانش من عند منطقة الجربي الصبح هيأخذك لحد اللسان ويرجع تاني ودي بتبقى الصبح حلوه جدا
ومن الأخر البلد نظيفه جدا هناك وحلوه بس لا تقلق من موضوع الزحمه لأن الدمايطه دي بتبقى فسحتهم هناك !!!!
وربنا يسعدك ان شاء الله ورحلة موفقة ان شاء الله
يخلليك لنا ويسعدك مشرفنا و حبيبنا ابو عبد الله كل ما ها نروح حته م اللى قلت لنا عليها ها دعيلك ان شا الله :D