سؤال فى فيرنتى الزيرو (بلية الدبرياج )

**moudy2002** · 04-07-2009 09:26 PM

سلام عليكم
ربنا كرمنى بفيرنا زيرو 2009 1600 كاملة من شهر ونص تقريبا
المهم الحمد الله العربية تمام وكل حاجة بس بعد استعمال 4500 ك لاحظيت شئ غريب جدا ..
العربية لما بتبدى تسخن بسمع صوت صوصوا وبيروح الصوت اول ما المس بدال الدبرياج !!!! هو الصوت مش عالى قوى او مزعج بس موجود وانا سمعة ..
ومن خبريتى القليلة قى الميكانيكا دة كدة بلية الدبرياج ...

السؤال دلوقتى هل حد بيحس بالصوت دة فى الفيرنا عموما . لان اخر مرة كنت بعمل صيانة الالف اشتكيت للمهندس من كام حاجة وكان رأى سيادتة ان كل الكورى كدة .. ( زى الدبة الى بتحصل بين كل غيار و كمان صوت ونة عند الرجوع مارشيدير ) .
فهل الفيرنا كدة ولا اية علشان لو مش كدة هخرب بيتهم فى التوكيل عند صيانه 5000 ك .

تانى حاجة العربية بحس انها مخنوقة فى الغيار التانى بمعنى انه بدوس بنزين اكتر من اى غيار لغاية العربية ما توصل 40 ك علشان ادى التالت .. اية الحكاية .
شكرا يا رجالة واسف على الاطالة بس انا فعلا مضايق من موضوع الصوصوا دة وحزين لانه لو طلع كدة هيطلعوا الفتيس برة ويغيرو البلية والعربية لسها بقالها شهر ونص بس ..
سلام عليكم

**M.Osman** · 04-07-2009 09:47 PM

نعم
الصوت دا عندي (انا كنت فاكر انه بيجي لما ادوس بنزين لكن اتضح لي انه بيجي لما اشيل رجلي من عالدبرياج حتى لو مورت )

و هو تقريباً مش ملحوظ لدرجة اني خليت واحد صحبي يلاحظه بره العربية كذا مرة و يقوللي مش سامع حاجة , انا بس اللي بسمعه و بصراحة مش عارف حلها اية؟

بس الصوت مش مدايقني اوي لدرجة ان كل مرة في الصيانة انسى اقول لهم عليه.

انشاء الله حد من الأعضاء يفيدك و يفيدني

(بالمناسبة انا ماشي حوالي 22 ألف كم حالياً .. و الصوت كنت سامعه من زمااان .. عند الـ15 ألف كم مثلاً )

**shery103** · 05-07-2009 12:03 AM

لأ ، الصوت ده مش عندى ( عربية والدتى بس بسوقها كتير )

**EslaM_NagY** · 05-07-2009 01:01 AM

معنديش حاجة خالص
35 الف كيلو حتى الان.

**نينو** · 05-07-2009 03:33 AM

يا جماعة متقلقوش خالص انا كان عندي الصوت ده و دوغني كتير و كنت عامل موضوع عنو هنا بس مطلعش ان دي مشكلة و لا حاجة هو بالضبط صوت زي صفارة خفيفة اوي و اول مرجلك تلمس الدبرياج الصوت ده يختفي علي العموم هو ده مشكلة ان في تراب دخل في الفرش بتاع الفتيس و حلها انك نخلي اي ميكانيكا بمزيطة يزيت الفرش و ينضفو كويس و متقلقوش منو خالص انا رحت بيها التوكيل مرتين لاني مش مقتنع بس في الاخر اقتنعت و اي خدمة .

**khorshed4u** · 06-07-2009 06:44 PM

ممن تتاكد من البلية بتاعت الدبرباج علشان الموضوع ده حصل معايا بس بعد 100 الف كيلة و غيرت طقم دبرياج كامل و لما سئلت الميكانيكى قالى لازم تغير طقم الدبرياج علشان البلية بتجيب معاها اسطوانة مع العلم انى رجلى خفيفة على الدبرياج

**حماده المصري** · 07-07-2009 11:53 AM

انا حصل معايا الكلام ده في النيو اكسنت
ودي بليه دبرياج بس الصوت كان بيبيقى واضح

وغيرتها من غير ما اغير اي حاجه معاها وماشيه زي الفل

**moudy2002** · 07-07-2009 09:51 PM

شكرا جدا يا رجاله
هو فعلا زى ما الاخ الفاضل نينو ما قال هو فعلا طلع الفرش بتاع الدبرياج وعملتوا فى صيانه ال 5000 فى مركز خدمة كارفان الى جانب سوق السيارات فى الحى العاشر ..
طبعا الفنى جاب تقريبا W 40 ورش نقطتين ولا حاجة زى ما يكون بيقطع من جلدة !!! والصوت طبعا راح يوم ورجع تانى بس مش بنفس القوة .. على العموم انا هروح للميكانيكى ويخلص علبة w40 عليها ولا الحوجة لمراكز الخدمة ... دفعت 132 جنية تمن صيانة ال 5000 ومعملتش حاجة فى العربية غير التربيط وازالة التراب من على الطنباير وتنظيف الفلتر وشكرا ... فعلا حرامية

متشكر جدا وشكر خاص لكل من شارك فى الموضوع .