بلطجية المطربين , و مقارنة بسيطة بينهم و بين الهضبة .

**Terrible_DaRsH** · 04-07-2009 11:36 PM

هل اصبحت النجومية استعراضا للعضلات وفشخرة كذابة هدفها الوجاهة والاستعراض؟ هل اصبح الاعتداء علي الجمهور هو الجزاء والمقابل الذي يرد به النجم علي عشاقه ومحبيه الذين دفعوا "دم قلبهم"من اجل حضور حفله وتشجيعه وبدلا من ان يكون جزائهم الشكر والعرفان يتلقي بعد ذلك "علقة ساخنة" لانه تجرأ واقترب من نجمه كي يصافحه أو يسلم عليه.ومؤخرا ازدادت حوادث اعتداء البودي جاردات أو بمعني ادق البلطجية المصاحبين للمطربين علي الجمهور، بحيث لم تعد حالات فردية، بل أصبحت ظاهرة وموضة سيئة لم تكن موجودة من قبل.

وعلى الرغم من ان نجوم الزمن الجميل كانو الاكثر شهرة وجماهيرية ونجومية، إلا أننا لم نسمع ابدا ان قام الحرس الخاص بالعندليب عبد الحليم حافظ او الاسطورة ام كلثوم بالاعتداء علي جمهورهم الذي لا حصر له.

ولكن نجوم اليوم يختلفون عن نجوم الغد، فقد شهدت حديقة "انطونيادس" في الإسكندرية الخميس مهزلة بكل المقاييس، وذلك بعدما كاد شابا في العشرينات من عمره أن يلقي حتفه بعد الاعتداء الوحشي الذي تعرض له من قبل الحراس الشخصيين المصاحبين للفنان تامر حسني.

ترجع أحداث الواقعة عندما كان الشاب يحضر الحفل الغنائي الأخير لتامر حسني بالاسكندرية، وحاول الشاب العاشق الولهان ان يخترق الحاجز الأمني الذي صنعه بودي جاردات تامر الذين تعدوا الـ200 "بودي جارد" قبل أن يمسكوا به ويطرحوه أرضا، والقيام بضربه في أنحاء متفرقة بجسده حتى تقطعت ملابسه تماما، وأصيب بعدد من الكدمات والجروح.

وعندما لاحظ تامر حسني وجود حال من الهرج على الجانب الأيمن من خشبة المسرح توقف عن الغناء وطلب من الحراس ترك الشاب ليصعد، وبعد محاولات منه ليتركوه رفعه الحراس إلى المسرح وهو فاقد للوعي تماما.

وحفظا لماء الوجه اعتذر تامر للشاب عما حدث، ووعده بمحاسبة البودي جاردات، وطلب من مساعده محمد فؤاد الذهاب به الي المستشفي لاجراء فحوصات طبية عليه وشراء ملابس جديدة له بدلا من تلك التي تمزقت.

تلك المهزلة التي أصبحت تميز حفلات تامر حسني التي نادرا ما تخلو من ازمة سواء داخل مصر أو خارجها، ولعل اخرها حفل مدينة المنصورة وحوادث التحرش الجنسي التي أدت الي الغائه، الأمر الذي جعل تامر يؤكد ان قرر الاستعانة بالبودي جاردات كان من أجل تنظيم الحفل، ومنع الفتيات من الاقتراب منه حتي لا يقال انه يقوم باستئجار الفتيات من أجل تمثيل الاغماء او احتضانه.

وليست حوادث اعتداء البودي جاردات او البلطجية مصاحبة لحفلات تامر حسني فحسب، بل ايضا ترافق معظم المطربين والمطربات، واخر تلك الحوادث ما حدث في افتتاح فيلم "بحر النجوم" عندما أفسد الحراس الشخصيون المرافقون للنجمة اللبنانية هيفاء وهبي أجواء الافتتاح بعد أن تسببوا في حدوث مشاجرات مع الصحافيين والجمهور الغفير، الذي التف حولها في المجمع التجاري "سيتي ستارز" بالقاهرة أثناء حضورها العرض الخاص للفيلم ، وكذلك عندما كانت هيفاء تجري عددا من المقابلات الإعلامية.

وأدى سوء التنظيم إلى حالة من الهرج والمرج دفعت الحراس السبعة الأشداء المصاحبين للنجمة اللبنانية الي التصرف بفظاظة مع الحاضرين وصلت إلى تبادل اللكمات مع عدد من الحاضرين والإعلاميين الذين كانوا يحاولون الحصول على تصريح من النجمة.

أما النجمة اليسا فكان لها نصيب هي الأخرى حيث قام عدد من البودي جاردات المصاحبين للنجمة بالاعتداء علي احد المصوريين الصحفيين وهو ما ادي الي قرار من نقابة الصحفيين اللبنانيين بمقاطعة اليسا التي سرعان ما قامت بالاعتذار علانية للصحفي عما حدث.

تلك الحوادث جعلتني أقارن بين موقف هؤلاء النجوم وموقف شاهدته بنفسي عندما حضرت حفل الفنان عمرو دياب في مهرجان ليالي فبراير الاخير بالكويت، عندما قام الحراس المنظمين للحفل بالاعتداء علي احد المعاقين حاول الاقتراب من دياب لمنحه وردة هدية فما كان من دياب الا ان توقف عن الغناء صارخا مطالبا الحرس بالتوقف قائلا: "هم عايزين يخسروني جمهوري ".

وقام باحتضان المعاق وتقبيل رأسه معتذرا عما حدث من الحرس الذي لقنه دياب درسا في فنون التنظيم مؤكدا له انه يغني في الكويت قبل أن يولد ويعرف جيدا اجراءات التنظيم ولن يسمح لاحد بالاعتداء علي جمهوره.

**MoToRiZeR** · 04-07-2009 11:55 PM

انا رأيي الحاجات دي منذ قديم الأزل و موضوع تبجح الفنان سواء شخصه أو بادي جارد خاص به .. يعني من الحاجات المشهورة لعبد الحليم اللي الصحاقة قامت عليه بسببها موضوع اما قال للجمهور "بس بقي !" و قالوا خلاص المغنيين بقوا بلطجية .

عادي الموضوع بيتكرر بس بصورة أكثر تطوراَ طبعاَ - التطور الطبيعي للحاجة الساقعة - بس انا أتذكر فيديو شفته لعمرو دياب في حفلة و كان مندمج و متمزج أوي في الغناء و لمح واحد من البادي جاردات الخاصين بالحفل ماسك شاب بصورة غير لائقة قام طلع من الأغنية و قالوا إنت بتعمل كدة ليه .. و دار حوار بينه و بين البادي جارد في أخره قال دياب في الميكروفون .. انا مش هكمل إلا اما ده يطلع برة ! و إنت إطلعلي هنا .. و طلع الشاب يحضن عمرو دياب طبعاَ و هو مش مصدق نفسه و خرج البادي جارد وسط تصفيق الجمهور .. بس الغريب في الفيديو ده إن عمرو دياب إتعصب فعلاَ و حسيت إنه كان هينزل يضرب البادي جارد .

**M.almaghraby** · 05-07-2009 12:07 AM

تامر دا علي طول بتاع مشاكل

نجم الجرجير فعلا

**MoToRiZeR** · 05-07-2009 12:13 AM

و علي فكرة من خلال عملي لفترة في صحافة الموسيقي أقدر أقول و بكل ثقة إن عمرو دياب أكتر فنان بيحترم جمهوره و أي حد بيحبه أو بيتعامل معاه و كان تعاملي معاه و مع مدير أعماله في موقفين خلال صدور ألبوم كمل كلامك منهم موقف لن أنساه طوال حياتي .. و تعاملت أيضاَ مع فنانين كانوا بينافسوه في يوم من الأيام و مغنيين يعتبروا أنصاف نجوم و كانوا في منتهي قلة الذوق .. عمرو دياب مش علي القمة بالصدفة .. عمرو دياب يجبرك علي إن تضعه في القمة و أنت في منتهي السعادة .. الراجل ده قيمة كبيرة بجد إذا كان الأجانب كان عندهم مايكل جاكسون إحنا عندنا عمرو دياب .

علي العكس اما تقارن النجوم السوبر أوي عند الغرب زي مايكل و الفيس تلاقي الفيس مات و هو عنده اربعين سنة و كانت حالته صعبة و تخن و صحته في الحضيض .. مايكل جاكسون اما للأسف برضه كانت حالته صعبة و شعبيته في النازل .. عمرو دياب أهوه داخل علي الخمسين سنة من العمر و 25 سنة من مشواره الغنائي و ما زال علي القمة .. ناس جت و ناس راحت و عمرو دياب لا يزال الشخص الذي يتطلع إليه الشباب بإنبهار .. بإهتمامه برياضته و شكله و شغله و نجاحه .. ممكن بعض الناس حست بالفعل إنني ببالغ بس الراجل ده حالة خاصة جداَ لن تتكرر .

**seaman** · 05-07-2009 12:22 AM

الهضبه..والملك بس

**هيثم** · 05-07-2009 01:56 AM

المشاركة الأصلية كتبت بواسطة DRguevara

تامر دا علي طول بتاع مشاكل

نجم الجرجير فعلا

**نور القمر** · 05-07-2009 03:29 AM

العيب مش على المطرب او البوديجاردز بتوعه
العيب على الهايفين اللي عايزين يحضنوا ويسلموا على المطرب وعلى تصميمهم لدرجة انه يتضرب من حثالة
هايسلم على الاملة يعني ..... بجد حاجة تعصب ويستاهلوا كل اللي يجرالهم

**samoevil911** · 05-07-2009 04:05 AM

بصوا مع احترامي الكبير للي كتب الموضوع والاعضاء بس انا ليا وجهت نظر احب اقولها
اولا انا ولا بحب عمرو ولا تامر ولما بسمع اغنية بقول دا حلو او دا وحش بدون مجاملة من الاخر بنحاز للأفضل
ثانا انا متأكد ان كاتب الموضوع والاعضاء اللي رضوا كلهم بيعشقوا عمرو دياب يأما بيكرهوا تامر

ناخد بقي الموضوع براحة
اول حاجة عمر دياب محدش ينكر انه هضية وماشي مفيش وجه مقارنة بينوا وبين تامر بس هو مثلا مين اللي قارن بينهم ؟ انا مفتكرش ان تامر قال انا احسن من عمرو حتي لما بتيجي سيرة عمرو دياب كان بيقول دا استاذي وانا فين وهم وفين

انا اللي ملاحظة انشهرة تامر بتزيد وكل مبتزيد نلاقي جمهور عمرو بيهاجم تامر اللي يقول رد سجون واللي يقول دا لبسوا بيئة وحوارات كدا . طب سؤال احنا مالنا اتسجن والا لأ رد سجون والا لأ ..؟ هتقولولي اصلوا مفروض ان الفنان قدوة ...دوة ايه يا جماعة يعني هو عمرو دياب الي بيطلع يحضن في واحدة هو دا اللي قدوة .. واحنا خلاص بقيت القدوة بتوعنا مطربين .. سبنا العلماء مشايخنا والقساوسة للأخوة الاقباط.. وبقي القدوة عمرو دياب وتامر

لو بقي هنكلم علي الشهرة والنجومية .. فالعمر الفني في صالخ عمرو دياب بلا شك وصدق اللي سماه هضبة بقاوا زيادة عن 20 سنة محتفظ بمكانته .. بس مننكرش ان تامر انطلق في الفن زي الصروخ واكبر دليل علي نجاخ تامر انه في 5 سنين بس بقيت الناس بتقارنة بعمرو دياب سواء بقي قلنا في وجه مقاربنة او لأ بس من الاخر مدام وصلت الدرجة لأن اللي بيخبوا عمرو دياب بيعلقوا علي تامر معني كدا ان تامر وصل خلاص وبقي فيه مقارنة ..
يعني العمر الفني في صالخ عمر بس النجاح الفعلي في صالخ الاتنين وسرعة النجاح في صالح تامر .. وللعلم انا سافرت كتير ومعظم الشعوب العربية بتحب تامر اكتر .. واللي عايز يصدق اوك واللي مس عايز ةاللي دا اللي انا شفتوا ..

اما لو علي موضوع الالبوم الجديد فبالمانة البوم تامر بدون شك بس للاسف عشاق عمرو دياب بيكبروا - مثلا عمرو دياب في اغنيتين من الابوم بنسمعهم بقالنا بتاع 3 شهور و الاغاني الخلوة 4 اغاني بس .. واليي يقول غير كدا يبقي وجهة نظر او بيكابر وانا ارجح التانية لأن للاسف في ناس اتوهمت بعمر ... اما البوم تامر فيه 14 اغنية منهم 10 اغاني علي الاقل حلوين

اما موضوع الموضوع نفسوا وحوار البودي جارد فانا احخب بس اقول هو تامر زنبوا ايه دا البودي جارد والراجل حضرتك قلت بنفسك لما خد بالوا طلعوا وبعت معاه مدير اعماله.. وعضو تاني قال ان في موقف شبيه حصل مع عمرو ... طب ذنب تامر ايه يمشي من غير بودي جارد ولما حد يهجم عليه ويأذوه من كتر العدد نقول مات فداء جماهيروا ولما بنات نقول مأجرهم .
طب واحنا نسينا ليه الشخص اللي قال لعمرو في حافلة ممكن تغني قديوم وحرجوا عمرو ....

من كل دا حابب اقول ان ياريت منتحاملش علي حد ... ولما نحب حد مش لازم نقعد ننقد الاخر وبس لأن اكيد اللي بنحبه فيه عيوب

واسف علي الاطالة

**Terrible_DaRsH** · 05-07-2009 04:28 AM

الموضوع منقول من موقع مصراوى يا سامو ده اولا .

ثانيا : لما مغنى يطلع يغنى بشعر صدره و يقول خليها تاكلك و وحياة امى و هنططك على ايديكى و اصلى اخدت كل حاجة فى عهدى و مبقاش فيكى حاجة تغرينى و الــــــــــــــــــخ .

فمينفعش انت تقول ان جمهور عمرو بيتحامل على المغنى ده ؟؟ من انهى وجهة نظر يعنى !!

طي اشمعنا جمهور عمرو مبيكرهش حماقى , لا ده كمان كلنا عايزين حماقى يبقي خليفة عمرو .

يبقي تفسر كده بايه !

يا سيدى الفاضل احنا مش بنتحامل على حد و لا حاجة , احنا اساسا معترضين على ان واحد زى ده الشباب تقلده و تسمعه بحركاته القذرة و حواراته الفاشلة المستمرة اللى بيحاول يجذب الشباب المراهق بيها ..

ثم كمان مين قالك ان تامر قال ان عمرو دياب استاذى !!!

بامارة لما اتهم عمرو بانه سبب فى حبسه ؟ و لا لما اتهمه بانه بيحاول يتسبب فى اذيته و لا لما قال ان عمرو بيكرهه ؟!!!

على فكرة انت بتدافع عن تامر و للاسف من طريقة كلامك واضح جدا انك بتحبه و بتسمعه حتى بص فى اول كلامك هتلاقى نفسك بتدافع عنه من غير ما تاخد بالك .

على فكرة تامر ده كذااااااب و لما بياخد على دماغه بيغير كلامه فى ثانية لانه عيل زبالة من الاخر .

http://www.youtube.com/watch?v=gPKu7...eature=related

**blazer** · 05-07-2009 05:22 AM

المشاركة الأصلية كتبت بواسطة samoevil911

انا اللي ملاحظة انشهرة تامر بتزيد وكل مبتزيد نلاقي جمهور عمرو بيهاجم تامر اللي يقول رد سجون واللي يقول دا لبسوا بيئة وحوارات كدا . طب سؤال احنا مالنا اتسجن والا لأ رد سجون والا لأ ..؟ هتقولولي اصلوا مفروض ان الفنان قدوة ...دوة ايه يا جماعة يعني هو عمرو دياب الي بيطلع يحضن في واحدة هو دا اللي قدوة .. واحنا خلاص بقيت القدوة بتوعنا مطربين .. سبنا العلماء مشايخنا والقساوسة للأخوة الاقباط.. وبقي القدوة عمرو دياب وتامر

المشاركة الأصلية كتبت بواسطة نور القمر

العيب مش على المطرب او البوديجاردز بتوعه
العيب على الهايفين اللي عايزين يحضنوا ويسلموا على المطرب وعلى تصميمهم لدرجة انه يتضرب من حثالة
هايسلم على الاملة يعني ..... بجد حاجة تعصب ويستاهلوا كل اللي يجرالهم

دا هو الكلام المفيد اللى حضراتكم قلتوه
+
اللى عاوز يسلم على اى مطرب و بيحبه اوى كدا
"الإنسان يحشر مع الذين يحبهم في الدنيا، فإذا كانوا ممن يحبهم الله، فيحشر معهم في رضوان الله، وإن كانوا ممن يبغضهم الله، فإنه يحشر معهم في سخط الله وغضبه."

الموضوع: بلطجية المطربين , و مقارنة بسيطة بينهم و بين الهضبة .

LinkBack

أدوات الموضوع

عرض

-

-

-

-

-

-

المواضيع المتشابهه

مقارنة بسيطة

فيديو مقارنة بين فانتازيا و فلوانس ... مفيد للأختيار بينهم

مطلوب مقارنة بسيطة للمواتير

مقارنة بسيطة بين نعم و لا

مقارنة بسيطة

الكلمات الدلالية لهذا الموضوع

المفضلات

المفضلات

ضوابط المشاركة